Conceyos

Hasta’l 27 d’ochobre pueden presentase propuestes pa la convocatoria fecha pol Conceyu de Xixón pa recoyer la toponimia menor del so territoriu, dempués de qu’en 2006 s’investigare y oficializare la toponimia mayor. Regatos, montes, finques, caminos y demás elementos menores de la toponimia xixonesa van vese recoyíos agora gracies a esti contratu col que va facese una base de datos, entregada darréu a la Xunta Asesora de Toponimia, qu’habrá d’oficializar los datos.

El contratu estiéndese hasta fin d’añu y tien un presupuestu máximu d’unos 11.000 euros, incluyendo cerca de 530 hores de trabayu. Nesta primer campaña van recoyese polo menos 500 topónimos de caúna de les siguientes parroquies: L’Abadía Ceneru, Cabueñes, Caldones, Granda, Puao, Fresno, Veriña y Serín. En total más de 3.000 nomes tradicionales a los que van siguir miles más en 2012, cuando se siga col trabayu sobre’l restu de les parroquies.

Bases de la convocatoria del Conceyu de Xixón

Una petición d’un ciudadanu al grupu muncipal d’Izquierda Xunida nel conceyu de La Ribera fizo qu’esti grupu políticu plantegara al acalde socialista, en plenu del pasáu 29 setiembre, que’l gobiernu municipal unviara cartes a les asociaciones sovencionaes del conceyu col envís de face-yos ver la necesidá de respetar la toponimia tradicional, oficializada yá en La Ribera.

El ruegu de la estaya d’Izquierda Xunida pidía que se mandara una circular a les asociaciones que recibieren ayudes del Conceyu pa la organización de les sos actividaes.

El gobiernu, del PSOE, comprometióse a mandar eses cartes y a respetar dende’l propiu Conceyu la topononimia, oficializada yá en 2006.

El centru cultural Valey de Castrillón abrió’l 15 de setiembre’l plazu de matrícula de les escueles culturales y de la Escuela de Música, con cursos de llinguaxe musical, artesanía decorativa, creación lliteraria, patchwork, encuadernación, etc. Ente los cursos, unu d’asturianu, que va ser l’únicu que seya de baldre. Les inscripciones podrán facese hasta’l 26 de setiembre, de cuatro y media a ocho y media la tarde nel Centru cultural Valey, en Piedrasblancas.

La nueche del 20 al 21 de setiembre de 1921 ye una fecha entá recordada en Grau. Nun paró de llover dende los diez de la nueche hasta los cinco de la madrugada, lo que provocó que s’anubriera la vega y se desbordare’l Ríu Martín dende la media. Esti pequeñu regatu, que malapenes baxa agua demientres el branu, convirtióse nuna gran riega qu’abasnaba tolo que tenía per delantre. La fuercia de les agües foi tal que provocó’l fundimientu de delles cases próximes, una d’elles el xalé de Valentín Sarasola “Tumballobos” y el fallecimientu d’una vecina.

La prensa nacional y estatal fízose ecu de los sucesos de Grau, créase una Xunta de Socorru pa recaldar fondos pro-damnificaos. En payares d’esi mesmu añu 1921, el Ministeriu de la Gobernación y robláu pol rei Alfonso XIII, y como atención a la desgracia sufierta polos habitantes de Grau concédese-y a la villa’l títulu de siempres benéfica, y al so Conceyu’l tratamientu d’Ilustrísimu.

Coincidiendo col 90 aniversariu d’esta efeméride, la Conceyalía de Cultura del Conceyu de Grau y el Círculu d’Estudios Pramarenses convoquen pal martes día 20 de setiembre a les 14 hores y na Sala Polivalente de la Casa de Cultura de Grau una rueda de prensa abierta tamién al públicu polo xeneral pa presentar un proyectu de monumentu n’alcordanza d’esta enllenada y bien rellacionáu tamién col xalé de “Tumballobos”.

Nel actu intevendrán la Conceyala de Cultura Mª Victoria Fernández, José Luís Arguelles García como autor d’un estudiu sobre la enllenada y el mentáu xalé, y Emilio Argüelles en representación del Círculu d’Estudios Pramarenses.

Dientro de los actos de l’Arribada 2011 va celebrase un alderique nel que se va facer analís del estáu del idioma asturianu nel ámbitu de los conceyos, dende les midíes empobinaes dende les alministraciones al movimientu reivindicativu, pasando peles acciones xurdíes na sociedá civil.

Esta tertulia, que se fadrá nel patiu del CCAI el sábadu 10 de setiembre, a partir de les 17:00 hores, cuntará cola participación de representantes de los servicios de normalización llingüística que s’afayen nel País, de miembros de delles entidaes asturianistes de defensa de derechos civiles y de responsables d’iniciatives culturales en pro de la oficialidá del asturianu.

Pola mor de la so temática, esti D’Alderique ábrese especialmente a la participación del públicu asistente.

La Casa de los Alberti de Ciañu, en Llangréu, acueye la esposición Lesbianes fotografiaes por lesbianes. Esta amuesa de semeyes qu’organiza l’asociación Asina–Llangréu en collaboración con XEGA, COGAN y el Conceyu de Llangréu, pudiendo visitase hasta’l próximu día 20 de setiembre, tolos díes de 8:00 a 15:00 hores y los xueves tamién de 17:00 a 21:00 hores.

Esta ye la segunda edición de la esposición colectiva itinerante PHOTOLES Lesbianes fotografiando lesbianes que l’asociación COGAN vien poniendo en marcha dende l’añu 2005 y que tien como principal envís el de consiguir la visibilidá lésbica. L’oxetivu de la esposición ye’l de dar amuesa de la riqueza y diversidá de la realidá lésbica, los sos matices y contrastes, amás d’ufiertar a les autores de les fotografíes un espaciu pa dar a conocer la so obra. La esposición PHOTOLES ye un certame que dende l’añu 2005 pon en marcha l’asociación COGAN y que percorriendo chigres, cafés, pubs, centros culturales, llibreríes y demás espacios fai visible la realidá lésbica.

La Conceyalía de Cultura de Grau, col sofitu de la Conseyería d’Asturies, entama una edición nueva de los sos Cursos de Llingua Asturiana p’Adultos, en nivel I y II. La inscripción ye gratuita y puede facese hasta’l martes 13 de setiembre na Biblioteca Municipal de Grau. Los cursos van durar trés meses, dos díes a la selmana, con Xosé Lluís Rodríguez Alberdi como profesor.

El voceru del partíu Foru Asturies en Siero, Eduardo Martínez Llosa, pidió al Conceyu un mayor prespuestu pa la rotulación topónimica, pa la que se cunta esti añu con una sovención del Gobiernu d’Asturies de 1.892 euros.

Pa FAC ye necesaria una bona rotulación billingüe que termina cola mala señalización de munchos llugares del conceyu.

Énte l’anuncia de que’lConceyu de Xixón sacó a llicitación el suministru y personalización de les tarxetes ciudadanes pa los dos años vinientes, por un preciu global de 221.000 euros, dende l’asociación N’Ast esixen que la edición de tales tarxetes se faiga de manera billingüe, combinando y asitiando’l mesmu nivel les llingües asturiana y castellana.

La realización de tarxetes ciudadanes de calter billingüe, recuerden, “ye perfechamente posible dientro del actual marcu xurídicu”, polo que dende la so perspeutiva, afirmen, “nun hai denguna escusa pa nun recoyer la llingua propia del País, de la nuesa cultura y de gran parte de la ciudadanía”.

Dientro de les fiestess de Santiago y Santa Ana, esti domingu 17 va tener llugar la Feria d’Artesanía de Santiago nos Parques de Grau. La organización cuerre a cargu de la Conceyalía de Feries y Mercaos.

Amás a les nueve la nueche va celebrase un pase de la obra “El caballero de Olmedo” a cargu de l’Aula de Teatru de la Universidá de Murcia. L’actuación va facese nel Frontón del Parque de Riba.