Conceyos

La decisión tomada pol Ayuntamientu de Xixón d’instalar la Selmana Negra nun recintu ferial construyíu pa esi fin nel Campus de Viesques de Xixón, ta causando una importante polémica na ciudá. A la posición contraria amosada nun principiu pol Rector Vicente Gotor, súmense agora les voces de los vecinos, que planteguen una demanda contra l’Ayuntamientu, y de los estudiantes, que crearon el Colectivu Estudiantes contra la Selmana Negra (CECLASA).

Esti colectivu formóse cola intención de frenar la que creen ye “una decisión demencial, que va hipotecar la vida universitaria en Xixón pa siempres”. Una decisión del Ayuntamientu que dicen nun entender, yá que “meten nel campus xixonés una actividá que nada nun tien que ver cola vida estudiantil y qu’impide l’importante llabor investigador que se lleva a cabu nos edificios del Campus de Viesques”.

Los estudiantes que conformen el colectivu piden al Ayuntamientu de Xixón y al Gobiernu d’Asturies “que reconsideren la so postura y saquen del Campus de Viesques esti eventu”, que pa los universitarios tien “poco de cultural y muncho d’incomodidaes pa los estudiantes y vecinos de la zona”. El colectivu preguntáse tamién si “¿solo cambiará l’Ayuntamientu esta llocalización cuando haya una nueva sentencia xudicial como la que sacó a la Selmana Negra de la zona d’El Molinón?”.

Pa evitar a los xixoneses “los gastos xurídicos y les molesties d’una feria que debería ser lliteraria, pero que por una mala xestión se convierte nun llugar ensin llei, onde los problemes de seguridá son continuos”.

Les obres de construcción del recintu yá entamaron, pero los colectivos nun se rinden nel llabor de parar la celebración de la Selmana Negra nesti espaciu.

Dempués de l’aprobación del Plan de normalización llingüística pal trieniu 2009-2010 nel plenu del Ayuntamientu, los puestos que salgan a concursu nel mesmu, van tener en cuenta la formación en llingua asturiana, independientemente del trabayu a desendolcar. El PSOE votó en contra y José Luis López, voceru de la FSA en Cangas, recordó que “al nun ser l’asturianu una llingua oficial, la inclusión d’esa cláusula pue ser recurrible nos tribunales, yá que nun s’axusta a la regulación de la llei d’usu y promoción del asturianu aprobada polGobiernu rexonal”.

Pela so parte, l’alcalde José Manuel Martínez, aseguró que, por “complexos de provincianismu”, l’asturianun nun ye oficial, “restándonos financiación del Estáu en comparanza con otres comunidaes, como la cercana Galicia, que recibe fondos adicionales pa la promoción de la llingua”.

”Tenemos que ser consecuentes y discriminar positivamente a los empleaos municipales que dean respuesta a les demandes vecinales y aporten conocimientos d’asturianu”, a lo qu’añadió “eso nun significa que vaiga obligase a nadie a usar una o otra llingua”.

El Plan inclúi otres midíes no que cinca a la imaxe corporativa, páxina web, folletos turísticos, campañes de concienciación, usu del asturianu per parte de los ciudadanos cola alministración llocal, l’enseñu nes escueles o la toponimia, ente otres cuestiones.

El vienres 13 de febreru de 2009 publicáronse nel Boletín Oficial del Principáu d’Asturies (BOPA) los topónimos de los conceyos de Cangues d’Onís, Mieres y Sobrescobiu, talamente como fueron aprobaos pol Conseyu de Gobiernu del Principáu d’Asturies na so sesión del 4 de febreru. D’esti xeitu, los topónimos tradicionales d’estos conceyos pasen a ser los únicos oficiales.

Consulta los llistaos de topónimos completos

La Conceyalía de Cultura de Grau organiza esti certame añal venceyáu al premiu al “Pueblu Exemplar de Grau”. Cada añu va tener por tema de les semeyes la parroquia o pueblu que gane’l certame de Pueblu Exemplar. Nesti casu, el ganadro foi Sama, onde tienen que sacase les semeyes pa participar.

Consulta les bases completes del Concursu

Énte la iniciativa del conceyal de cultura Santos Fernandez sofitada tamién pol alcalde Gabriel Perez Villalta d’unviar una carta a los Príncipes d’Asturies convidándolos a visitar la estación d’esquí de Fontes d’Iviernu pa promocionar asina’l turismu nel conceyu, Andecha Astur alvierte al alcalde y al conceyal de cultura “que ye una mala idega porque nin como ayeranos nin como asturianos tenemos porqué rendir pleitesía a naide y muncho menos a una institución retrograda y antidemocrática como ye la monarquía española”.

A Andecha Astur “yá nun-y sosprende dende fai munchu tiempu que los cargos públicos del PSOE amuesen tan abiertamente’l so fervor monárquicu aunque sí nos prestaría a lo menos que nun trataren d’implicar a tolos vecinos na so amuesa de pleitesía a la Corona Española con frases como la que aparez na misiva: “nuestros vecinos acogerán con todo el cariño a Vuestras Altezas”.

Poro, Andecha Astur pide al alcalde del conceyu de Ayer “que rectifique retirando la invitación a los Príncipes d’Asturies unviándo-yos una nueva carta a la Casa Real Española y amás pide-y que respalde la moción d’Andecha Astur de declarar Ayer como Conceyu Antimonarquicu”.

Ayer yá tien, según AA “una enorme bayura paisaxística, natural, etnográfica y gastronómica que tien valor por sigo mesma y nun necesita d’esa visita “Real” que propón el conceyal Santos Fernandez pa da-y valor al potencial turísticu del conceyu”.

P’Andecha Astur la meyor forma de promocionar el turismu “ye’l respetu a esos valores naturales y paisaxísticos entamando pol sofitu municipal a la llucha los vecinos de Pel.luno escontra l’actividá de la cantera de Peña Castru que ta provocando un gran impautu ambiental nel entornu del pueblu de Pel.luno, a los pies de Peña Mea, una zona, por cierto, con un altu valor turísticu pal senderismu, la escalada y otros deportes de montaña”.

El BOPA del 12 de febreru convoca una plaza de técnicu de normalización llingüística, per un añu con posibilidá de continuidá, en casu d’haber financiación del Principáu.

La plaza va sacase a concursu-oposición ente los candidatos con un títulu universitariu mediu o superior y certificación de conocimientos en llingua asturiana, segun les bases.

El plazu de solicitú finaliza’l 27 de febreru.

Bases completes del puestu (BOPA)

L’Ayuntamientu de Xixón anunció yá los nuevos miembros del Conseyu Asesor de la Llingua Asturiana, que preside’l conceyal d’IX Jesús Montes Estrada.

El llistáu de conseyeros inclúi a Xulio Ramos (Julia Moreira como suplente) pol PSOE, Humberto Gonzali (Manuel Pecharromán) pol PP, Roberto Colunga (Carmen Rúa) por IX-BA-Los Verdes, Consuelo Vega (María Antonia Pedregal) pol Principáu, Jordán Suárez (Santos Noguerol) pol Conseyu de la Mocedá de Xixón, Urbano Rodríguez (Vicente García Oliva) pola Academia de la Llingua Asturiana, Sabel Tuñón (Raúl Cachero) pola Federación d’Asociaciones de Vecinos, Xosé M.ª García (Xesús Cañedo) pola Federación «Les Caseríes» de la zona rural, Jorge Espina (Marcos Muñiz) por CC.OO., José Luis Llera (Begoña Díaz) por USO, Berto Cabreros (Alonso Martín) por SUATEA, Carmen Moreno (Lucía Roales) pola Unión de Comerciantes y Ricardo Álvarez (Inés Álvarez) pola Asociación d’Hostelería. Súmase tamién Ramón D’Andrés como espertu designáu pola Alcaldía.

Cola publicación nel BOPA, l’aprobación de los topónimos tradicionales del conceyu de Mieres del Camín faise oficial dafechu y d’obligáu cumplimientu pa les instituciones públiques.

Gracies a esto Uxo, Figareo y munchos otros pueblos del conceyu reciben agora de manera oficial, la denomación que-yos dieron siempres los sos habitantes.

Llistáu completu de los topónimos oficializaos en Mieres del Camín

El concursu lleva por nome “Caleyando per Asturies”, y ye según los sos responsables “el típicu concurso d’entrugues y respuestes nel que dellos equipos van competir nuna lliga hasta la gran final”. La edá mínima pa participar nos equipos, qu’han represantar un pueblu o barriu, un cursu, una clas o un centru educativu, una asociación o un simple grupu d’amigos, son los 16 años.

Caún ha contestar 14 entrugues sobre Asturies, dende Xeografía y Hestoria, a Llingua y Lliteratura, pasando per Arte, Flora y Fauna, conceyu de Ribeseya, Gastronomía, Folclore y Deportes, amás de temes d’actualidá apaecíos nos medios de comunicación.

Les entrugues van facese n’asturianu, anque va cuntase con traducción simultánea. Caún de los componentes del equipu ganador van facese con una fin de selmana nuna Casa Rural de Somiedu.

El Conceyu de Xixón ta acabante sacar un calandariu, nuna edición de 1.000 exemplares, ilustráu con fontes y llavaderos del conceyu y glosáu por dellos escritores en llingua asturiana.

La Conceyalía de Cultura Tradicional y Llingua Asturiana xustifica esta publicación, que va ser distribuida gratuitamente, com un homenaxe a «l’elementu esencial y fundamental de la vida, l’agua». Elementu que marca’l pasu de los díes, selmanes y meses nel conceyu. La cultura del agua, al través de les imáxenes de seis de les fontes más emblemátiques de Xixón, con fotografíes de Pablo Armesto.

Ente los autores que ponen pallabres a cada mes tán Vanessa Gutiérrez. Marzu, Francisco Álvarez, Xuan Bello, Andrés Solar, Xandru Fernández o María Teresa González.