Conceyos

El centru, que lleva’l nome de Tito Fernández, el popular cineasta nacíu en San Esteban, va agospiar toa triba d’actividaes culturales: conciertos, esposiciones, representaciones teatrales, conferencies y talleres. Tamién va ser la sede de la Escuela de Branu Rafael Altamira qu’organiza la Universidá Rei Juan Carlos I.

L’edificiu que va agospiar l’equipamientu cultural foi sometíu a una reforma fonda. Enantes d’entamar la intervención, l’antiguu templu de San Esteban presentaba delles patoloxíes qu’aconseyaben una restauración urxente. La primer fase de les obres consistió na consolidación de los elementos estructurales de la ilesia, calteniendo na midida de lo posible los mesmos criterios y materiales del diseñu primitivu. Primero, foi necesario adecuar y llimpiar l’entornu de la ilesia pa facilitar les tarees de restauración y depués fixéronse les demoliciones de les cubiertes y forxaos de madera y emprimó la reconstrucción de la estructura de madera de les cubiertes. Como elementu más innovador visible na intervención, incluyóse una escalera nueva d’accesu al coru fecha con elementos metálicos y de madera.

Esta primer fase desendolcóse nos años 2004 y 2005. Dempués, en 2007 entamó a trabayase na segunda fase, que consistió nel acondicionamientu del interior del edificiu pa habilitalu como espaciu cultural. Del mesmu mou, procedióse a acondicionar l’entornu y la parcela na que ta a llugada l’edificiu, d’accesos complicaos polos fuertes desniveles de les cais. L’oxetivu fundamental d’esta intervención, concluyida esti añu, yera dotar a la ilesia vieya d’unos accesos peatonales al traviés d’una escalinata de trazáu suave y cómodu, sofitada nel trazáu primitivu, al que quitaron los sos elementos más angostos ya incómodos.

El Conceyu de Parres ta acabante entrar nel llistáu de 40 conceyos qu’oficializaron yá la so toponimia, según afita la Llei d’Usu del asturianu de 1998. Les nueves denominaciones, aprobaes pola Xunta de Toponimia primero, pasen a tener la consideración de denominaciones oficiales.

20 conceyos más tienes abiertu’l procesu pa normalizar l’usu de la so toponimia tradicional al traviés de la so oficialización.

El Conceyu de L.lena dio anuncia estos díes de les nueves acciones que van entamar dende l’alministración llocal pa fomentar l’usu del asturianu. El conceyal de Política Llingüística, David Suárez, esplicó como a lo llargo de 2010 y col sofitu econnómicu del Gobiernu d’Asturies, van ellaborar un folletu turísticu coles fiestes del conceyu, van editar el segundu volume del CD de música tradicional y una campaña d’asturianu pa esparder el so usu ente los usuarios de los centros de salú.

Amás, van rotulase toles dependencies municipales, va facese una campaña pa neños, otra pal sector del comerciu y finalmente la quinta fase del procesu de retulación toponímica.

Nesi añu tán falten por ponese en marcha actividaes sobre educación sexual y primeros auxilios y ta ultimándose la documentación oficial de cara al públicu en billingüe, incluyendo sellos oficiales n’asturianu.

La toponimia del conceyu de Siero apaez yá oficializada nel BOPA. El Conseyu de Gobiernu aprobárela’l miércoles 29, convirtiéndose asina nel conceyu númberu 39 cola toponimia oficial segúnn lo afitao pola Llei d’Usu del Bable/Asturianu de 1998.

Ente los topónimos aprobaos tán los nomes de les parroquies d’Aramil, Argüeyes, La Carrera, Celles/Ceis, La Collá, Collao, Feleches, Granda, Hevia, Lieres, Llimanes, Llugones, Marcenao, Muñó, La Paranza, La Pola, Samartindianes, Samartino, Samiguel, Santa Marta, Santiago, Areñes, Santolaya, San Xuan del Cuto, Tiñana, Trespando, Valbona, Valdesoto, Viella y Santa Marina.

El testu completu pue consultase nel Boletín Oficial del Principáu d’Asturies.

BOPA col archivu completu

L’Ayuntamientu Quirós organiza una esposición de semeyes pa dar a conocer la presencia del conceyu en Burkina Fasso, pol mediu d’un proyectu de cooperación que se ta desenrrollando allí. Pue visitase na Casa de Cultura del 1 al 15 d’agostu, de martes a sábadu, de 11 a 14 y de 17 a 20 hores.

Un stand los Servicios de Normalización Llingüística nos Conceyos va tar presente a lo llargo de los díes que dura’l Festival avilesín Baltaine. El puestu va contener “una amuesa de lo que fuimos faciendo a lo llargo de los años”, según comenten los sos responsables de la Rede de Normalización Llingüística nos Conceyos, qu’axunta los servicios de tolos ayuntamientos y mancomunidaes que tienen estes oficines en funcionamientu.

L’Ayuntamientu d’Uviéu convoca una oposición llibre para cubrir cinco places d’ayudante de biblioteca. Esíxese diplomatura universitaria y el plazu de solicitú termina’l 3 d’agostu. Les bases tán nel BOPA de 23 de xunu.

Esti vienres 10 de Xunetu inaugúrase una nueva edición de los Alcuentros cola Cultura Tradicional d’Asturies de Colunga, que van durar hasta’l vienres 24 y al rodiu de que tan programaes una buena riestra d’actividaes de les que diremos informando.

De mano, pa esti fin de selmana va celebrase’l V Mercáu Tradicional nos Alcuentros, na Plaza l’Ayuntamientu, qu’inclúi puestos d’artesanía y productos agroalimentarios, complementáu con talleres d’oficios artesanales, actuaciones folklóriques, xuegos tradicionales y aiciones teatrales, amás d’un Festival de Canción Asturiana, el sábadu a les siete y media, nel que van actuar Faustino Braña, Laudelina Hortal y José Manuel García Álvarez, acompañaos a la gaita por Armando Fernández Robledo.

Durante tol tiempu que duren los alcuentros va tar espuesta na Sala Loreto la esposición “ANTONIO MEDIO, ACTOR Y BARÍTONU ASTURIANU”, una muestra compuesta por catorce paneles esplicativos al rodiu de la vida y obra d’esti artista xixonés, nacíu en 1912 y muertu en 1977.

Coincidiendo colos actos de la viéspora del Festival de la Sidra, ta programada, de güei martes día 7 al xueves 9 de xunetu, una exhibición de grafiti nes parés de la muria de la estación de Nava, na que dellos de los meyores grafiteros d’Asturies van “facer un poco más guapu a la vista pa en delantre esti requexu de la villa, complementando los murales que yá fechos n’años anteriores”.

Ta acabante d’abrise “El Solanu”, el nuevu blog del Serviciu de Normalización Llingüística de la Comarca de la Sidra, que según comenta’l so responsable, Pablo X. Suárez, “va dedicase a informar sobre les diferentes actividaes y proyectos del serviciu, amás d’esparder noticies d’actualidá rellacionaes cola Mancomunidá y cola llingua asturiana en xeneral”.

El nome del mediu “El Solanu”, amás de ser un llugar del conceyu de Nava, na parroquia d’El Remediu, ye una pallabra asturiana que, como sustantivu, vien definida nel Diccionariu Xeneral de la Llingua Asturiana como “Vientu caliente, del sur”, “Vientu del este” y “Sitiu onde da’l sol”. Como axetivu ye “soleyero”, “que da al este o al sur”, “orientao al meudía”. Nesti solanu, comenten dende’l serviciu “ñaz col sol tebiu d’esti branu de 2009”.

El Serviciu de Normalización Llingüística de la Mancomunidá Comarca la Sidra ye un serviciu d’asesoramientu públicu y de baldre destináu a facilitar l’usu del asturianu ente les persones, empreses, organizaciones, asociaciones, entidaes y alministraciones de la Comarca la Sidra. Ye una ferramienta a disposición de tola ciudadanía de la comarca y constitúi un preséu indispensable nel procesu de recuperación, dignificación y dinamización de la llingua asturiana.

http://elsolanu.nireblog.com/