Portada Emigración La televisión pública uruguaya echa-y una güeyada a Asturies

La televisión pública uruguaya echa-y una güeyada a Asturies

by asturnet

La televisión pública uruguaya va emitir una serie de cuatro capítulos, d’una hora de duración caún, qu’amosarán el pasáu y el presente d’Asturies a los fíos de los emigrantes. Con esti proyectu Raúl Vallarino y la escritora uruguaya d’orixe asturianu, Mercedes Vigil, quieren enseñar la realidá asturiana a los descendientes de los emigrantes, que nun conocen lo que se ta faciendo y viviendo a esti llau del charcu.

Raúl Vallarino, escritor y presidente de l’Academia Uruguaya de les Lletres, ye’l promotor d’esti proyectu que se llama ‘Asturies, si la vieres colos mios güeyos’. Cuadonga, Uvieu, Xixón, Aviles y les Cuenques son dalgunes de les localizaciones d’esti documental nel que trata de reflexase l’Asturies cultural, histórica, industrial y política actual.

Personalidaes como Corín Tellado, Hevia o Vicente Díaz, que gocen de gran repercusión al otru llau del Atlánticu fueron entrevistaos pa esta serie, que cunta cola collaboración de la escritora uruguaya descendiente d’asturianos, Mercedes Vigil, probablemente la escritora más lleída del Uruguay.

El siguiente proyectu de la televisión uruguaya ye poner en marcha un espaciu selmanal con información y noticies sobre’l Principáu.

Tamién te podria gustar