Conceyos

La Xunta de Gobiernu del Conceyu de Xixón aprobó siguir col conveniu que mantién cola Academia de la Llingua Asturiana dende va años. Un alcuerdu asemeyáu al que caltién esta institución con conceyos como Llangréu o Carreño, pero que nel casu de Xixón precisa de la renovación añal per parte del equipu de gobiernu.

Aprobada nel tiempu de l’alcadesa Paz Fernández Felgueroso, el conveniu sobrevive al nuevu gobiernu del conceyu, de Foru Asturies.

El conveniu afita a l’Academia como la “máxima institución asturiana nos temes venceyaos a la llingua asturiana” asina como’l trabayu que se vien desenvolviendo dende l’Ayuntamientu de Xixón na normalización llingüística. Alcordando la necesaria collaboración énte les instituciones pa la promoción, difusión y dignificación social del usu del asturianu nel conceyu de mayor población del país.

El Conceyu de Samartín del Rei Aurelio tien colgáu na rede un llibru nel que se recueyen los sos topónimos oficializaos dende febreru de 2008. Nesti testu esplícase l’orixe de munchos de los topónimos, amás de dar otres informaciones d’interés alredor d’ellos.

Descarga’l llibru de baldre

El 9 de xineru inauguróse na Casa Cultura de Grau, la esposición fotográfica “ASTURIES, Naturalmente”, IV esposición itinerante, entamada pola Asociación de Fotógrafos de Naturaleza d’Asturies, AFONAS, que va tar abierta hasta’l día 31.

Esta esposición, que ta compuesta por 38 obres de gran formatu, na que s’entemecen paisaxes del monte asturianu con espectaculares marines, pequeños y grandes animales, pretende dar a conocer el nuesu Paraísu Natural” al traviés de la fotografía.

La conceyalía de Cultura y Política Llingüística de L.lena acaba de presentar la campaña “Na igualdá nun quedes fuera de xuegu”, que va pocos díes punxera tamién en marcha’l Serviciu de Normalización Llingüística del Cabu Peñes. Amás d’estos conceyos, Avilés, Mieres, Llaviana, Siero, Cangas del Narcea y Samartín del Rei Aurelio van poner esta campaña en marcha nestes selmanes.

Inténtase con ello contribuir a eliminar la visión de xuegos y xuguetes pa neños y xuegos y xuguetes pa neñes y concienciar y implicar a la xente na importancia del xuegu como principal instrumentu d’aprendimientu y socialización. Y ye que’l llabor de les families y les persones adultes ye escoyer xuguetes non sexistes y non violentos qu’entretengan y qu’eduquen, que permitan un desarrollu integral de neños y neñes, potenciando les sos cualidaes individuales y aquelles otres que debemos considerar importantes como la creatividá, la imaxinación, la iniciativa y el cuidáu de les demás persones. Esti sedría l’enfotu cimeru d’esta campaña, según espliquen los sos organizadores.

El domingu día 18, a les 12 la mañana, El Garrapiellu va poner el nacimientu nes ruines de la Ilesia Vieya de San Pedru La Collá, en Siero, como ye vezu d’esta tertulia cultural dende va años. Darréu fadrase la danza prima alredor del texu milenariu d’esta parroquia.

A les 2 de la tarde van facer una xinta nel restorán La Bombilla, en Caldones. Pa la xinta ye necesario confirmar enantes del sábadu nel telefonu 606390344. El preciu ye d’unos 18 euros.

La Llaboral organiza una actividá en collaboración cola Oficina Municipal de la Llingua del Conceyu de Xixón, na que los participantes van conocer, con un rompecabeces xigante, les 26 parroquies del conceyu de Xixón. Un entreteníu taller pa conocer la hestoria de la ciudá, los sos monumentos naturales, la so arquitectura… too ello xugando y participando. Amás, van deprendese delles nociones de llingua asturiana.

Empobináu a neños de 6 a 12 años, l’actividá ye de baldre y va facese esti sábadu 3 d’avientu de 17:00 a 18:30 hores na sala de talleres de La Llaboral Ciudá de la Cultura. Les places son llindaes, polo que se precisa acutales enantes nel teléfonu 902 306 600.

L’actividá forma parte del programa de talleres didácticos que La Llaboral Ciudá de la Cultura entama pa la fin de selmana, con actividaes empobinaes al públicu infantil que se van realizar tolos sábados hasta’l 17 d’avientu.

L’Asociación L’Arfueyu, ta acabante reclamar a l’Autoridá Portuaria del Puertu d’Avilés que cumpla la llexislación vixente y respete la toponimia tradicional asturiana. Y ye que según espliquen dende L’Arfueyu “esti organismu oficial, na so páxina web, vien denomando al nuevu muelle de la marxe derecha de la ría avilesina como “muelle de Las Canteras”, cuando’l topónimu tradicional ye: L’Estrellín”. Por tantu esta asociación cultural solicita que l’Autoridá Portuaria pase a denomalu “muelle de L’Estrellín”.

En declaraciones feches a La Nueva España, el presidente de l’Autoridá Portuaria, defendió denomar al muelle como “Valliniello”, pol topónimu de la parroquia na que ta asitiáu esti muelle, de la que L’Estrellín ye un barriu.

La selmana pasada presentábase una campaña nueva del Serviciu de Normalización Llingüística del Conceyu de L.lena, “N’asturianu queda guapo”, na qu’al traviés d’una serie de llámines que van repartise peles escueles del conceyu, va afalase l’usu del pallabreru asturianu de la casa, los animales, la ropa y el cuerpu humanu, col envís de que sigan n’usu ente los más nuevos.

Hasta’l 27 d’ochobre pueden presentase propuestes pa la convocatoria fecha pol Conceyu de Xixón pa recoyer la toponimia menor del so territoriu, dempués de qu’en 2006 s’investigare y oficializare la toponimia mayor. Regatos, montes, finques, caminos y demás elementos menores de la toponimia xixonesa van vese recoyíos agora gracies a esti contratu col que va facese una base de datos, entregada darréu a la Xunta Asesora de Toponimia, qu’habrá d’oficializar los datos.

El contratu estiéndese hasta fin d’añu y tien un presupuestu máximu d’unos 11.000 euros, incluyendo cerca de 530 hores de trabayu. Nesta primer campaña van recoyese polo menos 500 topónimos de caúna de les siguientes parroquies: L’Abadía Ceneru, Cabueñes, Caldones, Granda, Puao, Fresno, Veriña y Serín. En total más de 3.000 nomes tradicionales a los que van siguir miles más en 2012, cuando se siga col trabayu sobre’l restu de les parroquies.

Bases de la convocatoria del Conceyu de Xixón

Una petición d’un ciudadanu al grupu muncipal d’Izquierda Xunida nel conceyu de La Ribera fizo qu’esti grupu políticu plantegara al acalde socialista, en plenu del pasáu 29 setiembre, que’l gobiernu municipal unviara cartes a les asociaciones sovencionaes del conceyu col envís de face-yos ver la necesidá de respetar la toponimia tradicional, oficializada yá en La Ribera.

El ruegu de la estaya d’Izquierda Xunida pidía que se mandara una circular a les asociaciones que recibieren ayudes del Conceyu pa la organización de les sos actividaes.

El gobiernu, del PSOE, comprometióse a mandar eses cartes y a respetar dende’l propiu Conceyu la topononimia, oficializada yá en 2006.