Los concertaos siguen siendo una torga pal enseñu de la llingua asturiana

Según informó’l Conseyeru d’Educación y Ciencia d’Asturies, Herminio Sastre, na enseñanza concertada, l’asignatura de llingua asturiana namás tien un seguimientu del 6,8% sobre’l total de matriculaos nesti cursu. El datu supón una xuba del 1,3 por ciertu con respectu al cursu 2008-09, pero sigue siendo una cifra bien baxa, teniendo en cuenta que’l 56,6% de los alumnos de la pública, van dar asturianu esti añu, con un puntu más que l’añu pasáu.

Pocos son los exemplos de colexos concertaos comprometíos col enseñu del asturianu. Unu de los más destacaos ye’l colexu San Lorenzo de Xixón, primeru en dar asturianu ente los concertaos, y anguaño con un porcentaxe cercanu al 100% d’alumnos matriculaos n’asturianu.

El Conseyeru refirióse tamién estos díes a la contratación de profesores n’asturianu, que recordó, nun se pue facer con places permanente “por nun esistir una titulación universitaria concreta”. Esto va camuar a partir d’esti mesmu cursu, col entamu de les titulaciones oficiales d’asturianu na Universidá d’Uviéu. Nun habrá yá escuses pa convocar les places con normalidá, dempués de más de 25 años d’asturianu nes escueles.