Educación

La mengua horaria del profesoráu impidirá a alumnos y alumnes de bachilleratu cursar asturianu nesti centru sotrondianu, sigún cieno acabante de denunciar l’Asociación de Pás y Más del IES J.J. Calvo Miguel de Sotrondiu. Esta AMPA del conceyu Samartín del Rei Aurelio vien de dirixise a la Conseyera d’Educación denunciando qu’esa mengua d’horariu del profesoráu d’asturianu va a impedir al alumnáu de bachilleratu d’esti centru cursar l’asignatura de Llingua Asturiana.

Esti retayu ye de más de la mitá del horariu, y dende l’AMPA nun entienden que se prive d’estudiar asturianu a un alumnáu que lleva cursándolu dende Primaria, polo que consideren necesario caltener la ufierta de l’asginatura en toles etapes educatives. Pa l’AMPA, el tratu al asturianu nun puede ser marxinal, y menos cuando cunta con una demanda perimportante.

Esti llunes día 15 de setiembre taba previsto que se volvieran aconceyar los rectores de les universidaes españoles col Ministru d’Educación pa siguir desendolcando la reforma del sistema d’evaluación y acreditación del profesoráu. Y la Universidá de Huelva filtraba nes sos páxines web el borrador del Real Decretu pol que se modifica l’anterior RD 1312/2007 pa l’acreditación del profesoráu titular y de Cátedra. Como ya s’adelantare, el nuevu formatu ye cualitativu en llugar de cuantitativu y abre munches dubies sobre’l procesu. Asturnews ufre’l borrador completu del decretu.

El día 16 de setiembre abrese’l plazu pa matriculase nos cursos y talleres de la Universidá Popular correspondientes a la segunda ufierta del añu 2014 que se presentaben esti día en Xixón cola participación de Carlos Rubiera, Conceyal de Cultura, Educación, Mocedá y Festexos, y Liliana Fernández-Peña Vega. Xefa del Departamentu d’Universidá Popular. A partir del próximu 8 d’ochobre van dar empiezu los cursos incluyíos na nueva programación de la Universidá popular pa esta seronda-iviernu.

Son más de 170 cursos y talleres, ente los que s’inclúin 35 nueves propuestes que se suman a les más estables y habituales. Tratar de cursos tan variaos como Programación de página web pa dispositivos móviles, Multiplicación d’especies vexetales, Curiando a quien curien, Técniques de concentración y atención plena: mindfulness, República Checa y la so cultura, El cine que ganó la guerra fría, Síntesis modular con Reaktor, Reciclaje artísticu aplicáu al grabáu o Virtuosismu y fe na música clásica, ente otros.

El nuevu programa inclúi tamién novedaes en locales no que cinca a los que se vienen impartiendo los cursos nes últimes ufiertes, al treslladase’l taller d’encuadernación al Centru de Cultura Antiguu Institutu y el de marroquinería al CMI Atenéu de La Calzada. Amás, incluyese por primer vegada programación nel Centru de Cultura Cajastur Muralla Romana, gracies a la firma d’un conveniu de collaboración col Atenéu Xovellanos.

Yá ta disponible’l nuevu folletu en formatu dixital xuntu col catálogu de condiciones y conteníos de cada unu de los cursos. A partir del 1 de setiembre va tar tamién disponible en papel en tolos centros municipales.

La Universidá Popular de Xixón ye’l Departamentu de la Fundación Municipal de Cultura encargáu de la educación permanente d’adultos (mayores de 16 años). La Universidá Popular de Xixón toma aspeutos claves como la educación pal ociu cultural, la formación profesional específica, la divulgación de nuevos llinguaxes artísticos o la potenciación d’actitúes flexibles antes los tresformamientos tecnolóxicu y social poles que traviesa la sociedá actual. Pa ello entámense diversos cursos y talleres de distintu temática y duración y en diverses zones de la ciudá.

Folletu en formatu dixital de los cursos

Na tercer xunta de la Mesa Sectorial d’Universidaes, celebrada esti xueves 11 de setiembre de 2014, na see del Ministeriu d’Educación apautose aplazar hasta ochobre’l discutiniu sobre los nuevos criterios d’acreditación del profesoráu a la vista de les enmiendes propuestes polos sindicatos y la CRUE. La revisión del Proyectu de Real Decretu de acreditación, coles pequeñes ya insignificantes enmiendes propuestes polos sindicatos y aceptaos pol Ministeriu foi la principal tema de la xunta, magar se trataren tamién cuestiones como’l concursu de tresllaos del PDI Funcionariu.

Xuntu coles enmiendes presentaes polos sindicatos, pola CRUE y otros organismos, la Mesaa Secotiral va axuntase de nuevu, con cuenta de tratar éstes y les que se propongan nuevamente per parte de los sindicatos na próxima Mesa, prevista pa esti próximu ochobre. Los sindicatos siguen calteniendo que lo verdaderamente importante d’esti Proyectu son los criterios d’evaluación que tienen de ser oxetivos, tresparentes y que dexen la autoevaluación de los interesaos como se facía hasta agora.

Tratóse tamién la propuesta del concursu de tresllaos del PDI Funcionariu, cuestión na que la representación siondical caltuvo les enmiendes presentaes na Mesa del pasáu 15 de xunetu de 2014, na qu’indicaba qu’esti concursu tendría de sirvir tantu pal treslláu horizontal como pa la promoción de los profesores titulares, ensin qu’esto nun contabilice na tasa de reposición. N’esti mesmu apartáu, la representación sindical continua calteniendo que se prevea la promoción interna nes Universidaes.

Otros temes que los sindicatos consideren importantes son la Tasa de Reposición, de la que nun se falón un res, la promoción Interna, la cuestión de les places impugnaes de titulares que salieren a concursu enantes de que se amenorgara dafechu la tasa de reposición y l’Estatutu del PDI.

Los sindicatos denuncarion na xunta que ye necesariu un reglamentu de funcionamientu de la Mesa Sectorial d’Universidaes y un calendariu de trabayu qu’asegure la continuidá nel tiempu. Y el Ministeriu amosose d’alcuerdu na continuidá de les xuntes pa tratar toles temes anteriores.

• Respectu a la tema de la Tasa de Reposición, el Ministeriu pidió una medría a un 50% del PDI, El Ministeriu de Facienda continua fixu nel 10%, pero puede ser que se supere esti porcentaxe. FETE-UXT cree absolutamente necesariu xubir esti porcentaxe del 10% del PDI y amás el del 0% de la PAS.

Esti día, nel Congresu de los Diputaos, el plenu aprobó la Llei de racionalización del sector públicu y otres midíes de reforma alministrativa, pola que se produz el cambéu de la ANECA de Fundación Privada a Organismu Públicu. Polo que se concentren nun únicu organismu toles funciones d’evaluación y acreditación del profesoráu universitariu, qu’hasta agora veníen desenvueltu la ANECA y la Comisión Nacional Evaluadora de l’Actividá Investigadora (CNEAI).

Izquierda Xunida anunciaba esti día la so “participación y activu sofitu” a la fuelga xeneral educativa propuesta por Comisiones Obreres pa los díes 21, 22 y 23 del próximu mes d’Ochobre. Facíalo al traviés d’Enrique Díez, coordinador de la Área Federal d’Educación, que denunciaba que “tamos nun estáu d’emerxencia educativa, ante una crisis educativa insostenible pa la calidá y equidad del sistema y el futuru del país que la implantación de la LOMCE va agravar”.

Izquierda Xunida, al traviés de la so Área Federal d’Educación, anuncia la so “participación y activu sofitu” a la fuelga xeneral de la enseñanza propuesta por Comisiones Obreres (CC.OO) Esta formación comparte que “resulta inevitable” movilizase esta seronda contra la Llei Orgánica pa la Meyora de la Calidá Educativa (LOMCE) y ante la crisis d’un sistema educativu que se sangra ante la cayida de la inversión, l’aumentu del alumnáu y l’amenorgamientu de profesoráu”, coincidiendo asina colos argumentos plantegaos pol sindicatu.

Enrique Díez, coordinador de l’Área Federal d’Educación d’IX, señala que “sobren razones pa llantar cara na cai a los retayos y reformes del PP en materia educación por aciu otra fuelga xeneral, dende Infantil hasta la Universidá”, como propunxeron los promotores de la movilización a les organizaciones escolares que componen la Plataforma Estatal en Defensa de la Educación Pública.

El Rector de la Universidá d’Uviéu, la Presidenta de l’Academia de la Llingua Asturiana y l’Alcalde de Cangas del Narcea piesllen oficialmente’l programa d’actividaes de la Universidá Asturiana de Branu (UABRA). L’actu sedrá mañana xueves 11 de setiembre, a les 19:00 hores, nel Paraninfu de la Universidá d’Uviéu (c/ San Francisco).

Nos cursos participaron más d’un centenar de persones nos niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, los Cursos d’Afondamientu Cultural y Llingüísticu Capacitación pa la Traducción al Asturianu, Internet como recursu educativu y cultural, Cantares, bailles ya instrumentos musicales asturianos y la segunda fase del Curso de Capacitación en Gallego-Asturiano.

A lo llargo del actu, que se fairá dafechu n’asturianu, intervendrán la Presidenta de l’Academia, Dña. Ana Mª Cano González, l’Alcalde de Cangas del Narcea, D. José Luis Fontaniella y el Rector de la Universidá d’Uviéu, D. Vicente Gotor.

La Universidá d’Uviéu ye la primer española en firmar un conveniu de collaboración cola Organización Europea pa la Investigación Nuclear (CERN). Dambes instituciones van potenciar la investigación nel ámbitu de la física fundamental, la matemátiques y l’inxeniería (software, mecánica, eléctrica, electrónica, de control y telecomunicaciones), sigún pudo sabese ayeri. El prestixosu llaboratoriu européu algamó alcuerdos de collaboración con una amenorgada llista d’universidaes en tol mundu y nel casu d’España la institución académica asturiana ye la primera y única universidá que suscribió un conveniu.

Dende va siete años la Universidá d’Uviéu y el CERN caltienen una collaboración constante, frutu de la cual más de 70 titulaos asturianos completaron yá estancies d’hasta 3 años nos llaboratorios de la Organización Nuclear Europea.

El rector, Vicente Gotor, robló esta mañana’l documentu marco del alcuerdu con vixencia d’otros cinco años al pie de Lluís Secundino Miralles Verge, director del Departamentu de Servicios d’Infraestructures del CERN. La vicerrectora d’Investigación y Campus d’Excelencia Internacional, Paz Suárez Rendueles, y el profesor Víctor Manuel González, coordinador del proyectu per parte de la Universidá, allegaron tamién a la firma del conveniu. Amás, la prestixosa institución científica, galardonada’l pasáu añu col Premiu Príncipe d’Asturies d’Investigación Científica y Técnica, escoyó la institución asturiana pa celebrar el pasáu abril el so primer Campus de Primavera n’España cola participación de 80 estudiantes.

En puertes del cursu escolar 2014/2015, La Semiente retoma la 3ª Campaña de Recoyida de Llibros y Material escolar. Nesta segunda fase, el centru social “La Semiente” asitiáu na Calle Eladio G.Jove Nº6 de L’Entregu, va proceder a entregar el material y los llibros pa los/les escolinos/escolines qu’asina lo reclamen, dende’l Martes día 9 de Setiembre fasta’l Vienres 19 del mesmu mes, n’horariu de 5 a 7 la tarde.

Amás d’esto, esti llocal autoxestionáu sigue recibiendo llibros de testu d’esti añu y del añu pasáu, de tolos cursos, escueles, institutos y colexos, tol material escolar que la xente yos pueda apurrir y tamién donaciones de perres pa faer llotes de material escolar.

Eso si, en “La Simiente” quieren facer alcordanza de que “nun ye obligatorio traer coses pa poder llevar, y que nun puen asegurar que tola xente tope lo que busca, asi cá ún/una qu’aporte lo que pueda y lleve lo que tope de lo que necesite”.

Por últimu, La Semiente quier da-yos munchisimes gracies “a toles persones que contribuyeron echando perres nes huches que se distribuyeron pela Cuenca y a los comerciantes y chigreros que les pusieron nos sos establecimientos”. Amás recuerden qu’eses perres “van revertir equí, ya que’l material escolar va comprase en pequeñes llibreríes y papeleríes de la zona, pequeñes por comparación colos grandes centros comerciales, pero mui grandes pola solidaridá y apoyu que nos van mostrando”.

Falten pocos díes pal empiezu de les clases nes escueles de Primaria y yá entamen los problemes de los centros pa poder cubrir toles sos necesidaes que’l sindicatu SUATEA nun comunicáu asoleyáu esti xueves denuncia que siguen ensin iguase: “nestos momentos vívense situaciones caótiques nes que la ellaboración d’horarios conviértese nun llaberintu ensin salida digna dende la perspectiva de la calidá educativa”.

Col amenorgamientu de personal y l’implantación de la nueva Llei d’Educación la organización de les sesiones de les distintes asignatures sobrecarga al profesoráu como nunca lo tuvo enantes. En dellos casos queden periodos llectivos de 30 minutos que tán siendo autorizaos dende l’alministración entá a sabiendes que nesi periodu de tiempu nun puen impartise conteníos con criterios pedagóxicos: “too val pa esta Conseyería con tal de caltener amenorgada la plantiya al máximu posible. Falar de desdobles o apoyos ye falar d’utopíes imposibles de poner en práctica quedando reducíes a papel moyao nos documentos oficiales”.

Como venía asocediendo dende fai dellos cursos, los alcuerdos de plantiyes siguen ensin cumplise pal sindicatu: “les tutoríes de Primaria cúbrense colos especialistes d’otres asignatures, los apoyos d’Infantil rellumen pola so ausencia y les ratios máximes -que tendríen de ser escepcionales- conviértense na norma xeneral”.

Con esti compendiu de problemes ye –otra vuelta- el profesoráu interín, “especialmente’l que ta a media xornada, quien sal más perxudicáu viendo cómo los sos horarios ellabórense rellenando los furacos que queden y acaben teniendo xornaes llaborales que riquen la presencia nel centru como si tuvieren a tiempu completu”.

Dende SUATEA quieren facer público “que, pesie a la insistencia de l’Alministración en negar los conflictos, nos centros educativos súfrense los retayos, les direcciones nun ven cubiertos los sos pidimientos, faise evidente la falta de personal y too ello va tener por fuerza consecuencies educatives. Nun puen resalvase les responsabilidaes de la Conseyería d’Educación. La educación nun pue ser oxetu de retayos”.