Educación

La música de David Bowie, la evolución humana, el trabayu como protagonista lliterariu o les técniques arqueolóxiques pa recrear la vida de los antepasaos son dalgunes de les propuestes qu’esti cursu van analizar na Universidá d’Uviéu dientro de les Aules d’Estensión Universitaria. El periodu de matrícula empieza mañana nos seis primeres aules, qu’ufierten más de 460 places n’Uviéu, Xixón y Avilés. Les aules tán abiertes a tol públicu y l’axudicación de places va realizar por rigorosu orde d’inscripción.

El vicerrectoráu d’Estensión Universitaria y Comunicación ufierta de nuevu a la comunidá universitaria y la sociedá asturiana una innovadora propuesta d’aules con temátiques tan diverses como la ópera, el derechu, l’arqueoloxía o la lliteratura, a les que como novedá súmase esti cursu l’Aula de Pensamientu Científicu, con un taller sobre evolución. En toles aules participen destacaos especialistes de la institución académica asturiana y espertos en cada materia.

Les Aules d’Estensión Universitaria caltienen el modelu de los últimos dos años, qu’escuerre estender la cultura y la ciencia a tola sociedá. Les clases van empezar el próximu mes d’ochobre y dalgunos de los programes estenderánse tol cursu y otros van durar solo un cuatrimestre. Los alumnos de la Universidá d’Uviéu que completen dalgunu d’estos seminarios van poder llograr reconocencia de creitos ECTS.

La ufierta pa esti primer cuatrimestre de les AULES d’estensión universitaria

Izquierda Xunida de Cangas del Narcea va solicitar a la Conseyería d’Educación qu’esplique qué motivos llevaron a refugar una aula específica pa un neñu del conceyu que, con cuatro años, la única alternativa que-y ufierten ye incorporalu a una unidá na qu’el so compañeru más nuevu triplíca-y la edá (12 años).

Tratase del casu d’un pequeñu autista, Bruno, que la so madre consiguiera la so inscripción nel Colexu de La Puela Ayande, anque, más tarde, la Conseyería rectificóse el so decisión, al paez, dempués de que’l citáu centru educativu solicitara un profesor d’educación especial, pa evitar que’l pequeñu tuviera nuna clase con compañeros de muncha más edá.

IX de Cangas considera indispensable buscar una alternativa pa evitar que’l pequeñu vease quitáu d’una escolarización, tal que esixe la llei, normalizada y afecha a les sos necesidaes.

El voceru d’IX en Cangas, José Manuel Martínez González, criticó la falta de respuestes clares pa situaciones d’esti tipu y esixó una puesta respuesta que dexe garantizar los derechu del neñu.

“Atopamos que ye absolutamente inconcebible que dende’l Principáu d’Asturies, primero, diérase escolarización a un alumnu de Cangas de Narcea, a Bruno, que tien unos problemes d’adaptación para col restu de compañeros y dempués que s’eche atrás la Conseyería, dexando ensin escolarizar a un guah.e de Cangas del Narcea”.

Nos próximos díes, IX de Cangas, al traviés del grupu parlamentariu na Xunta Xeneral del Principáu, va solicitar información al Gobiernu sobre esti casu, con cuenta de que puedan adoptase les midíes necesaries pa garantizar la necesaria y obligatoria escolarización del pequeñu.

El Rector de la Universidá d’Uviéu, la Presidenta de l’Academia de la Llingua Asturiana, l’Alcalde de Cangas del Narcea y la Direutora Xeneral de Política Llingüística van pesllar esti xueves oficialmente’l programa d’actividaes de la Universidá Asturiana de Branu (UABRA). L’actu sedrá esti xueves 12 de setiembre, a les 19 hores, nel Paraninfu de la Universidá d’Uviéu, allugáu na cai San Francisco y va cuntar, como otros años cola participación del Rector de la Universidá que lleerá so discursu n’asturianu.

Nos cursos participaron más d’un centenar de persones nos niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, los Cursos d’Afondamientu Cultural y Llingüísticu Capacitación pa la Traducción al Asturianu, Xuegos y tradiciones populares asturianes, Escuela y anovaciones n’Internet, El Navia-Eo: espacio, cultura y futuro, Xestióon cultural n’Asturies: xestionando llingües y cultures, Asturies y la so historia recién: dende la Transición hasta güei y la primer fase del Curso de Capacitación en Gallego-Asturiano. A lo llargo del actu, que se fairá dafechu n’asturianu, intervendrán la Presidenta de l’Academia, Dña. Ana Mª Cano González, l’Alcalde de Cangas del Narcea, D. José Luis Fontaniella, la Direutora Xeneral de política Llingüística, Dña. Ana Mª Fueyo Llaneza y el Rector de la Universidá d’Uviéu, D. Vicente Gotor.

La coalición formada por IX, ICV-EUiA y CHA vieno acabante presentar 160 enmiendes parciales que tomen tol articuláu de la LOMCE tres un procesu de participación abiertu al conxuntu de la comunidá educativa. Les enmiendes plantegen una educación personalizada, integral ya inclusiva, pa ser desenvuelta n’igualdá y de una forma democrática que potencie la participación de tola comunidá educativa. Pa ello ye imprescindible que se motive al profesoráu y que cunte con un financiamientu públicu abondu.

Izquierda Xunida plantega que l’alternativa a la contrarreforma del Gobiernu del PP pasa por potenciar una Educación Público y laico, garantizar el derechu universal a la educación en condiciones d’igualdá y contribuyir al ésitu escolar de tol alumnáu.

El Grupu Parlamentariu d’IX, ICV-EUiA, CHA plantega un total de 160 enmiendes parciales al proyectu de Llei pa la Meyora de la Calidá Educativa (LOMCE), tamién conocíu como ‘Llei Wert’, que cinquen a la totalidá del so articuláu, tantu a la esposición de motivos como a les 93 cambeos que nel testu realizar a la vixente Llei Orgánica d’Educación (APONDERE). Güei, tres les socesives ampliaciones de plazu demientres el branu, conclúi’l plazu de presentación d’estes enmiendes a la contrarreforma educativa ensin concesiones” que supon la tamién conocida como ‘Llei Wert’, “que vamos tratar de parar hasta l’últimu momentu, tantu a nivel parlamentariu como na cai, en collaboración con tolos colectivos afectaos por ella”, asegura la diputada d’IX y vocera n’Educación, Caridad García Álvarez.

Un total de 5.162 estudiantes matriculáronse anguaño per primer vegada pa cursar un grau na institución académica asturiana, lo que supón casi 500 alumnos más de nuevu ingresu que’l pasáu cursu. D’esos 5 mil estudiantes, 223 son de los cursos d’adautación a los nuevos graos.

La Universidá d’Uviéu abre’l cursu académicu con casi 500 alumnos más de nuevu ingresu que l’añu pasáu. Un total de 5.162 estudiantes matriculáronse per primer vegada n’estudios de grau esti cursu, frente a los 4.665 del 2012.

L’añu académicu qu’empieza va ser el primeru nel que’l plan Bolonia va tar enllantáu en tolos cursos de los distintos graos qu’ufierta la institución académica (sacante Inxeniería de Civil, que se punxo en marcha hai solu trés años). L’adaptación al Espaciu Européu d’Educación va ser esti cursu plena nos 50 graos de la Universidá d’Uviéu, cola primer xeneración íntegra de graduaos que van salir de les sos aules.

La Universidá d’Uviéu espera caltener la so cifra global d’alumnos, que va rondar los 25.000. Los datos provisionales de matriculación cifren en 16.691 los alumnos que van cursar un grau na Universidá d’Uviéu. Per otru llau, tamién tán por axudicar les places vacantes en distintos graos, que se van otorgar por orde de solicitú hasta’l 30 de setiembre.

Amás, los planes antiguos n’estinción cunten con 3.857 estudiantes matriculaos que van completar los sos estudios de llicenciatura, diplomatura, inxeniería ya inxeniería técnica. La cifra d’alumnos en planes vieyos escai sustancialmente respectu al cursu pasáu nel que se matricularon nestos estudios más de 7.200 alumnos.

Al marxe de los estudiantes de grau y los matriculaos en planes antiguos, la institución caltien abiertu’l periodu de matrícula nos estudios de posgráu (másteres, doctoráu y títulos propios y formación continua) polo que la cifra esacta definitiva d’estudiantes de la Universidá d’Uviéu pa esti cursu nun se va conocer hasta dientro d’unes selmanes.

Dende SUATEA denuncien esti día que fallos graves nuna aplicación informática cola que’l Principáu fai les asignaciones telemátiques de les places d’interinos tan unviando al final de la llista a munches persones que tienen certificáu telemáticu de que ficieron les xestiones correctamente, lo que los manda darréu al paro.

Sigún la nota de prensa qu’asoleyara esta mana, SUATEA dizx que nos “atopamos con persones que teniendo’l so pidimientu impresu col so rexistru telemáticu grabáu correchamente fueron esaniciaos pol sistema y nun se-yos tuvo en cuenta’l so pidimientu. Estes persones tienen que tar sufriendo con impotencia como col so resguardu telemáticu válidu na mano l’Alministración arrampúña-yos el so puestu de trabayu y se enroca en nun solucionar el problema nun reconociendo’l problema técnicu. Nin siquiamente un inxenieru informáticu sería capaz de deducir, ensin más información qu’un impresu col rexistru telemáticu correctu y una pantalla na qu’amuesen grabaes correchamente toes los pidimientos, que’l pidimientu non esta grabada correchamente. Pos esto ye lo qu’espera l’Alministración de los sos docentes, que lleguen a esta deducción alegando unes mañes pa les nun tienen nin estudiao nin opositao”.

Dende SUATEA esixen a l’Alministración que, daes los defectos técnicos que presenta l’aplicación y la vulneración de les garantíes llegales, nun unvie al profesoráu que llevara a cabu un pidimientu telemáticu a la fin de la llista y que corrixa nel sistema de cara a los futuros pidimientos toes los defectos detectaos.

Namái que d’ésitu pue calificase’l Día de la Reciella que celebrose esti domingu primeru de Setiembre nel Muséu del Pueblu d’Asturies, entamáu pola asociación del mesmu nome. Una xornada festiva que cuntó con numeroses actuaciones musicales, como la de Nacho Fonseca na semeya d’al lláu, Petit Pop y otres, amás de xuegos tradicionales y otres actividaes cola llingua propia como vehicular.

L’asociación “Reciella: families pol asturianu” vieno acabante celebrar nel Muséu del Pueblu d’Asturies a lo llargo del domingu 1 de setiembre una xornada, enllena talleres, música y puestos culturales de diferente calter que tuvo lugar dende l’apertura de puertes del Muséu a les 11.00 hores de la mañana.

Toles actividaes empobinaronse a neños y neñes d’hasta doce años, no que correspondería coles etapes de la Educación Infantil y Educación Primaria. L’elementu común a toes elles yera l’usu del asturianu como llingua vehicular, usu que promueve l’asociación ente los más pequeños dende la so fundación hai agora un añu.

A les 12.00 no que que paecía una llagunina cerca d’un nucleu urbanu, La Güelga, la charca interna del Muséu del Pueblu d’Asturies, podemos pensar que nun hai muncho que ver, pero nun ye asina. El biólogu Vitor Melero y la maestra d’asturianu Montserrat Blanco -familia socia de Reciella dende la so fundación y pá y ma de Catuxa- ficieron ver esti espaciu con otros güeyos, nuna visita especialmente pensada pa que-y prestara a lo más pequeño de la casa. Dende los animalinos más grandes y visibles, los coríos, hasta lo más piquiñino que pue nun ser visible pa quien nun supiera mirar con procuru. Depués de que ver la charca Vitor y Montserrat tuvieron preparaes una manualidaes pa comentar lo que los neños y neñes taben acabante ver nuna actividá perguapa pa qu’entamen a deprender y disfrutar del nuestru entornu natural.

Olga Cuervo nun tien falta de presentación porque ye una de les artistes más valoraes y aclamaes nel panorama teatral asturianu y una referencia necesaria cuando falamos de cuentacuentos o de teatru infantil n’Asturies. A les 13.00 Olga regaló los sos “Cuentos pa tola familia”, que como bien diz el so nome, fizo disfrutar a la reciella y los mayores.

Amás de estes actividaes desendolcáronse dos talleres rellacionaos col traxe y el baille asturianu que tuvieron impartíos por Laura Fernández y Jorge López, ma y pá de Saul, una familia socia fundadora de Reciella. Laura y Jorge son dos persones vinculaes dende hai años al mundu de la música y el baille tradicional y anguaño son miembros de l’asociación de música y baille traidiconal Excelsior de La Pedrera. El primer taller de pela mañana tuvo como oxetivu que la reciella conoza’l traxe’l país polo que enseñaron les pieces del traxe y propunxeron delles manualidaes.

Nel segundu taller, el primeru de pela tarde, Laura y Jorge ficieron una aproximación lúdica con unes primeres nociones sobre’l baille asturianu pa que la reciella entame a practicar.

VAMOS CANTAR UNA… CON NACHO FONSECA

Falar de Nacho Fonseca ye falar de la música pa neños y neñes n’Asturies. De magar entamara nos 80 na escuela de Porrúa con Seliquín, siguiendo con tola so trayectoria como maestru na escuela de Lleres con Xentiquina, y con un bon fardaxu de grabaciones en llombu, Nacho Fonseca, xunto con tolos neñes y neñes que pasaren peles sos iniciatives, punxo la banda sonora a delles xeneraciones d’asturianos y asturianes. El domingu la xente presente nel Día de la Reciella diose’l luxu de contar cola presencia de Fonseca nun taller nel que pudo comprobase por qué tantos de los que foron neños y neñes alcuérdense con señardá d’un maestru que-yos tresmitió l’amor pola música y pola llingua asturiana.

Y darréu de l’actuación de Nacho Fonseca aportó Petit Pop, el grupu pa la reciella que yá mueve milenta seguidores y que ta faciendo una anovación del conceptu de música infantil alloñándose de los tópicos d’esti xéneru. Ún de los temes que nunca falten nos sos conciertos ye “Patu Pachu ye un coríu”, un cantar n’asturianu, pero’l domingu presentaron en primicia mundial como suenen el restu de los sos cantares na nuestra llingua.

La diputada del PP na Xunta Xeneral Susana López Ares anunció esti llunes la propuesta del so Grupu Parllamentariu que quier desixir al Gobiernu del Principáu un plan de beques pa estudiantes de la Universidá d’Uviéu y alumnos asturianos de la UNED, con una partida estimada nun millón d’euros.

López Ares afitó que’l PP sigue’l camín de comunidaes autonómiques gobernaes pol so partíu como Castiella y Llión o Galicia, onde tienen dende va dellos años planes complementarios, y esixe al Executivu asturianu que pase darréu “de les palabres a los fechos”.

La propuesta del Partíu Popular d’Asturies pasa por un plan plurianual pa los presupuestos de la Universidá d’Uviéu y un Plan d’Investigación ya Innovación nuevu. López Ares propunxo nesti sen lo importante de siguir l’exemplu de Castiella y Llión que tien alrodiu los cuatro millones d’euros p’aumentar el nivel de renta de les families y p’acceder a beques de matrícula y movilidá.

Ye una tendencia que l’INEM vien amosando en toa España dende l’entamu del año: la sositución pasu ente pasu de los contratos temporales a xornada compelta por contratos a xornada parcial involuntarios, pero esta selmana quedó afitáu tamién como’l proyeutu llaboral asturianu na educación pública. La Conseyería d’Educación del Principáu asoleyó esti martes la relación de vacantes empobinaes a docentes interinos, una ufierta de 245 places más que la publicada fai agora un añu, pero toes a media xornada, pesie a qu’inclúi epígrafes qu’en 2012 tuvieron qu’esperar hasta setiembre.

La citada medría produzse, en bona midida, a cuenta de les places de media xornada, que crecen en 250, según UXT, y en 101, según ANPE; entrín y non, les de xornada completa mengüen en cinco. En total, Educación publicó 2.165 vacantes: 1.365 a xornada completa y 800 a media xornada.

Comisiones Obreres y SUATEA concentráronse ayeri ante la see de la Conseyería en señal de protesta polo que consideren una precarización llaboral dafechu del colectivu de profesores, consecuencia de la proliferación de contratos de media xornada. Coles mesmes, consideren que’l volume de places convocaes pola Alministración rexonal «nun cubrir les necesidaes reales» de los centros educativos. Arriendes d’ello, decidieron realizar una nueva acción de protesta’l próximu día 30.

L’Asociación Xuvenil Estudiantes Progresistes (EP) encamentó ayeri a la conseyera d’Educación, Ana González, a poner en marcha midíes reales que garanticen la gratuidá de los llibros de testu como fai la Xunta d’Andalucía en llugar d’iniciatives “de cara a la galería”.

N’anunciando la conseyera la ellaboración d’un manual de bones práctiques que sirva de guía p’abaratar el costu de los llibros y que recueya les meyores iniciatives puestes en práctica na rexón, l’Asociación Xuvenil Estudiantes Progresistes (EP) dexó nidiu’l so enfotu en siguir los pasos d’Andalucía, onde la Conseyería d’Educación merca llibros cada cuatro años (períodu de vixencia de los manuales) y dexa la so tutela a los centros educativos, que los empresten mientres el cursu escolar a los estudiantes . “Un sistema qu’amás d’asegurar la gratuidá, supon un aforru a l’Alministración”.