Educación

El Conseyu Escolar del Estáu español decidió que l’asturianu figurare nel informe añal qu’edita l’organismu asesor del Ministeriu d’Educación. La mención a la llingua nel informe vien siendo vezu, anque como votu particular de la confederación estatal de STEs, na que ta’l sindicatu asturianu SUATEA. Sicasí esti añu algamóse que la mención a la esistencia de la enseñanza de la llingua asturiana nun fuera un votu particular sinon del conxuntu. Tamién hebo una propuesta pa que’l Conseyu Escolar pidiere la creación de la especialidá d’asturianu pal profesoráu, que nun se pudo llevar alantre por namás ún votu.
El Conseyu Escolar del Estáu ye un organismu consultivu que fai informes al Ministeriu d’Educación de cara a les polítiques d’enseñanza, nelli tán representaos dende los sindicatos educativos, d’alumnos, alministraciones y representantes del enseñu público y privao.

Los díes 24, 25 y 26 de payares el Conseyu de la Mocedá d’Uviéu fadrá una nueva edición de la escuela de formación asociativa uvieína. Nesta vegada’l Conseyu de la Mocedá d’Uviéu fae una apuestas poles actividaes práctiques nos 9 talleres que van desenvolver les diferentes xeres de la Escuela d’Alderique.
El plazu pa facer la matrícula nesta Escuela d’Alderique ye’l 20 de payares a les 14,00 hores, pudiendo facese nel Conseyu de la Mocedá d’Uviéu como nel Conseyu de la Mocedá d’Asturies.
Los talleres que se van ufrir nesta VII son: Llinguaxe Inmobiliariu; “Yo quiero tener un millón d’amigos”. La Rede como movimientu social, Arakelando Art Caló (Falando’l Caló), Iniciación a la Llingua de Signos Española, Ready for English, Ready for Europe (Preparaos pal inglés, preparaos pa Europa), Desenvolviendo la llingua, El llinguaxe icónicu y feminista nel cómic, L’arte como llinguaxe, De la Radio al Podcasting.
Como actividá complementaria a la Escuela, el Conseyu de la Mocedá d’Uviéu propón el conciertu de Esmussein, La Debacle A.K.A, La Perdición & Buby.

Conseyu de la Mocedá d’Uviéu

SUATEA denunció la “irresponsabilidá del Ministeriu d’Educación y ciencia nel tratamientu de la relixón confesional y la so posible alternativa”.
SUATEA manifestó que polo que se ve del la información del Ministeriu d’Educación y Ciencia, l’alumnáu podrá elixir ente relixón, una materia aconfesional sobre la Historia de les Relixones o nenguna de les dos, esto ye, pal sindicatu educativu “pasar esa hora en compañía d’un profesor nel patiu, na biblioteca o, marchar pa casa”.
Dende’l sindicatu de mayestros y mayestres consideren que ye una “irresponsabilidá” poner una asignatura alternativa a la enseñanza relixosa porque contradiz la propuesta de que la relixón salga del curriculum escolar aporbada nel Conseyu Escolar del Estáu.
Contradiz tamién, según SUATEA, lo dictamináu pol Tribunal Supremu que prohibió una asigantura alternativa por ser “discriminatoria” pal alumnáu que, por cursar relixón, nun pue acceder a los conocimientos que s’imparten na asignatura alternativa.
SUATEA asoleyó’l so “total desalcuerdu” con esta propuesta y dio anuncia d’un recursu contra la esistencia d’un asignatura alternativa a la relixón. Dende SUATEA ficieron un llamáu al gobiernu pa qu’acepté les propuestes ellaboraes pol Conseyu Escolar del Estáu y a que “nun ceda entovía más a les presiones y el chantaxe de la xerarquí eclesiástica”.

El Programa “Cine na Enseñanza-Educación pa la Salú” pa esti cursu escolar entama en Xixón cola proyección de la película nos cines Centro. Esti programa de calter gratuitu, enmárcase nes actividaes preventives que ta promoviendo la Fundación Municipal de Servicios Sociales de Xixón nel marcu del Plan Municipal sobre Drogodependencies del Ayuntamientu de Xixón.
L’obxetivu d’esti programa, que yá se vien faciendo n’otros conceyos del país, ye emplegar el cine como un preséu lúdicu y motivador pa depués analizar les actitues y los conflictos que se presenten en caun de los llargometraxes mediante delles actividaes didáctiques tutelaes pol profesoráu, cola fin d’estimular la so reflexón crítica.
La idega ye sofitar a la mocedá a afrontar los sos problemes, activar soluciones creatives a les mesmes y facilitar el so desenrrollu integral como persones independientes.

Los presupuestos autonómicos de 2007 contemplen 138 millones d’euros pa la financiación de la Universidá asturiana. El rector de la Universidá asturiana, Juan Vázquez, valoró positivamente l’asiganción económica a la que se llegó depués de delles selmanes de negociación con José Luís Iglesias Riopedre, Conseyeru d’Educación y Ciencia. La partida que más medra ye la de los gastos corrientes y de personal que medra más de 9 millones d’euros hasta situase en 114,5 millones. Sicasí’l rector echó en falta una partida pa cubrir el patiu de la sé histórica de la institución académica.

El sindicatu educativu SUATEA denunció, en comunicáu de prensa, el pieslle d’unidaes n’Educación Infantil. El profesoráu afectáu, toos interinos ya interines, ta conociendo la supresión d’unidaes mediante una resolución de la Directora Xeneral de Centros na que s’aveza a dicir lo

“innecesariu d’un docente de sofitu o la fusión d’alumnáu de dos grupos colo que supón na calidá del serviciu públicu docente”. Asina mesmo SUATEA denuncia que’l procesu de reivisión de les unidaes educatives nos centros, desendolcáu pola Alministración educativa y qu’ha valir “pa planificar correctamente’l funcionamientu del sistema educativu, parez nun ser abondo polo que l’Alministración ta recurriendo al pieslle d’unidaes nes escueles públiques, y col despidu de los y les trabayadores contrataos en xunetu” . El sindicatu d’enseñanza considera qu’estes medíes adóptense pa compensar el desequilibriu económicu que supón la privatización d’una enseñanza non obligatoria nos centros privaos.
La selmana pasada’l sindicatu educativu fizo llegar al Conseyeru d’Educación, José Luís Iglesias Riopedre, un escritu nel que se denuncia la desapaición de la enseñanza de la llingua asturiana en dalgunos centros asina como la restricción nos horarios de los y les docentes qu’impedía la impartición d’esta asignatura.
Pal sindicatu estes aiciones de la Conseyería suponen una llaminación de los recursos públicos, na que siempres s’ataca al colectivu más débil o al menos conflictivu.

Distritu Oeste, de l’Agrupación Socialista de Xixón, va celebrar una charrar esti miercoles 4 d’ochobre, a partir de les siete la tarte, que lleva por títulu ‘El maltratu escolín. ¿Cuála ye la reali´da?’. Asina, l’Aula Polivalente del Ateneu de La Calzada va acoyer les desplicaciones de Miguel Badal, director del Colexu Públicu Federico García Lorda, Rosa Alvarez, miembru del Comite de SUATEA, Oswaldo López, miembru de CCOO y Orientador Social nel IES La Madalena d’Aviles, un representante de la UXT y Carmen Sánchez Alvarez, xefa del Serviciu d’Inspección Educativa de la Conseyería d’Educación, quienes van dar a conocer un problema llenu d’actualidá que, ensin esclusivu de la nuestra comunidá, cada día aterroriza más les escueles asturianes.

El Sindicatu Unitariu y Autónomu de Trabayadores de la Enseñanza d’Asturies (SUATEA) denuncia que los ‘sindicatos que dicen representar al personal empleáu públicu firmen, ensin consultar colos trabayadores, la baxada rial de los sos salarios’. La razón d’esta crítica de SUATEA vien por un Alcuerdu Retributivu pa los próximos tres años robláu ente l’Alministración del Estáu (Ministeriu d’Alministraciones Públiques) y los sindicatos UXT, CCOO y CSI-CSIF, nel que s’acuerda una xubida global pa esti periódicu d’un 3%.

La variación interañal del IPC, siguiendo la llinia de los últimos años, ta nel 3’7%, polo que SUATEA denuncia que con esti alcuerdu ‘el personal empleáu públicu va perder, esti añu, un 0’7% de poder alquisitivu, perdiga que se suma a les de los últimos años, acumulándose yá cerca de 10% de perdiga de poder alquisitivu nos últimos diez años’.

Dende SUATEA critícase la firma d’estos alcuerdos per parte de sindicatos que nun consulten a los sos trabayadores primero y reclamen la ‘cláusula de revisión salarial y la recuperación del poder alquisitivu pal personal empleáu públicu’.

Tres de les protestes de dalgunos sindicatos como SUATEA contra los ‘graves errores’ na baremación de la llista d’interinos, la Conseyería d’Educación decidió ayer el suspender la convocatoria selmanal de places. Anque l’Alministración negó nun primer momentu estos ‘errores’, ayer, na so negociación colos sindicatos, reconoció que les faltes nes puntuaciones de los opositores vinieron por nun baremase colos mesmos criterios les esperiencies docentes, de manera qu’agora va pasase a la revisión de toles llistes, aplicando un criteriu uniforme, que permita la espublización d’una nueva llista pal próximu martes.

Tres de les correcciones, ta previsto que sía esti vienres cuando s’espublice una nueva llista, abriendo asina un plazu de reclamación de diez díes y faciendo que, previsiblemente, el martes día 26 salga una nueva convocatoria.

Pesie a la rectificación d’última hora per parte de la Conseyería d’Educación, los sindicatos amosaron el so malestar pola publicación tardía d’un llistáu que puediere ser arregláu en tiempu, a la vez qu’amenazaron con recurrir les llistes y l’actuación del Principáu ente’l tribunal de lo Contencioso-Alministrativo si los errores siguen ensin correxir.

El sindicatu de profesionales de la enseñanza SUATEA desixó nun comunicáu la ‘paralización de la convocatoria y adxudicación de places en toles especialidaes convocaes a oposición n’Asturies’ mentes que nun s’arreglen los ‘graves errores materiales’ de les llistes provisionales d’interionos, nes que ‘munchos de los aspirantes tán mal baremaos, de forma y manera que nun va poder optar a les places ufiertaes’.

L’erru más grande denunciáu por SUATEA provocaría un cambiu sustancial nes llistes en casu de ser solucionáu. Asina, resulta ser que na baremación foi valorada de manera más favorable la esperiencia previa a aquellos aspirantes que nun se presentaron a les oposiciones d’esti branu n’Asturies. Ello quier dicir que ‘perxudiquen a los que prefirieron quedase n’Asturies respective a los que marcharon a otres Comunidaes o simplemente nun se presentaron’.

Pesie a que l’Alministración respondió a esta denuncia de los interinos asegurando que ‘nun lo consideren un erru, sinón que sólo aplicaron l’Alcuerdu sobre profesoráu interinu robláu coles Organizaciones sindicales ANPE y FETE-UXT’, SUATEA desixe la ‘paralización de la convocatoria asina como l’adxudicación de places en toles especialidaes convocaes a oposición n’Asturies en tanto en cuanto nun se resuelvan toos estos errores’, al tiempu que desixe a los firmantes de talu alcuerdu que ‘con calter urxente, tomen les midides necesaries pa da-y una solución xusta a les persones afectaes por esta grave situación’.