Convocatories

Los oxetivos prioritarios del programa “Culturaquí” son promover la creación artística de los xóvenes nes distintes modalidaes que conformen les artes plástiques, la lliteratura, la interpretación teatral, la imaxe y la música, fomentar la participación de xóvenes con inquietúes artístiques, y esparder estes manifestaciones culturales y artístiques tanto nel Principáu como n’otres Comunidaes Autónomes coles que se faigan intercambeos, asina como n’espacios europeos concertaos pala mentada fin.

Per primer vegada, nesta convocatoria puen participar descendientes hasta’l segundu grau d’emigrantes asturianos, lo que contribúi a una internacionalización del programa ensin renunciar a les bases d’asturianía sobre les que se sofitó’l plan dende la so creación.

“Culturaquí 2007” introduxo delles novedaes. La más importante foi la duplicación de la cuantía económica de los premios. Les otres fueron la creación de modalidaes nueves: los Certámenes de Graffiti y de Cómic, el Premiu “Asturias Joven de Interpretación Teatral “y el Premiu “Lab_Joven_Experimenta”.

“Culturaquí 2008”, que tien un presupuestu de 400.000 euros, caltién aquelles modificaciones ya incorpora, amás de la posibilidá de participación pa los descendientes d’emigrantes asturianos, dalgunes otres, como la fusión de los Premios “Asturias Joven de Textos Teatrales” y “Asturias Joven de Interpretación Teatral”. De fusión tala resulta’l nuevu Premiu “Asturias Joven de Textos e Interpretación Teatral”, que quier axustase en mayor midida a les espectatives que se xeneren nesti sector y dar meyor respuesta a les demandes de los artistes que se mueven na creación ya interpretación teatral. Asina mesmo, los ganadores del concursu de maquetes Pop-Rock van recibir un premiu de 2.000 euros.

Xunto a estes modificaciones, “Culturaquí 2008” recueye les convocatories habituales y que yá se convirtieron en cites estables pa los artistes asturianos mozos. Muestra rexonal d’Artes Plástiques. Establécense cinco modalidaes: Pintura, Escultura, Semeya, Grabáu ya Instalaciones. El tema, la técnica y materiales usaos son d’elección llibre. Los artistes seleccionaos van recibir un premiu en metálico de cinco mil euros y van facer una esposición conxunta na Sala Borrón: la Muestra d’Artes Plástiques del Principáu d’Asturies. Esta Muestra esponse amás en Sales d’Arte d’otres Comunidaes Autónomes al igual que n’espacios europeos. Nel marcu d’esta Muestra va fallase igualmente’l Premiu “Asturias Joven de Artes Plásticas: Artista Revelación”, que premia a un solu artista con un pagu en metálico de 12.000 euros, la esposición conxunta de la Muestra d’Artes Plástiques, y una esposición individual na Sala Borrón. Concursu de maquetes Pop/Rock. Está dirixíu a grupos o solistes intérpretes de música Pop y Rock. Selecciónense dos maquetes ganadores y los sos autores van recibir un premiu en metálico de 2.000 euros, que va conllevar la realización de dellos conciertos y la grabación d’un CD y un videu promocional.

Concursu rexonal de vídeos musicales. Los interesaos han presentar un videu basáu en dalguna de les canciones de les maquetes ganadores nel Concursu de Maquetes Pop-Rock. El premiu ye de diez mil euros.

Premiu “Asturias Joven de Poesía y Narrativa”. Empobináu a escritores de poesía y narrativa mozos. Establezse un premiu en metálico pa caúna de les dos modalidaes de seis mil euros y la espublización de la obra.

Premiu Nuevos Realizadores. P’aquellos proyectos de cortometraxes, de tema llibre, que se desendolquen en castellanu o asturianu y nun superen los 25 minutos de duración. Van dase dos premios en metálico de 26.000 euros y 14.000 euros. Los proyectos premiaos estrénense nel Festival Internacional de Cine de Xixón.

Premiu Astragal. Empobináu a proyectos específicos (instalaciones, videoinstalaciones, acciones, intervenciones y otros procesos creativos) fechos espresamente pa la Sala d’esposiciones del Centru de Recursos del Conseyu de Mocedá de Xixón. Establécense dos premios en metálico de 8.000 euros.

Certame xuvenil de cómics. El tema y técnica ye llibre y les viñetes puen tar escrites en castellanu o asturianu, en blancu y negru o en color. Van dase trés premios en metálico de 2.500 euros, 1000 euros y 500 euros.

Certame de Graffiti. Hai un primer premiu dotáu con 2.000 euros y hasta un máximu de cuatro accésit de 500 euros caún.

Premiu “Asturias Joven de Textos Teatrales e interpretación teatral”. Puen participar autores y grupos de teatru, que tienen de presentar un testu teatral orixinal ya inéditu y una propuesta d’interpretación del mentáu testu. El premiu consiste nun pagu en metálico de 10.000 euros y la representación de la obra.

Programa d’esposiciones de xóvenes artistes plásticos. Pue presentase cualquiera propuesta artística (pintura, escultura, semeya, instalaciones, videoinstalaciones…) con llibertá de tema, técnica y materiales. Como premiu, los seleccionaos tienen derechu a facer una esposición na Sala Borrón.

Premiu “Lab_Joven_Experimenta”. A títulu individual o al través d’un colectivu, pue optase a esti premiu por aciu d’un proyectu artísticu esperimental (instalaciones, instalaciones multimedia, acciones, intervenciones y cualesquier otru procesu creativu) concibíu específicamente pa la so instalación na Llaboral Centru d’Arte y Creación Industrial. La so dotación ye de 30.000 euros.

Bases completes

El Conceyu de Siero y al traviés del Conseyu Llocal de la Muyer, ta acabante convocar la octava edición de los Concursos de Fotografía, Audiovisuales, Poesía y Rellatos Curtios n’Asturianu.

El plazu pa presentase termina’l 31 de xunetu y tienen premios que tán ente los 450 y los 350 euros.

“Muyer y participación”, ye’l títulu que lleven estos concursos que tán empobianos a destacar la presencia de les muyeres na sociedá.

Bases completes de los premios

El Conceyu de L.lena abrió estos díes una llinia nueva d’ayudes, empobinada a financiar proyectos de las estayes de cultura y mocedá. Estes sovenciones van cuntar con un fondu de 13.000 euros financiaos a cargu del presupuestu del Gobiernu d’Asturies.

Les solicitúes van poder presentase hasta’l próxmu 30 de setiembre nes instalaciones del Ayuntamientu ensin imponese nengún llímite económicu. Una xunta va evaluar cada proyectu y decidir qué cantidá entregar a caún.

Los proyectos que soliciten sovención han ser publicitaos en castellán y n’asturianu. Amás, anuncien dende’l conceyu, p’aquellos colectivos non iniciaos nel usu del asturianu, l’Ayuntamientu pon a la so disposición el Serviciu de Normalización Llingüística de L.lena.

La Conceyalía de Cultura Tradicional y Llingua Asturiana del Conceyu de Gijón/Xixón, nel so enfotu de facer alcordanza de la figura de Don Federico González-Fierro Botas y la so querencia pola Llingua de nueso y la so normalización social, convocó nel mes d’abril la primer edición del Premiu d’Ensayu “Fierro Botas” que tien comu plazu final de presentación esti próximo 30 de xunu.

Esti premiu empobínase a aquelles obres d’ensayu, o trabayos d’investigación, nos que se recueyan los siguientes ámbitos: investigación sobre la cultura asturiana; investigación sobre la cultura rusa o eslava; la memoria social y colectiva de los pueblos ruso y asturoano; la memoria social y colectiva de Gijón/Xixón.

Bases del premiu

La Universidá Popular de Xixón va impartir esti branu un cursu de “Llingua asturiana: conversación”, col envís de xenerar un espaciu nel que puea prauticase l’asturianu al traviés del analís d’aspeutos orales del llinguaxe como la entrevista, la esposición o’l diálogu.

El cursu va impartise en xunetu tolos martes y xueves de 10.00 a 12.00 hores, con una duración total de 20 hores llectives. El plazu de matrícula zarrarase’l esti llunes23 de xunu. Más información na Páxina del Ayuntamientu de Xixón

El chigre de la Xunta pola Defensa de la Llingua Asturiana va acoyer mañana xueves a les 22 hores una actuación del monologuista Carlos Alba “Cellero”. La casa posafuelles, que ta asitiada na Cuesta la Vega d´Uvieu. L’actu va sirvir pa celebrar l´aniversariu del posafuelles.

L’autora valdesana va presentar el so poemariu “Pisadas”, premiáu pol Conceyu d’Uviéu y asoleyáu pola Academia de la Llingua Asturiana na coleición «Premios Uviéu» esti xueves 19 de xunu nel Salón d’actos del IES “Isla de la Deva” de Piedras Blancas.

Na presentación intervendrán Ana María Cano González, Presidenta de l’Academia de la Llingua Asturiana, Ángela Vallina de la Noval, Alcaldesa de Castrillón y Xosé Suárez Arias-Cachero “Felechosa”, Conceyal de Cultura del Ayuntamientu d’Uviéu.

La presentación del actu tará a cargu de Juan José Sánchez Navarro, direutor del Centru.

Mª Esther García naz en La Degol.lada (Valdés). Ye mayestra, llicenciada en Pedagoxía, Esperta en Filoloxía Asturiana y miembru correspondiente de l’Academia de la Llingua Asturiana dende 2002.

Güei martes, a les 20:00h, va facese la charra “Mayu del 68: Una hestoria ensin fin”, por Pepe Gutiérrez-Álvarez.

Gutiérrez-Álvarez ñació nel añu 1946 en Puebla de Cazalla (Sevilla), trasladándose la so familia -como tantes na época- a L´Hospitalet (Barcelona) nel añu 1960. Dio los sos primeros pasos como militante antifranquista nes Comisiones Obreres Xuveniles. Foi militante de la Liga Francesa ente 1968 y 1971, y fundador de la LCR nel Estáu Español. Nesti momentu ye miembru activu de la Fundació Andreu Nin, de Revolta Global, escribe en Kaos y n’otres páxines alternatives. Autor de biografíes de Trostky, Orwell y Mandela, acaba d’espublizar La cuestión Orwell (Sepha), y prepara otres ediciones, dalgunes d’elles sobre cine y hestoria.

Esti Certame d’artistes o grupos de cai ta organizáu pol Conceyu L.lena y va facese en La Pola, el sábado 5 de xunetu, nes fiestes d’El Corderu.

Puen concursar toos aquellos artistes o colectivos nos que polo menos ún de los componentes sea menor de 35 años, que desenvuelvan l’espectáculu na cai y con un conteníu que seya pa tolos públicos.

Cada obra o espectáculu ha tener una duración máxima de 30 minutos. Namás va aceptar una obra por artista o grupu. El plazu de presentación de solicitúes ye’l 18 de xunu. Va comunicase a tolos artistes o grupos la decisión del xuráu nun plazu de diez díes depués de la selección.

Les solicitúes han remitise a estes señes: I Certame d’artistes de cai en L.lena. Espaciu Mozu “Juvelena” C/ Ramón y Cajal s/n 33630 La Pola (L.lena) El grupu ganador seleccionáu va recibir un premiu únicu de 900 €. Van concedese un premiu al meyor espectáculu otorgáu por votación del gran públicu, consistente en 250 € y diploma.

Pa más información esiste un corréu juvelena@telefonica.net y el teléfonu 985 490 617

Bases completes

El Seminariu de Filoloxía Asturiana, coordináu por Ramón d’Andrés, organiza güei la presentación del llibru últimu de Juan Carlos Moreno Cabrera, Catedráticu de Llingüística Xeneral na Universidá Autónoma de Madrid. “El nacionalismo lingüístico. Una ideología destructiva” va presentase a les ocho la tarde nel Club de Prensa Asturiana, asitiáu na cai Calvo Sotelo 7 d’Uviéu.

Mañana xueves va celebrase’l segundu y últimu actu previstu con Moreno Cabrera, la conferencia “La llingüística y la diversidá de les llingües”. El Salón d’Actos de la Facultá de Filoloxía del Edificiu Alministrativu del Campus del Milán, n’Uviéu y de magar les once la mañana va acoyer la conferencia.

Juan Carlos Moreno Cabrera ye un destacáu especialista en llinguaxe y diversidá llingüística mundial, autor de dellos llibros de referencia na materia.

N’entrambos actos, primero del conferenciante intervenir fadrá una presentación Guillermo Lorenzo González, profesor de Llingüística Xeneral de la Universidá d’Uviéu.