Conceyos

La mancomunidá de la Comarca’l Sueve, formada polos conceyos de Piloña, Parres y Caravia, va cuntar en pocos meses con un nuevu serviciu de normalización llingüística que va xestionar toos aquellos aspectos rellacionaos cola promoción y usu de la llingua asturiana.

Según anunciaron la directora xeneral de Política Llingüística, Consuelo Vega, y l’alcalde de Piloña, Camilo Montes, nun actu celebráu esta selmana, “el serviciu va ponese en marcha na seronda” y cunta con una partida económica yá aprobada, de 12.000 euros.

Consuelo Vega recordó que’l Serviciu va xunise a la Rede de Normalización Llingüística “que yá llega a 664.500 asturianos”.

La sede va asitiasa nel pisu cuartu de la Casa Cultura de L’Infiestu y va complementar, según comentó l’alcalde, a otres actividaes como les Xornaes de Lliteratura Infantil en Llingua Asturiana o’l concursu de narraciones qu’esti añu llegó a la so segunda edición.

Embaxo’l lema “En Xixón, cada vez más necesarios”, l’agrupación xixonesa del Paríu Asturianista entama’l Congresu/Conceyu de l’Agrupación de Xixón a partir de les cinco la tarde nel salón d’actos de la Biblioteca Pública Xovellanos, asitiada na cai Xovellanos, 23. Nel congresu va renovase la dirección y van marcase les llinies d’actuación futures.

El Conceyu de Piloña abrió’l plazu pa presentar orixinales al II Concursu de Narraciones Curties n’asturianu. Los trabayos han d’unviase enantes del 12 de xunu a la Conceyalía de Cultura, asitiada na cai Cuadonga, 9, de L’Infiestu. Los cuentos nun puen tar espublizaos nin premiaos n’otros concursos. El llargor d’ellos nun sedrá menos de trés fueyes nin más de cinco, escrites per un llau namás, en lletra de cuerpu 12.

El primer premiu ta dotáu con 1.000 euros y el segundu con 700 euros. El periódicu El Fielato espublizará’l trabayu premiáu cuando lo xulgue oportunu, y queda atrocáu pol Conceyu de Piloña’l derechu d’espublizar los trabayos que resulten premiaos; tamién podrá asoleyar les obres non premiaes, siempre col alcuerdu de los sos autores. El fallu del xuráu va dase a conocer nos medios de comunicación la selmana del 12 al 19 de xunetu de 2009; los premios van entregase nun actu na Casa de la Cultura’l día 24 de xunetu, onde los premiaos tán obligaos a lleer la so obra en públicu.

El Boletín Oficial del Principáu d’Asturies espublizaba ayeri, 12 de mayu del 2009, el llistáu de los topónimos del conceyu de Degaña, talo que s’aprobaren nel Conseyu de Gobiernu del Principáu d’Asturies na so sesión del 22 d’abril.

Degaña conviértese asina nel conceyu númberu 38 cola toponimia oficializada.

Descarga l’espediente completu

L’Ayuntamientu de Colunga ta acabante convocar esti concursu nel marcu de les XII Xornaes del Sueve que se celebren en xunu. Les semeyes han reflexar cualesquier aspectu venceyáu col cordal del Sueve.

Los participantes han mandar les semeyes a la Casa Cultura solliñando nel sobre “Concursu FotoSueve´09”, a la carretera xeneral, s/n. Colunga, hasta l’1 de xunu próximu.

Los premios establecíos son de 150 y placa pal primeru; y100 € pal segundu, amás de cuatro accesits pa les meyores semeyes presentaes por residentes nos conceyos del cordal, Caravia, Colunga, Parres y Piloña.

Dempués del anunciu de los miembros nuevos del Conseyu Asesor de la Llingua Asturiana, que preside’l conceyal d’IX Jesús Montes Estrada, esta tarde a les siete y media, na Pescadería Municipal, va producise’l primer conceyu.

El llistáu de conseyeros inclúi a Xulio Ramos (Julia Moreira como suplente) pol PSOE, Humberto Gonzali (Manuel Pecharromán) pol PP, Roberto Colunga (Carmen Rúa) por IX-BA-Los Verdes, Consuelo Vega (María Antonia Pedregal) pol Principáu, Jordán Suárez (Santos Noguerol) pol Conseyu de la Mocedá de Xixón, Urbano Rodríguez (Vicente García Oliva) pola Academia de la Llingua Asturiana, Sabel Tuñón (Raúl Cachero) pola Federación d’Asociaciones de Vecinos, Xosé M.ª García (Xesús Cañedo) pola Federación «Les Caseríes» de la zona rural, Jorge Espina (Marcos Muñiz) por CC.OO., José Luis Llera (Begoña Díaz) por USO, Berto Cabreros (Alonso Martín) por SUATEA, Carmen Moreno (Lucía Roales) pola Unión de Comerciantes y Ricardo Álvarez (Inés Álvarez) pola Asociación d’Hostelería. Súmase tamién Ramón D’Andrés como espertu designáu pola Universidá d’Uviéu.

El Conceyal de Cultura Tradicional y Llingua Asturiana, Jesús Montes Estrada “Churruca”, va presentar güei xueves, a les 13:00 hores, na Sala de Prensa del Aytuntamientu de Xixón los materiales didácticos “Un día na zona rural de Xixón”.

Na presentación van participar Carmen Rúa Morán y Roberto Colunga, asesores de la Conceyalía.

La organización política Andecha Astur ta acabante de presentar nel Rexistru del Conceyu L.lena un escritu empobináu al Alcalde nel que-y da la norabona “por siguir l’exemplu del Conceyu de Cangas del Narcea y tomar el determín de valorar como méritu los conocimientos de llingua asturiana nes pruebes d’accesu a los puestos de trabayu que s’ufierten dende l’Ayuntamientu”. Y ye qu’esta organización política, comenten dende la mesma, “critica y denuncia les coses que se faen mal dende l’equipu gobiernu del Conceyu L.lena, pero tamién sabe reconocer y aplaudir les que se faen bien”.

P’Andecha Astur ye lóxico y normal que se valore positivamente la conocencia de la llingua asturiana a la hora de trabayar nuna Casa Conceyu dende la que se tien qu’atender a ciudadanos y ciudadanes que, según afita la llexislación vixente, “pero sobre too el sentíu común, tienen el drechu de rellacionase cola Alministración pública n’asturianu, si asina-yos peta”.

Nel escritu, amás de da-y la norabona al Alcalde y al so equipu de gobiernu, pídese-y “que nun ceda a les presiones, que son munches y siguirán siéndolo, y tire p’alantre col determín tomáu de valorar positivamente los conocimientos de llingua asturiana a la hora d’acceder a un puestu de trabayu na Casa Conceyu”.

La decisión tomada pol Ayuntamientu de Xixón d’instalar la Selmana Negra nun recintu ferial construyíu pa esi fin nel Campus de Viesques de Xixón, ta causando una importante polémica na ciudá. A la posición contraria amosada nun principiu pol Rector Vicente Gotor, súmense agora les voces de los vecinos, que planteguen una demanda contra l’Ayuntamientu, y de los estudiantes, que crearon el Colectivu Estudiantes contra la Selmana Negra (CECLASA).

Esti colectivu formóse cola intención de frenar la que creen ye “una decisión demencial, que va hipotecar la vida universitaria en Xixón pa siempres”. Una decisión del Ayuntamientu que dicen nun entender, yá que “meten nel campus xixonés una actividá que nada nun tien que ver cola vida estudiantil y qu’impide l’importante llabor investigador que se lleva a cabu nos edificios del Campus de Viesques”.

Los estudiantes que conformen el colectivu piden al Ayuntamientu de Xixón y al Gobiernu d’Asturies “que reconsideren la so postura y saquen del Campus de Viesques esti eventu”, que pa los universitarios tien “poco de cultural y muncho d’incomodidaes pa los estudiantes y vecinos de la zona”. El colectivu preguntáse tamién si “¿solo cambiará l’Ayuntamientu esta llocalización cuando haya una nueva sentencia xudicial como la que sacó a la Selmana Negra de la zona d’El Molinón?”.

Pa evitar a los xixoneses “los gastos xurídicos y les molesties d’una feria que debería ser lliteraria, pero que por una mala xestión se convierte nun llugar ensin llei, onde los problemes de seguridá son continuos”.

Les obres de construcción del recintu yá entamaron, pero los colectivos nun se rinden nel llabor de parar la celebración de la Selmana Negra nesti espaciu.

Dempués de l’aprobación del Plan de normalización llingüística pal trieniu 2009-2010 nel plenu del Ayuntamientu, los puestos que salgan a concursu nel mesmu, van tener en cuenta la formación en llingua asturiana, independientemente del trabayu a desendolcar. El PSOE votó en contra y José Luis López, voceru de la FSA en Cangas, recordó que “al nun ser l’asturianu una llingua oficial, la inclusión d’esa cláusula pue ser recurrible nos tribunales, yá que nun s’axusta a la regulación de la llei d’usu y promoción del asturianu aprobada polGobiernu rexonal”.

Pela so parte, l’alcalde José Manuel Martínez, aseguró que, por “complexos de provincianismu”, l’asturianun nun ye oficial, “restándonos financiación del Estáu en comparanza con otres comunidaes, como la cercana Galicia, que recibe fondos adicionales pa la promoción de la llingua”.

”Tenemos que ser consecuentes y discriminar positivamente a los empleaos municipales que dean respuesta a les demandes vecinales y aporten conocimientos d’asturianu”, a lo qu’añadió “eso nun significa que vaiga obligase a nadie a usar una o otra llingua”.

El Plan inclúi otres midíes no que cinca a la imaxe corporativa, páxina web, folletos turísticos, campañes de concienciación, usu del asturianu per parte de los ciudadanos cola alministración llocal, l’enseñu nes escueles o la toponimia, ente otres cuestiones.