L’ALLA, sindicatos y asociaciones faen responsable al Principáu de cualaquier determín que nun faiga cumplir dafechu la Llei

L’Academia de la Llingua Asturiana; los sindicatos de la enseñanza SUATEA, CCOO y FETE-UXT; les organizaciones de pas y mas d’alumnos como FAPA «Miguel Virgós» y FAPAS Xixón; la Xunta Estudiantil Asturiana; el Sindicatu d’Estudiantes; les asociaciones cíviques Xunta pola Defensa de la Llingua Asturiana, Iniciativa pol Asturianu y «Reciella (Families pol Asturianu)» faen responsable al Gobiernu del Principáu d’Asturies y a la Conseyería d’Educación de la regulación y el determín que se tome con respeuto al asitiamientu curricular de l’asignatura de Llingua Asturiana y entienden que l’alternativa ufiertada Llingua Asturiana/Cultura Asturiana constitúi yá una rebaxa de la situación anterior y un escenariu de mínimos minimísimos.

Darréu d’ello, toa decisión que vaya escontra esti escenariu ye inaceutable dafechu, tanto dende’l puntu de vista llegal como dende’l puntu de vista social y cultural. Les instituciones y organizaciones que sofiten esti documentu proclamen la so “belixerancia escontra cualesquier intentu de facer competir al asturianu con una segunda llingua estranxera o con cualquier otra materia que nun seya la de Cultura Asturiana y damos anuncia, tanto al Gobiernu como a la sociedá asturiana, de qu’actuarán en consecuencia con toes aquelles iniciatives sociales y ciudadanes que tean al so algame pa parar un desatín como’l que dende dalgunes instancies se pretende”.

La presidenta de l’Academia, Ana Cano, fizo de portavoz de tolos coleutivos representaos ellí y dió llectura al comunicáu conxuntu qu’asoleyaben esti día y que dicía que “llueu de l’aprobación de la LOMCE (Llei Orgánica de Meyora de la Calidá Educativa), con fecha 9 d’avientu de 2013, correspuende a les Comunidaes Autónomes afayar, dientro de les sos llendes competenciales, los conteníos de la mesma”.

Nel comunicáu dizse tamién que “al marxe d’otres consideraciones sobre’l valir y el nivel de consensu de la mentada llei, hai que reconocer que la disposición adicional trixésimo octava afitaba per primer vegada les posibilidaes educatives de les llingües propies non oficiales de les Comunidaes del Estáu español: «Aquelles Comunidaes Autónomes nes qu’haya llingües non oficiales con proteición llegal ufiertaránles, nel so casu, nel bloque d’asignatures de llibre configuración autonómica nos términos que determine la so normativa reguladora.»”

La situación actual, a pocos meses d’entrada en vixencia de la llei (cursos 1u, 3u y 5u d’Educación Primaria del próximu cursu académicu 2014-2015), ufría una perbona oportunidá pa meyorar los calces d’escolarización de la Llingua Asturiana n’aspeutos como A) númberu d’hores d’impartición selmanal (1,5 hores anguaño, situación dafechu insuficiente pal deprendizax de les competencies qu’esta enseñanza lleva inxertes); B) posibilidá d’usar l’asturianu con calter parcialmente vehicular pa trabayar conteníos d’asignatures como Ciencies Sociales o Naturales; C) allugamientu con calter verdaderamente voluntariu de la Llingua Asturiana nel currículu, acordies col marcu llegal; etc.

Poro, les organizaciones firmantes dicen constatar “que tamos énte una nueva oportunidá perdida darréu que A) la llingua sigue calteniendo una dedicación horaria difícilmente defendible dende’l puntu de vista pedagóxicu (1,5 hores a la selmana); B) nun hai previsión del so emplegu pa trabayar conteníos rellacionaos con aspeutos hestóricos, culturales, medioambientales, xeográficos, artísticos… de la Comunidá Autónoma; o C) pierde, en fin, el so calter de voluntariedá pa tresformase nuna materia optativa que compite colaCultura Asturiana, bloque de conocimientos que poles sos carauterístiques habría ser tresversal en tol currículu asturianu”.

Con ser lo anterior grave pal futuru educativu del asturianu, alcontrámonos agora con posicionamientos, ensin dulda minoritarios, non yá anti-pedagóxicos, sinón claramente de resistencia a l’aceutación del marcu llegal de referencia: LOMCE y Llei d’Usu. A lo que paez, determinaos sectores, a lo meyor desinformaos o a lo meyor conscientes del so facer, pretenden acabar cola escolarización de la Llingua Asturiana queriendo facela competir con otres materies como, por exemplu, la segunda llingua estranxera. La LOMCE dexaba la posibilidá d’encaxar la enseñanza d’una segunda llingua estranxera ensin competencia coles llingües propies de les comunidaes, fueren o non oficiales. Poro, plantegar nesti momentu un falsu discutiniu Llingua Asturiana/Llingua Estranxera ye namái una xida oportunista, malintencionada y tendenciosa pa desaniciar les curties posibilidaes que tien la escolarización de la Llingua Asturiana.

Darréu d’ello, toa decisión que vaya escontra l’escenariu llegal “ye inaceutable dafechu, tanto dende’l puntu de vista llegal como dende’l puntu de vista social y cultural”. Les instituciones y organizaciones que sofiten esti documentu proclamen la so “belixerancia escontra cualesquier intentu de facer competir al asturianu con una segunda llingua estranxera o con cualquier otra materia que nun seya la de Cultura Asturiana y damos anuncia, tanto al Gobiernu como a la sociedá asturiana, de qu’actuarán en consecuencia con toes aquelles iniciatives sociales y ciudadanes que tean al so algame pa parar un desatín como’l que dende dalgunes instancies se pretende”.

Esti vienres, a les 12 de la mañana, nel llar de l’Academia de la Llingua Asturiana, esta institución y delles otres sindicales, educatives y sociales amosaron la so posición alrodiu de la polémica xurdida esta selmana cola aplicación de la LOMCE, sobro’l currículu d’Asturies y la enseñanza de la Llingua Asturiana.