Educación

Argumentu científicu pa la ‘lleenda urbana’. Un informe de la Universidá d’Uviéu tuteláu pol Principáu conclúi que sólo’l 23 por cientu de los llicenciaos y diplomaos emigra fuera d’Asturies a la gueta d’un puestu de trabayu. L’estudiu, cuyos resultaos se presentaron esta mañana, estima que’l 66 por cientu de los titulaos universitarios asturianos alcuentren emplegu.

Como conclusión del primeru de los datos, el caderalgu Joaquín Lorences -coautor del estudiu xunta los profesores Florentino Felgueroso y Mercedes García- llancia una sentencia contundente: Nun se pue dicir que los xóvenes que salen meyor preparaos de la Universidá asturiana marchen darréu fuera de la comunidá autónoma, o dicho n’otres pallabres, nun ye cierto que cuelen los más preparaos.

No que cinca al porcentaxe de titulaos qu’atopen emplegu, l’informe presentáu güei cifra nun 66 por cientu la tasa de llicenciaos o diplomaos qu’alcuentren emplegu a lo menos nos dos años sucesivos al fin de los sos estudios, si bien pa llegar a esta conclusión -como a toles demás- l’estudiu garra únicamente como amuesa poco más de la mitá de los titulaos na promoción 2000-2001.

Asinamesmo, la investigación afaya un altu porcentaxe de postuniversitarios que realiza trabayos poco o nada relacionaos colos estudios que cursaron, y afita que los titulaos con meyores notes son los que primero y meyor se coloquen nel marcáu llaboral.

Siete de cada diez. Un 73 por cientu de los alumnos asturianos mayores de 25 años que concurre a la selectividá p’acceder a la Universidá d’Uviéu algama l’aprobáu, según datos qu’acaba d’asoleyar l’Institutu Nacional d’Estadística y qu’alluguen al Principáu mui penriba de la media estatal d’aprobaos veteranos nes pruebes d’accesu a estudios universitarios.

Esa media ye del 51 por cientu, o lo que ye lo mesmo: Alpenes la mitá de los estudiantes mayores de 25 años que se presenta a la selectividá nel conxuntu de les Universidaes españoles consigue aprobar, mientres que n’Asturies superen con ésitu l’esamen siete de cada diez aspirantes, acordies colos datos definitivos que l’INE ta acabante validar referíos a 2004.

En cifres absolutes, 73 de los 99 asturianos mayores de 25 años que l’añu pasáu se presentaron a la selectividá aprobaron les pruebes, dientro d’una convocatoria qu’axuntó nes sés d’esamen a un total de 3.091 estudiantes preuniversitarios, la gran mayoría d’ellos (2.400) matriculaos en xunu.

En comparanza coles cifres globales rexistraes nel conxuntu de les Universidaes españoles, les tases d’aprobaos en selectividá en 2004 foron lixeramente superiores n’Asturies nes dos convocatories, un 90 por cientu frente a una media’l 88 por cientu en xunu y un 69 frente a un 64 por cientu nel casu de setiembre.

Por especialidaes, les opciones científico-técnica, de Ciencies de la Salú y les Ciences Sociales atraxeron al mayor númberu d’alumnos, ca una d’elles con alredor de 1.500 estudiantes, mientres que les Humanidaes y les Artes alpenes concitaron a 500 y 130 preuniversitarios, respectivamente.

Datos completos na web del Institutu d’Estadística

Seiscientos alumnos más qu’hai un añu. Los colexos ya institutos públicos del Principáu abren 2005 con un total de 20.122 estudiantes de Llingua Asturiana, depués del recuentu definitivu de datos de la Conseyería d’Educación y Ciencia, cifra qu’amuesa un creciente interés de los escolinos por recibir enseñances d’asturianu, pesie a que nes aules hai menos alumnos por mor d’un descensu sosteníu de la natalidá.

Por niveles educativos, y según los datos oficiales proporcionaos a Asturnews pola Conseyería, 16.296 estudiantes cursen anguaño l’asignatura de Llingua en Primaria, mientres que los centros de Secundaria sólo acueyen a 3.826 alumnos d’asturianu. Dambes cifres suponen un avance respecto al cursu escolar pasáu, nel que se rexistraren unos 10.000 escolinos en Primaria y aprosimadamente 3.500 en Secundaria.

Pa meyorar esos umbrales, les conseyeríes d’Educación y de Cultura llanciaron, en mayu pasáu, una campaña p’alitar la matriculación de los estudiantes d’institutos y colexos públicos na asignatura de Llingua Asturiana -de gallego-asturianu, na comarca’l Navia-Eo-, traducida na difusión de 30.000 dípticos y miles de cartelos nos centros d’enseñanza.

Ensin embargu, la presencia del idioma asturianu sigue siendo ún de los puntos febles na normalización llingüística a los güeyos del movimientu asturianista: La Xunta pola Defensa de la Llingua convocó y lideró nel mes de payares una fuelga na Secundaria pola dignificación de les enseñances d’asturianu nel sistema públicu, y esa mesma organización entregará mañana simbólicamente’l premiu negativu ‘Andrés Solar’, el ‘Madreñazu’, al propiu conseyeru d’Educación, José Luis Iglesias Riopedre.

N’otru frente, l’Asociación de families pola escolarización n’asturianu recláma-y al Gobiernu autonómicu un mínimu d’un profesor de Llingua por centru nel prósimu cursu académicu.

Archivu. Bermeyu recláma-y a Valledor un mínimu d’un profesor d’asturianu por centru pal prósimu cursu escolar

Un grupu asturianu d’empresarios podría poner en marcha una Universidá privada n’Asturies, pa lo que nesti momentu taríen dándose los primeros pasos cola realización de los estudios necesarios pa poder albidrar la rentabilidá económica d’un proyeutu d’estes calterístiques. Esti mesmu mes dióse anuncia a dellos otros proyectos d’Universidaes privaes n’España, como la Universidá San Jorge, que tien d’entamar l’aniciu de la so actividá docente en Zaragoza pal cursu que vien o pal 2006-2007. Nel casu asturianu habría qu’esperar un tiempu más.

Sigún pudo saber Asturnews, un grupu empresarial asturianu podría tar preparando la puesta en marcha d’una Universidá privada que se nutriera de los estudios con mayor ésitu n’Asturies y aquellos otros que nun son atendíos pola Universidá d’Uviéu y que faen emigrar a munchos alumnos asturianos tolos años.

Les carreres de periodismu y comunicación audiovisual podríen ser delles de les escoyíes, ya que namái nesti cursu escolar, foron más de mediu millar los alumnos asturianos qu’escoyeron dir a estudiar a otres Universidaes por nun tener estos estudios n’Uviéu. Poro, nesti momentu namái que se taría nuna fase d’aniciu, estudiando les posibilidaes riales de qu’una Universidá privada pudiere desendolcase nuna comunidá autónoma con una población tan pequeña, que ta avieyando enforma y qu’amás recibe crítiques abondes polo que munchos consideren que ye nun tener procuru por caltener a los sos universitarios meyor formaos.

No que cinca a los estudios de periodismu y comunicación audiovisual, que son los que tán a la tiesta de la emigración universitaria asturiana y tienen a dellos miles d’asturianos espardíos per España, l’aniciu de les emisiones de la canal autonómica asturiana de televisión, con una radio y un portal dixital que sumar a la ufierta, sedríen un bon caldu de cultivu pa facer alitar l’alumnáu d’esta mena d’especialidaes.

La noticia surde nun momentu en que tán entamando a albidrase una bona riestra d’esti tipu de proyectos n’otres comunidaes autónomes onde davezu nun hebo actividá universitaria privada. El casu más nomáu ye’l d’Aragón, onde la Universidá San Jorge, que tien d’entamar l’aniciu de la so actividá docente en Zaragoza pal cursu que vien o pal 2006-2007, dio anuncia la selmana pasada de que tamién fadría un campus en Huesca, concretamente nel parque teunolóxicu Walqa, onde podríen impartise enseñances informátiques y una llicenciatura de comunicación audiovisual.

Los mayestros de Primaria y Secundaria quieren ver medrar les sos nómines. Los sindicatos que representen a los profesores non universitarios n’Asturies llamen al Principáu a abrir una negociación pa meyorar los sueldos de los mayestros, que, aseguren, cobren 2.000 euros menos al añu que los sos compañeros destinaos n’otres comunidaes autónomes.

Nuna comparecencia pública, representantes sindicales de los docentes de colexos ya institutos argumentaron que los profesores qu’exercen nel Principáu encabecen los índices estatales de calidá na enseñanza y ensin embargu cobren menos que los sos colegues d’otres autonomíes.

Asinamemo, los docentes entienden insostenible la situación de los profesores interinos, una estaya na que los sindicatos denuncien una especial precariedá llaboral qu’afecta de forma más aguda a les mayestres interines, que s’alcuentren con graves problemes pa ver reconocíes les sos vacantes por maternidá con garantíes.

Como primer midida de presión al Executivu autonómicu, al qu’amás se-y reclamen soluciones pa la masificación de determinaes aules de Primaria, les centrales sindicales de la enseñanza cellebrarán a partir de les 18,30 hores de mañana una concentración énte la Conseyería d’Educación, allugada na plaza d’España d’Uviéu.

La Delegación del Gobiernu da marcha atrás. L’organismu que representa al Executivu central n’Asturies retira los espedientes sancionadores qu’abriera contra militantes asturianistes pola so participación en concentraciones de la fuelga que se convocó na Secundaria el pasáu 10 de payares. Los alumnos afrontaben multes d’hasta 6.000 euros.

Según confirmó güei un voceru de la organización Xunta Moza, estaya de mocedá de la Xunta pola Defensa de la Llingua Asturiana, varios de los estudiantes a los que se-yos abriera un espediente de sanción recibieron yá notificación por corréu ordinariu de que l’acusación queda archivada y ensin efectu, al nun haber llugar a multa dala.

Representantes de la Xunta pola Defensa de la Llingua mantuvieron a primeros d’avientu una xuntanza col delegáu del Gobiernu, el socialista Antonio Trevín, p’analizar los espedientes abiertos contra los participantes na fuelga de la Secundaria, que convocó Xunta Moza pola dignificación de la enseñanza d’asturianu y cuyu actu central foi una concentración énte la conseyería d’Educación, n’Uviéu.

Amás, varios militantes asturianistes afronten inda una denuncia por “llanzar voces contra la comitiva del Gobiernu” con ocasión d’una visita a Cuadonga del presidente autonómicu, Vicente Álvarez Areces, traducida en multes individuales de 300 euros baxo l’acusación d’alterar la seguridá collectiva y orixinar desórdenes na vía pública.

Un total de 173 cursos, con precios ente los 9 y los 106 euros. La Universidá Popular de Xixón abre mañana’l plazu de matrícula pa la so nueva ufierta formativa y secunda’l cuartu centenariu de l’apaición de ‘El Quijote’ con sendos cursos sobro cómo lleer esa obra y el contestu de la dómina na que foi escrita.

Amás d’ello, la Universidá Popular xixonesa ufre una amplia bayura de cursos ente los que figuren monográficos d’horticultura, técnica ya interpretación d’instrumentos musicales, fotografía, recicláu de muebles, creación lliteraria, hestoria, ‘risoterapia’ y llingua asturiana, toos ellos con aniciu previstu a partir del prósimu 21 de febreru.

Con calter xeneral, la inscripción podrá formalizase nes dependencies alministratives de la Pescadería Municipal y nos centros municipales d’El Coto, L’Arena, La Calzada y Pumarín, n’horariu ininterrumpíu de 9 a 17 hores y cola esixencia de que quien solicite la so almisión nun cursu seya mayor de 16 años d’edá.

Amás, l’Ayuntamientu reservará un 25 por cientu de les places disponibles pa que puean ser cubiertes al traviés d’Internet, modalidá d’inscripción que requier pagu inmediatu y que quedará habilitada a primer hora de mañana, martes.

Llistáu de cursos y matriculación on-line

Un 73 por cientu de los futuros mayestros defende que la oficialidá ye necesaria pa regular l’asturianu nel sistema educativu, y un altu porcentaxe reconoz que’esi idioma tien un altu valir cultural. Son datos del estudiu ‘Les llingües n’Asturies: usu y valoración de la so importancia educativa’, qu’ayeri se presentó en públicu y que ratifica que los alumnos qu’estudien Llingua na escuela usen depués con profusión l’asturianu en sociedá.

Una conclusión que los autores de la investigación, Xosé Antón González Riaño y Xandru Armesto, entienden especialmente relevante, porque ye la primer vegada “qu’un estudiu fechu n’Asturies demuestra direutamente la rellación esistente ente deprendizax de llingua y usu social posterior de la mesma”.

Según les conclusiones de la investigación, que se centró nos alumnos de Maxisteriu de la Universidá d’Uviéu, estos futuros docentes reconócen-y un valir educativu “incuestionable” a la llingua asturiana: La mayoría piensa que los profesores con plaza nel Principáu han tener conocimientos d’asturianu y aboga por valorar de forma especial la llingua materna del escolín na escuela.

Magar d’ello, la mayor parte de los estudiantes de Maxisteriu emplega’l castellán como llingua habitual, anque un 82 por cientu de los encuestaos declara usar l’asturianu de forma ocasional, sobre too na familia y colos amigos. Sólo un 10 por cientu de los futuros mayestros utiliza la llingua asturiana de forma prioritaria.

A la lluz d’estos datos, González Riaño y Armesto proponen, ente otres midíes, que los estudiantes de Maxisteriu puean cursar Llingua Asturiana y Lliteratura, Sociollingüística y Didáutica de la Llingua pa impartir llueu de forma oficial l’asignatura d’asturianu en Primaria, y demanden más información pa los futuros docentes.

Guerra a les faltes d’ortografía. La Universidá d’Uviéu asoleya, en comuña con Ediciones Nobel, el llibru ‘Escribir sin faltas’, col que’l caderalgu de Llingua Española quier apurrir un manual qu’ayude a evitar testos incorrectos nes plumes y ordenadores de los universitarios y de los ciudadanos en xeneral.

El manual ortográficu, cuya presentación ta prevista pa les 20 hores de guei nel Aula Magna del edificiu hestóricu de la Universidá, allugáu na cai San Franciscu d’Uviéu, repasa a lo llargo de 263 páxines les principales normes de la escritura ya incorpora razonamientos nos que se-yos precisa a los llectores por qué les pallabres s’edifiquen d’una manera y non d’otra distinta.

Asina, el testu redactáu pol caderalgu Jose Antonio Martínez, director del departamentu de Llingua Española de la Facultá de Filoloxía de la Universidá d’Uviéu, dicta les riegles de la construcción de testos incorporando amás cuadros con resúmenes y curiosidaes pa facilitar la memorización de les normes, que según sucesives encuestes son cada vegada mas ignoraes por parte de los más mozos.

De fechu, la mocedá española asítiase a la cola d’Europa nel manexu de la escritura como vía esencial de comunicación: Un altu porcentaxe de xóvenes ye incapaz d’espresase correctamente por escrito y una tasa tamién abondosa nin siquiera ye quien a entender dafechu un testu depués de lleelu.

Ficha’l manual na web d’Ediciones Nobel

Como mínimu, un profesor de Llingua Asturiana en cada colexu o institutu. El voceru de l’Asociación de families pola escolarización n’asturianu, Arturu Xosé Bermeyu, plantegó-y esa demanda al conseyeru de Xusticia, Francisco Javier García Valledor, con quien esta mañana mantuvo una xuntanza n’Uviéu pa reclama-yos “voluntá” a les autoridaes del Principáu.

Asina, el collectivu de pas y mas representáu por Bermeyu entiende que ye urxente garantizar la presencia d’a lo menos un docente de Llingua nos centros d’enseñanza pa qu’a partir de setiembre nun haiga un solu estudiante que quiera cursar esa asignatura y nun puea facelo. Más entá, sostién l’asociación pola escolarización n’asturianu, cuando esisten institutos nos qu’hai clases d’otros idiomes optativos con sólo un alumnu.

“Con o ensin oficialidá, tien qu’haber voluntá ya interés”, argumentó Bermeyu darréu de mantener un alcuentru de 45 minutos con Valledor na sé de la Conseyería de Xusticia, Seguridá Pública y Relaciones Esteriores. Un grupu de pas y mas d’estudiantes de Llingua enzarrárense’l vienres pasáu nesi inmueble hasta algamar una cita pa falar col conseyeru, entrevista qu’a la fin prodúxose esta mañana.

Nel trescursu d’esi alcuentru, el titular de Xusticia escuchó les reivindicaciones de los representantes de l’Asociación de families pola escolarización n’asturianu y comprometióse a dar una rempuesta a les cuestiones que se-y plantegaron nun plazu ensin determinar. “Tamos en 2005 y nun s’avanzó nada na escolarización dende la dómina de Pedro de Silva”, censuró Arturu Xosé Bermeyu al finar la reunión, n’alusión al que fora presidente’l Gobiernu autonómicu ente 1983 y 1991.

El collectivu del que ye voceru Bermeyu empobinóse a García Valledor porque “trátase d’unos drechos de Xusticia y, amás, personalmente, el conseyeru diz ser defensor de l’asturianu”. El titular de la conseyería con competencies espreses na materia, la d’Educación, “non sólo nun me recibe sinón que manda deteneme”, precisó Bermeyu, qu’en setiembre pasáu foi deteníu depués de reclama-y una cita a José Luis Iglesias Riopedre na sé d’Educación.

Archivu. L’asociación pola escolarización n’asturianu algama una cita con Valledor depués de dos hores d’encierru