Educación

El sindicatu SUATEA, dio anuncia de les irregularidaes que se tán produciendo nel sistema asturianu d’enseñaza. Según el sindicatu esti cursu ta “fuera de la llei” pola mor de los recortes nes plantilles d’asturianu y gallego-asturianu. Piden que se cumpla la llexislación vixente y que nos currículos “se recueya esplicitamente’l nuesu patrimoniu llingüísticu y mentes nun lo faigan s’atiendan toles demandes”.

SUATEA denuncia qu'”Entamó’l cursu y la mayoría los centros nun ufiertaron al alumnáu d’infantil la enseñanza d’asturianu, munchos centros solicitaron ufiertar estes enseñances y dende’l Serviciu Inspeición, cola supervisión del Conseyeru, denegóse esta pitición”. Según esplica’l sindicatu les places ufiertaes de llingua en Primaria mermaron en 16 y cerca del 50% son a media xornada, lo que supón “una merma de la calidá de la enseñanza coles ratios al máximu en Primaria y la eliminación de l’atención al alumnáu d’Infantil en delles de les poquísimes escueles onde los y les escolines d’esta etapa recibíen enseñu de llingua, porque solo’l 12% del alumnáu d’Educación Infantil recibía’l cursu pasáu clases de Llingua o Gallego-Asturianu”, denuncien,

Amás protesten tamién pola situación de la Educación Secundaria y Bachilleratu de “llaceriosa” al ser non solo voluntaria sinón tamién optativa, contraviniendo asina la Llei d’Usu.

La Oficina de la Llingua Asturiana de Xixón presentó esti llunes nel IES Fernández Vallín, l’Axenda Escolar 2010-2011, dedicada a la diversidá llingüística, yá qu’ési ye l’Añu Internacional d’esta cuestión. Na presentación participaron el conceyal de Política Llingüística, Jesús Montes Estrada; la responsable de la Oficina Municipal de la Llingua, María Xosé Rodríguez López; la directora del IES Fernández Vallín Mercedes Morán Díaz; y l’autora de los testos de l’axenda, María Ángeles González García.

Les ilustraciones de l’axenda son de Lupe Sabugo y va repartise ente los maestros del conceyu de Xixón y los cuasi 700 alumnos matriculaos en Llingua Asturiana en Secundaria y Bachilleratu nos centros escolares del Conceyu.

L’equipu de gobiernu de la Universidá d’Uviéu anunció yá la fecha de la celebración de les elecciones al Claustru, máximu órganu de la institución, que renueva representantes estudiantiles. Sedrá’l viniente 4 de payares y en total van escoyese 72 representantes ente los estudiantes de grau máster o de primeru y segundu ciclu, amás de trés más ente los de doctoráu o tecer ciclu.

Nes elecciones caberes, celebraes en 2008, el Conceyu Universitariu pol Asturianu fízose con dos representantes, mientres Fai! consiguió unu. A estos representantes asturianistes súmense dellos profesores más, como Ramón d’Andrés o Xosé Antón González Riaño, ente otros.

Más información sobre la convocatoria d’elecciones

Según informó’l Conseyeru d’Educación y Ciencia d’Asturies, Herminio Sastre, na enseñanza concertada, l’asignatura de llingua asturiana namás tien un seguimientu del 6,8% sobre’l total de matriculaos nesti cursu. El datu supón una xuba del 1,3 por ciertu con respectu al cursu 2008-09, pero sigue siendo una cifra bien baxa, teniendo en cuenta que’l 56,6% de los alumnos de la pública, van dar asturianu esti añu, con un puntu más que l’añu pasáu.

Pocos son los exemplos de colexos concertaos comprometíos col enseñu del asturianu. Unu de los más destacaos ye’l colexu San Lorenzo de Xixón, primeru en dar asturianu ente los concertaos, y anguaño con un porcentaxe cercanu al 100% d’alumnos matriculaos n’asturianu.

El Conseyeru refirióse tamién estos díes a la contratación de profesores n’asturianu, que recordó, nun se pue facer con places permanente “por nun esistir una titulación universitaria concreta”. Esto va camuar a partir d’esti mesmu cursu, col entamu de les titulaciones oficiales d’asturianu na Universidá d’Uviéu. Nun habrá yá escuses pa convocar les places con normalidá, dempués de más de 25 años d’asturianu nes escueles.

“Fuera de la Llei”. Asina diz SUATEA que se pue titular la película d’aniciu de cursu 2010-2011 en xeneral y particularmente no que cinca al enseñu de la Llingua Asturiana y Gallego-Asturiano. Y dizlo pidiendo facer alcordanza de que “l’artículu 10 de la Llei d’Usu diz que’l Principáu d’Asturies ha garantizar la enseñanza del bable/asturianu en tolos niveles y graos, respetando sicasí la voluntariedá del so aprendimientu. De cualesquier manera, el bable/asturianu ha ser enseñáu dientro del horariu escolar y va ser consideráu como materia integrante del currículu”.

Pa SUATEA, “entamó’l cursu y la mayoría de los centros nun ufiertaron al alumnáu d’EI, como ye prescriptivo, la enseñanza de Llingua. Ye más, munchos centros solicitaron ufiertar estes enseñances y dende’l Serviciu Inspección, cola supervisión del conseyeru, denegóse esta pitición. Más entá: nel ámbitu de los recortes nes plantiyes xustificaos pola “crisis”, les places ufiertaes de Llingua en Primaria mermaron en 16 y cerca del 50% son a media xornada. Estos recortes en personal tradúcense na merma de la calidá de la enseñanza coles ratios al máximu en Primaria y la eliminación de l’atención al alumnáu d’Infantil en delles de les poquísimes escueles onde los y les escolines d’esta etapa recibíen enseñanza de Llingua (solo’l 12% del alumnáu d’Educación Infantil recibía’l cursu pasáu clases de Llingua o Gallego-Asturiano). La situación de la Educación Secundaria y Bachilleratu ye llaceriosa. Los datos falen per ellos solos: solo 18 places xornada completa (16 menos que l’añu pasáu) y 46 a media xornada (71% del total). La merma de places en comparanza col añu pasáu ye de 8. El númberu d’alumnos d’estes etapes atendíos nesta aria solo yera del 18%. Esto ye consecuencia de la competencia del aria con otres al ser non solo voluntaria sinón tamién optativa, contraviniendo asina tamién l’artículu 10 Ll.Usu (“Pa los que lo escueyan, el so aprendimientu o usu nun podrá torgar que reciban la mesma formación y conocimientos n’igualdá de condiciones que’l restu del alumnáu”.); y la imposición de ratios mínimes de formación de grupos pa recibir enseñances del aria que choquen cola condición de voluntariedá y derechu fundamental regulaos pola nomada Llei”.

Nel comunicáu col qu’esti sindicatu saluda l’entamar del cursu, desíxese a l’Alministración: • Que cumpla la Llei d’Usu y respete los derechos llingüísticos del alumnáu. • Qu’acabe colos retayos nes plantiyes de Llingua Asturiana y Gallego-Asturiano. • Qu’igüe’l currículu d’Educación Infantil pa que recueya esplicitamente’l nuestru patrimoniu llingüísticu y que demientres nun lo faga s’atiendan toles demandes d’escolarización nesta etapa fundamental pal deprendimientu en xeneral y el llingüísticu en particular. • Qu’igüe’l currículu de Secundaria y Bachilleratu (contrariu a la Llei d’Usu) y que demientres nun lo faga s’atiendan toles demandes d’escolarización. • Que salga del territoriu FUERA DE LA LLEI

El Bloque por Asturies denuncia’l procesu de retayos que sufre la educación pública en Asturies: el retayu salarial de profesores y profesores percima inclusive de lo marcao pol Gobiernu de Madrid, los retayos n’empléu y los retayos na atención educativa. Resulta evidente que, la precarización y l’empeoramientu de les condiciones llaborales, xuntu con un aumentu del alumnáu y un descensu del profesoráu, trai una perda de la calidá na atención educativa.

El Bloque por Asturies denuncia’l brutal aumentu de les medies xornaes ente’l profesoráu y el descensu de contrataciones, marcando una sienda de precarización llaboral y falta de personal docente pa l’atención de la diversidá, desdobles, llaboratoriu, programes educativos,… Cola supresión de programes educativos, sumen los horarios de biblioteca, el programa lectivu d’horariu de tarde, el sofitu a les nueves tecnoloxíes, los comedores escolares y amenórgase l’atención a la orientación educativa.

El Bloque por Asturies denuncia’l procesu d’esmantelamientu imparable de la enseñanza pública al traviés de la esternalización cada vez mayor de servicios, como informática o comedor, y pol caltenimientu de los conciertos educativos.

El Conceyu Universitariu pol Asturianu (CUPA) amosó otra vegada al traviés d’un comunicáu, como yá fizo nel mes de mayu, el so “descontentu” cola dirección de la Casa de les Llingües de la Universidá d’Uviéu pola falta d’ufierta de cursos d’asturianu dende l’entamu de la so actividá, va yá cuasi un añu y mediu.

El CUPA recuerda que Vicente Gotor, Rector de la Universidá d’Uviéu, “prometiere que la Casa de les Llingües diba incluyir nel so programa cursos de llingua asturiana”, un serviciu que, recuerden, “ufriéndose embaxo demanda nun tendría nengún gastu estraordinariu pa la Universidá d’Uviéu”.

Pal Conceyu Universitariu pol Asturianu “ye’l momentu de que la Casa de les Llingües apurra a los alumnos cursos d’asturianu” y animen a la institución universitaria a qu’usen la nuesa llingua “de forma normal”. Como exemplu, el CUPA pon la páxina web de la Casa de les Llingües, que dicen ye “una de les poques de la Universidá d’Uviéu que nun ufierta versión n’asturianu, dempués de la renovación del portal uniovi.es”.

El vienres entregáronse los diplomes de la Universidá Asturiana de Branu (UABRA) nel Aula Magna de la Universidá d’Uviéu. Nel actu participaron el Conseyeru d’Educación y Ciencia d’Asturies, Herminio Sastre, el Rector de la Universidá d’Uviéu, Vicente Gotor, la Presidenta de l’Academia de la Llingua Asturiana, Ana Mª Cano González, y l’Alcalde de Cangas del Narcea, José Manuel Martínez. Asturnews ufre semeyes de la entrega y de la espicha que se celebre darréu nel restorán el Yantar de Campumanes.

Semeyes de la entrega de diplomes en Facebook

Galería de semeyes de la espicha </a>

Con un discursu en llingua asturiana, como vien asocediendo davezu dende qu’añgamara’l Rectoráu de la Universidá d’Uviéu y participa nun actu que cinque a la llingua asturiana, Vicente Gotor peslló oficialmente’l programa d’actividaes de la Universidá Asturiana de Branu (UABRA).

L’actu desendolcose estu vienres 10 de setiembre, a les 19 hores, nel Aula Magna de la Universidá d’Uviéu (c/ San Francisco) y cuntó con una bultable asiastencia d’alumnos y profesores de los cursos que participaron depués nuna espicha.

Nos cursos que componíen esta primer edición de la Universidá Asturiana de Branu participaron más d’un centenar de persones nos niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, Cursu de Capacitación pa la Traducción al Asturianu, los Cursos d’Afondamientu Cultural y Llingüísticu Internet y asturianu: aplicaciones socio-educatives, Cursu d’averamientu a la llocución periodística en llingua asturiana, Cantares, bailles ya instrumentos musicales asturianos, La lliteratura asturiana nel aula d’Educación Primaria y Cursu d’aniciu a la investigación dialeutal, toponímica y de tradición oral y la segunda fase del Curso de Capacitación en Gallego-Asturiano.

A lo llargo del actu, que se fizo dafechu n’asturianu, intervinieron tamién la Presidenta de l’Academia, Dña. Ana Mª Cano González,l’alcalde de Cangas, D. José Manuel Martínez,el Conseyeru d’Educación, D. Herminio Sastre y, como ya mentáremos, el Rector de la Universidá d’Uviéu, D. Vicente Gotor.

El Conseyeru d’Educación y Ciencia del Principáu d’Asturies, el Rector de la Universidá d’Uviéu, la Presidenta de l’Academia de la Llingua Asturiana y l’Alcalde de Cangas del Narcea, piesllen oficialmente’l programa d’actividaes de la Universidá Asturiana de Branu (UABRA). L’actu va ser güei vienres 10 de setiembre, a les 19:00 hores, nel Aula Magna de la Universidá d’Uviéu (c/ San Francisco).

Nos cursos participaron más d’un centenar de persones nos niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, Cursu de Capacitación pa la Traducción al Asturianu, los Cursos d’Afondamientu Cultural y Llingüísticu Internet y asturianu: aplicaciones socio-educatives, Cursu d’averamientu a la llocución periodística en llingua asturiana, Cantares, bailles ya instrumentos musicales asturianos, La lliteratura asturiana nel aula d’Educación Primaria y Cursu d’aniciu a la investigación dialeutal, toponímica y de tradición oral y la segunda fase del Curso de Capacitación en Gallego-Asturiano.

A lo llargo del actu, que se fairá dafechu n’asturianu, intervendrán la Presidenta de l’Academia, Dña. Ana Mª Cano González,l’alcalde de Cangas, D. José Manuel Martínez,el Conseyeru d’Educación, D. Herminio Sastre y el Rector de la Universidá d’Uviéu, D. Vicente Gotor.