Educación

Esti próximu llunes 28 de xunetu, a les 13 hores, nel Salón d’Actos de la Casa de la Cultura «Palaciu d’Omaña» de Cangas del Narcea, entamen los Cursos y les Actividaes Abiertes de la Universidá Asturiana de Branu (UABRA): proyeutu lleváu a cabu gracies a la collaboración ente l’Academia de la Llingua Asturiana, la Universidá d’Uviéu y el Conceyu de Cangas del Narcea.

Nel actu intervendrán el Vicerrector d’Estensión Universitaria y Comunicación de la Universidá d’Uviéu, Vicente Domínguez García; l’Alcalde del Conceyu de Cangas del Narcea, José Luis Fontaniella Fernández y el Direutor de los Cursos, Xosé Antón González Riaño.

Los Cursos y xeres complementaries desendolcaránse ente los díes 28 de xunetu y 8 d’agostu y nellos van participar más d’un centenar de persones.

Esti mesmu llunes, dientro de les Actividaes Abiertes d’esta edición de la UABRA, tendrá llugar la inauguración de la esposición «Sable. Una revolada pelos arenales d’Asturies » na sala d’esposiciones de la Casa de Cultura de la villa canguesa.

Esti añu hai convocaos, amás de los cursos elemental y avanzáu, el cursu de capacitación pala traducción, unu d’ecoloxía y otru sobre l’emplegu didáuticu d’Internet. El cursu básicu de llingua asturiana inclúi, con 60 hores llectives, un repás peles Normes ortografiques, la sociollingüística aplicada al casu asturianu, exercicios escritos, situaciones comunicatives escrites y orales, y un averamientu a la Lliteratura Asturiana.

Pela so parte, l’Avanzáu, col mesmu númberu d’hores, adiéntrase nel estudiu de la llingua asturiana estándar y la so presencia na sociedá de l’Asturies de güei, plantegando tamién situaciones comunicatives escrites y orales, más complexes, aspeutos de la cultura asturiana y de la Historia d’Asturies, un repás a la Lliteratura asturiana contemporánea y un pequeñu cursu de téuniques de creatividá lliteraria.

No que cinca a los Cursos d’Afondamientu Cultural y Llingüísticu, como cada añu va celebrase un cursu de Capacitación pa la Traducción al Asturianu, de 35 hores, del 28 de xunetu al 2 d’agostu, y embaxo la dirección de la decana de Filosofía y Lletres de la Universidá d’Uviéu, Cristina Valdés, y la collaboración de los profesores Xosé Lluis García Arias, Ana Mª Cano y Xosé Antón González Riaño. Nel cursu preséntense davezu los presupuestos teóricos que rixen la traducción a una llingua minoritaria, teniendo en cuenta, de mou especial, l’exerciciu de tornes de testos lliterarios y periodísticos y de testos llegales y científicos. Y a esto xúnese una sesión monográfica sobre estratexes de traducción ingles-asturianu.

El cursu dedicáu a les nueves tecnoloxíes va ser esti añu nes mesmes feches que’l de traducción y va titulase “Internet como recursu educativu y cultural”. Nes sos 35 hores va sirvir pa ufiertar nueves y prestoses posibilidaes pa que’l profesoráu de Llingua Asturiana d’Educación Primaria y Secundaria pueda acceder a los recursos qu’ufre la rede y pueda diseñar, llueu, xeres y actividaes d’aula pal deprendizax oral y escritu de la Llingua Asturiana. El so coordinador ye David Melendi y tendrá profesores como Xulio Berros y Xabiel García Pañeda.

El caberu de los cursos d’afondamientu lleva por títulu “Ecoloxía y Mediu ambiente y desenvolverase embaxo la dirección de Carlos Lastra.

La Universidá d’Uviéu vieno acabante dexar de llau la llingua asturiana otra vuelta abriendo una páxina en catalán, euskera y gallegu, pero non n’asturianu. Trátase del serviciu pa la consulta del archivu hestóricu de la entidá al traviés d’internet, onde puen escoyese delles llingües pa facelo, pero non l’asturiana, incumpliendo nuevamente la institución asturiana los sos Estatutos. La denuncia facíala esti martes el Conceyu Universitariu pol Asturianu.

La Universidá d’Uviéu anunciaba güei al traviés del so boletín diariu d’información “DUO”, la puesta en marcha d’un serviciu pa la consulta del archivu hestóricu de la entidá al traviés d’internet. Esti nuevu serviciu permite la consulta en catalán, gallegu, vascu y castellán, pero non n’asturianu.

Pal Conceyu Universitariu pol Asturianu “ye bien llamativo que la Universidá d’Uviéu ufra esti serviciu en toles llingües del estáu español menos na llingua propia d’Asturies, protexida polos propios estatutos de la universidá asturiana”.

Por ello, solicitaben esti mesmu martes pela mañana al Rector, Vicente Gotor, al traviés d’una carta unviada darréu, “qu’esti programa recueya tamién la posibilidá d’usar l’asturianu, como col restu de les llingües, y cumpla asina cola normativa de la Universidá d’Uviéu que recueye espresamente que naide podrá ser discrimináu pol usu del asturianu na Universidá, pa lo que ye preciso, y con un costu cero, qu’esti tipu de ferramientes tean disponibles n’asturianu.”

Páxina del Archivu de la Universidá

La moción del Partíu Popular que proponía que la Conseyería d’Educación ufiertara en Primaria les asignatures de Francés y Tecnoloxía como alternatives a Llingua asturiana y a Cultura Asturiana nel bloque de materies de llibre configuración foi refutada esti xueves nel Plenu de la Xunta Xeneral, colos votos en contra de PSOE, Foro Asturies ya Izquierda Xunida y un perestrañu votu d’UPyD que propunxo ufrir otres materies como alternativa a la llingua asturiana.

El refugu del PP a aceptar la enmienda de Foro Asturies, qu’aceptaba introducir la ufierta de Francés, pero nel bloque de materies específiques, compitiendo asina con Educación Artística, única asignatura que s’ufierta nesta área, y non con Llingua y con Cultura Asturiana, foi a lo postrero lo que más llamó l’atención. Sí aceptaron los populares la enmienda d’UPyD que plantegaba nun estremar ente cultura y llingua asturianes, ya incluyir la cultura asturiana como área tresversal del currículum. Ignacio Priendes dixi que nun se defende a la llingua asturiana protexéndola de competir con otres opciones que los padres pudieren deseyar, a lo que Manuel Peña, voceru d’educación de Foro Asturies, acusó al PP de ser el responsable de la polémica sobre la enseñanza de la llingua asturiana por nun aceptar la enmienda que yá presentara Foru a la Lomce pa incluyir un segundu idioma. Amás, acusó a UPyD de faer una llavadura de cara colos defensores del asturianu, porque na so opinión ufiertar otres materies como alternatives al asturianu perxudica la enseñanza de la llingua propia.

Les families del CP El Bosquín amosaben el so descontentu delantre la Conseyería d’Educación énte la falta de soluciones p’atender les necesidaes d’espaciu del comedor de la escuela. L’alministración empéñase en dar alternatives que, nin satisfacen a la comunidá educativa nin solucionen dafechu los problemes d’un colexu qu’aumenta cada cursu d’alumnáu y necesita de más infraestructures p’adaptase a la nueva realidá.

L’apuesta por una enseñanza pública nun paez ser l’oxetivu d’esta alministración que pieslla los güeyos y nun permite l’ampliación anque seya la escuela la que corra colos gastos.

SUATEA manifestaba esti día con un comunicáu so sofitu a estes movilizaciones y a tola comunidá educativa que lluche por meyorar les condiciones de la escuela pública.

Un total de 940 estudiantes van presentase otra vuelta a la convocatoria de les Pruebes d’Accesu a la Universidá d’Uviéu, esta vegada en xunetu. Los exames van empezar esti martes, 1 de xunetu, y van prollongase hasta’l xueves n’Uviéu (Facultá d’Economía y Facultá de Química), Xixón (Edificiu polivalente EPI de Xixón), Avilés, Ribesella, Cangas del Narcea y Tapia.

Los exames de la fase xeneral van empezar esti martes, a les 15.45 hores cola prueba de Llingua Castellana y Lliteratura. La fase específica va entamar el miércoles, 2 de xunetu, a les 15.45 hores con Física, Dibuxu Artísticu, Analís Musical, Xeografía y Griegu II. Les pruebes van acabar el xueves al mediudía. Les notes de la convocatoria de xunetu van facese públiques el martes, 8 de xunetu.

L’académica de númberu, Marta Mori d’Arriba, el presidente d’Iniciativa pol Asturianu, Inaciu Galán, y un representante del Conceyu Universitariu pol Asturianu, pesllaron oficialmente’l programa d’actividaes de los IV Cursos d’Asturianu en Xixón, entamaos por Iniciativa pol Asturianu, el Conceyu Universitariu pol Asturianu y l’Academia de la Llingua Asturiana. L’actu tuvo llugar esti xueves 26 de xunu a les 19 hores, nel Salón d’Actos del Conseyu la Mocedá de Xixón.

Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) entregaben ayeri los diplomes acreitativos de los IV Cursos d’Asturianu en Xixón, cola participación de los alumnos, que dieron llectura a dellos testos, l’académica de númberu y profesora de la Universidá d’Uviéu, Marta Mori d’Arriba, el presidente d’Iniciativa pol Asturianu y director de los Cursos, Inaciu Galán, y Javier Cubero, representante del CUPA.

El programa de los IV Cursos incluyó dos itinerarios nesta ocasión, un nivel básicu y un nivel II, participando más de cuarenta alumnos ente’l sistema presencial y los alumnos que lu ficieron dende fuera d’Asturies a distancia.

Los organizadores valoren mui positivamente esta esperiencia formativa que llega yá a la so cuarta edición, con más de 150 alumnos que pasaron peles aules de los mesmos dende l’añu 2011, cuando se punxeron en marcha. Nesta ocasión cuntóse con alumnos de fuera d’Asturies, nel presencial, como una alumna gallega que ta estudiando na Universidá d’Uviéu y quería volver pa la so tierra conociendo la llingua d’Asturies, amás d’otros alumnos dende Paraguái o Méxicu, onde cuatro miembros d’estremaes xeneraciones d’una familia de descendientes d’asturianos, siguieron el cursu pa deprender la llingua de los sos antepasaos. Ye vezu yá qu’asturianos emigraos más recién, por causes llaborales, sigan esti cursu dende otros puntos del mundu enteru.

Nos dos cursos de nivel básicu y nivel II participaron esti añu más de cuarenta persones, ente presencial y a distancia. A lo llargo del actu, entregaronse los diplomes y hebo intervenciones de dellos alumnos falando de la so esperiencia y de la so visión de la situación de la llingua asturiana, celebrando darréu un pinchéu nes mesmes instalaciones del Conseyu.

L’ésitu de la convocatoria garantiza qu’a la vuelta’l branu vuelva a convocase la que sedrá la quinta edición de los Cursos d’Asturianu en Xixón.

La campaña entamada esti xueves pola Asociación Reciella pa pidir a la Conseyería d’Educación que permita a los nuestros fíos y fíes exercer el derechu d’alfabetizase y conocer la llingua asturiana dende la educación Infantil, daqué que nesti momentu nun se-yos reconoz más que nunos pocos centros d’Asturies, lleva yá más de 1350 firmes y algamó 700 en pocu más de cuatro hores dende qu’entamara. Na campaña pidese tamién que se pongan en marcha les midíes oportunes d’inclusión nel curriculum, previsión de docentes y fomentu d’actitúes positives hacia la pacífica convivencia llingüística nel ámbitu educativu. La campaña pue firmase equí.

L’asociación Reciella (families pol asturianu) alvirtió esta mañana de que, como vien asocediendo nos últimos cursos escolares, les más de les escueles nun ufierten la opción d’asturianu na educación Infantil (3-6 años). En dellos colexos sí se sigue ufiertando l’asignatura voluntaria, que nel so día tuvo xeneralizada, anque cada cursu en peores condiciones.

Dende Reciella recuérdase la importancia de l’alquisición de les llingües n’edaes tempranes y de la discriminación que supon que los neños y neñes que tienen l’asturianu como llingua materna, nun puedan cursar l’asignatura hasta que nun entamen el ciclu de Primaria.

Nos últimos díes y coincidiendo col periodu de matrícula qu’acaba mañana vienres, un grupu numberosu de families, tantu asociaes a Reciella como non asociaes, amosaron la so esmolición por esta situación, especialmente porque la Llei d’Usu y protección del asturianu, establez que “el Principáu d’Asturies va garantizar la enseñanza del bable asturianu en tolos niveles y graos”.

Nesi sentíu púnxose a última hora de la mañana de güei xueves en marcha una recoyida de firmes per parte d’un grupu de families, que consiguió más de 700 sofitos en pocu más de 4 hores, y sigue creciendo de forma exponencial.

Pese a lo que prescribe la Llei de Promoción del Bable/Asturianu*, la ufierta de llingua asturiana na Educación Infantil nun ta xeneralizada en tolos centros educativos d’Asturies, y namás hai garantía d’acceder a la asignatura n’Educación Primaria (siempre, d’alcuerdu cola llei, en réximen de voluntariedá).

Les families que tenemos nel asturianu l’idioma de casa, y les que non teniéndolu, entendemos que la llingua ye una parte importante del patrimoniu asturianu, deseamos que los nuestros fíos y fíes tengan la oportunidá d’alfabetizase tamién nesta llingua, o deprendela, dende’l primer contactu cola escuela, na educación Infantil (3-6 años). Tamos convencíes qu’únicamente la convivencia ente les llingües falaes n’Asturies nun contestu formal, como ye l’escolar, va ser quien a acabar cola histórica marxinación que vivimos los falantes d’asturianu y gallego-asturianu na nuestra propia tierra. Queremos que los nuestros fíos y fíes aprendan a escribir y falar correctamente los dos idiomes, de manera que nel futuru puedan ser persones billingües a tolos efectos; cosa que, como aseguren tolos estudios internacionales sobre aprendizaxe tempranu d’idiomes, va facilita-yos sumar a estos dos, de manera normal, una tercera o cuarta llingua. Y tamién queremos que les persones que nun tienen l’asturianu como llingua materna puedan tener oportunidá de deprendela, ya que la llingua ye una parte perimportante de la nuestra cultura, a la que nun se-y puede negar accesu a ninguna familia.

Por too ello demandase-y a la Conseyería d’Educación que permita a los nuestros fíos y fíes exercer el derechu d’alfabetizase y conocer la llingua asturiana dende la educación Infantil, daqué que nesti momentu nun se-yos reconoz más que nunos pocos centros d’Asturies. Pa ello pidimos tamién que se pongan en marcha les midíes oportunes d’inclusión nel curriculum, previsión de docentes y fomentu d’actitúes positives hacia la pacífica convivencia llingüística nel ámbitu educativu. * “el Principado de Asturias garantizará la enseñanza del bable/asturiano en todos los niveles y grados, respetando no obstante la voluntariedad de su aprendizaje. En todo caso, el bable/asturiano deberá ser impartido dentro del horario escolar y será considerado como materia integrante del currículo”.

La campaña escontra la escolarización del asturianu pon n’evidencida la urxencia de la OFICIALIDÁ de la nuesa llingua nacional, y lo negativo de postures reformistes que pretenden algamar concesiones ensin drechos, pala formación política Andecha Astur.

“Énte la postrer campaña protagonizada polos avezaos seutores del aldeanismu españoleru, Andecha Astur quier denunciar una vuelta más “que la oficialidá de la llingua asturiana y tolos qu’ello acarreta, la so ensiñanza llóxicamente, ye un drechu internacionalmente reconociu y qu’ello enxamás nun representa una obligación nin una imposición, sinon la reconocencia d’unos drechos colleutivos”.

Ello asina, tamién quier “reivindicar qu’unos neños puean quedar ensin escolarizar na so propia llingua supón un auténticu atentáu escontra los sos drechos comu asturianos, y namás ye dable nuna situación d’anormalidá democrática comu la que carecemos n’Asturies, onde la nuesa llingua nacional non solo nun ta reconocía comu oficial, sinon que sigue siendo oxetu de represión sistemática dende la mesma alministración del Principado”. Andecha Astur non solo denuncia la perdeficiente situación d’escolarización del asturianu, cuantitativa y cualitativamente, sinon que “desixe la oficialidá comu garantía democrática y plantega un futuru prósimu cola escolarización 100% n’asturianu”. Per otru llau, diz que “esta postrer campaña provinciana pon n’evidencia lo enquivocao de les postures reformistes de quien plantega que ye dable algamar una situación democrática nel tarrén llingüísticu ensin oficialidá. Nun ye asina. Nun val un res algamar concesiones ensin drechos, porque nun se trata d’algamar 5 minutos o 5 hores más o menos na RTPA, non, de lo que se trata ye de ver reconocíos los nuesos drechos colleutivos, tamién nel tarrén llingüísticu”.

Tolo que nun seya oficialidá “ye enredar y perder el tiempu, faciendo’l xuegu más o menos voluntariamente a les polítiques xenocides del “Principado” nel so enfotu por facer d’Asturies un barriu de Madrid”.

Ante la presentación per parte del PP d’una iniciativa pa camudar la situación de la llingua asturiana na educación primaria, dende Compromisu por Asturies recuérdase que la situación actual d’indefensión, d’inseguridá xurídica y de precariedá de la llingua asturiana tantu nel campu de la enseñanza como n’otros, debese a la situación la que’l réxime bipartidista del PSOE y PP sometió a la llingua asturiana nos últimos 30 años.

Al impedir repetidamente la oficialidá del asturianu, con una insistencia que torgó que l’asturianu tea de pies d’igualdá con otres llingües del estáu, y cola consiguiente discriminación de los sos falantes, llegóse a una situación de gran vulnerabilidá, que nel casu de la enseñanza traduzse na falta d’una especialidá propia y l’ausencia total o parcial de la educación Infantil y Bachilleratu.

Compromisu quier dexar afitao nun omunicáu espublizáu esti día que “agora ye’l PP nel casu de la enseñanza, el que non contentu cola situación d’inferioridá con otres asignatures, al nun cuntar siquier con una especialidá propia, intenta dar otra vuelta de tuerca pa que el asturianu non solo nun se convierta nuna asignatura del curriculum como les demás, sinón que compita con otres, dando asina ales a la picaresca que se vien dando pa incumplir la llei especialmente en dellos centros concertaos”.

Pa Compromisu por Asturies, dempués de 30 años d’autonomía empobinada por PSOE y PP, nos que’l númberu de falantes d’asturianu recularon más que nunca na hestoria de la llingua, faise más necesariu que nunca un cambéu de réxime, y un relevu nos partíos sustentadores del bipartidismu que favorecieron esta situación, pa consiguir yá un marcu política d’igualdá llingüística, qu’asegure los derechos de los falantes d’asturianu y gallego-asturianu, y que va pasar necesariamente, por un cambéu na relación de fuerces y por arrequexar a los partíos que llevaron a Asturies a la situación actual, non solo nel campu llingüístico, yá que esti ye solo un síntoma más d’una situación xeneral qu’afecta a toa nuesa sociedá y que tien un importante reflexu na nuesa situación económico y social.

L’Academia de la Llingua Asturiana; los sindicatos de la enseñanza SUATEA, CCOO y FETE-UXT; les organizaciones de pas y mas d’alumnos como FAPA «Miguel Virgós» y FAPAS Xixón; la Xunta Estudiantil Asturiana; el Sindicatu d’Estudiantes; les asociaciones cíviques Xunta pola Defensa de la Llingua Asturiana, Iniciativa pol Asturianu y «Reciella (Families pol Asturianu)» faen responsable al Gobiernu del Principáu d’Asturies y a la Conseyería d’Educación de la regulación y el determín que se tome con respeuto al asitiamientu curricular de l’asignatura de Llingua Asturiana y entienden que l’alternativa ufiertada Llingua Asturiana/Cultura Asturiana constitúi yá una rebaxa de la situación anterior y un escenariu de mínimos minimísimos.

Darréu d’ello, toa decisión que vaya escontra esti escenariu ye inaceutable dafechu, tanto dende’l puntu de vista llegal como dende’l puntu de vista social y cultural. Les instituciones y organizaciones que sofiten esti documentu proclamen la so “belixerancia escontra cualesquier intentu de facer competir al asturianu con una segunda llingua estranxera o con cualquier otra materia que nun seya la de Cultura Asturiana y damos anuncia, tanto al Gobiernu como a la sociedá asturiana, de qu’actuarán en consecuencia con toes aquelles iniciatives sociales y ciudadanes que tean al so algame pa parar un desatín como’l que dende dalgunes instancies se pretende”.

La presidenta de l’Academia, Ana Cano, fizo de portavoz de tolos coleutivos representaos ellí y dió llectura al comunicáu conxuntu qu’asoleyaben esti día y que dicía que “llueu de l’aprobación de la LOMCE (Llei Orgánica de Meyora de la Calidá Educativa), con fecha 9 d’avientu de 2013, correspuende a les Comunidaes Autónomes afayar, dientro de les sos llendes competenciales, los conteníos de la mesma”.

Nel comunicáu dizse tamién que “al marxe d’otres consideraciones sobre’l valir y el nivel de consensu de la mentada llei, hai que reconocer que la disposición adicional trixésimo octava afitaba per primer vegada les posibilidaes educatives de les llingües propies non oficiales de les Comunidaes del Estáu español: «Aquelles Comunidaes Autónomes nes qu’haya llingües non oficiales con proteición llegal ufiertaránles, nel so casu, nel bloque d’asignatures de llibre configuración autonómica nos términos que determine la so normativa reguladora.»”

La situación actual, a pocos meses d’entrada en vixencia de la llei (cursos 1u, 3u y 5u d’Educación Primaria del próximu cursu académicu 2014-2015), ufría una perbona oportunidá pa meyorar los calces d’escolarización de la Llingua Asturiana n’aspeutos como A) númberu d’hores d’impartición selmanal (1,5 hores anguaño, situación dafechu insuficiente pal deprendizax de les competencies qu’esta enseñanza lleva inxertes); B) posibilidá d’usar l’asturianu con calter parcialmente vehicular pa trabayar conteníos d’asignatures como Ciencies Sociales o Naturales; C) allugamientu con calter verdaderamente voluntariu de la Llingua Asturiana nel currículu, acordies col marcu llegal; etc.

Poro, les organizaciones firmantes dicen constatar “que tamos énte una nueva oportunidá perdida darréu que A) la llingua sigue calteniendo una dedicación horaria difícilmente defendible dende’l puntu de vista pedagóxicu (1,5 hores a la selmana); B) nun hai previsión del so emplegu pa trabayar conteníos rellacionaos con aspeutos hestóricos, culturales, medioambientales, xeográficos, artísticos… de la Comunidá Autónoma; o C) pierde, en fin, el so calter de voluntariedá pa tresformase nuna materia optativa que compite colaCultura Asturiana, bloque de conocimientos que poles sos carauterístiques habría ser tresversal en tol currículu asturianu”.

Con ser lo anterior grave pal futuru educativu del asturianu, alcontrámonos agora con posicionamientos, ensin dulda minoritarios, non yá anti-pedagóxicos, sinón claramente de resistencia a l’aceutación del marcu llegal de referencia: LOMCE y Llei d’Usu. A lo que paez, determinaos sectores, a lo meyor desinformaos o a lo meyor conscientes del so facer, pretenden acabar cola escolarización de la Llingua Asturiana queriendo facela competir con otres materies como, por exemplu, la segunda llingua estranxera. La LOMCE dexaba la posibilidá d’encaxar la enseñanza d’una segunda llingua estranxera ensin competencia coles llingües propies de les comunidaes, fueren o non oficiales. Poro, plantegar nesti momentu un falsu discutiniu Llingua Asturiana/Llingua Estranxera ye namái una xida oportunista, malintencionada y tendenciosa pa desaniciar les curties posibilidaes que tien la escolarización de la Llingua Asturiana.

Darréu d’ello, toa decisión que vaya escontra l’escenariu llegal “ye inaceutable dafechu, tanto dende’l puntu de vista llegal como dende’l puntu de vista social y cultural”. Les instituciones y organizaciones que sofiten esti documentu proclamen la so “belixerancia escontra cualesquier intentu de facer competir al asturianu con una segunda llingua estranxera o con cualquier otra materia que nun seya la de Cultura Asturiana y damos anuncia, tanto al Gobiernu como a la sociedá asturiana, de qu’actuarán en consecuencia con toes aquelles iniciatives sociales y ciudadanes que tean al so algame pa parar un desatín como’l que dende dalgunes instancies se pretende”.

Esti vienres, a les 12 de la mañana, nel llar de l’Academia de la Llingua Asturiana, esta institución y delles otres sindicales, educatives y sociales amosaron la so posición alrodiu de la polémica xurdida esta selmana cola aplicación de la LOMCE, sobro’l currículu d’Asturies y la enseñanza de la Llingua Asturiana.