Conceyos

La Conceyalía de Cultura presentó los actos pa la celebración de la Selmana de les Lletres Asturianes, cola que pretende fomentase la llectura de lliteratura asturiana, poner en valor la cultura d’Asturies ya impulsar la normalización de la llingua asturiana ente la xente mozo. Los actos van desenvolvese del 30 d’abril al 4 de mayu na Casona del Bravial y van cuntar cola participación d’alumnos d’Educación Secundaria del conceyu.

La selmana va arrincar cola inauguración de la esposición “Campañes de normalización llingüística nel conceyu de Samartín”, que ye un repás per toles campañes feches nesti sentíu dende l’añu 2005 en distintos ámbitos: enseñu, comerciu, hostelería o alministración llocal, ente otros. L’horariu de visita, mientres tol mes de mayu, ye de 9 a 14 hores.

El miércoles 2 de mayu, a les 9,00 hores, alumnos del IES Virxe de Cuadonga van visitar la Casona del Bravial pa ver la esposición y conocer el Muséu de la Memoria y l’Oficina de Normalización Llingüística.

Al otru día, el xueves 3 de mayu a les 10:30 hores, va tener llugar la presentación del llibro ‘Memorial del monstruu’, de Dolfo Camilo Díaz, gallardonáu col Premiu Montesín de Lliteratura Xuvenil nel añu 2010. Va asistir como públicu invitáu alumnos del IES Juan José Calvo Miguel.

A lo último, dende’l perfil en facebook de la Oficina de Normalización Llingüística convidase a la población a publicar na so muria testos inéditos o reproducciones d’autores n’asturianu, colos que van participar nel sortéu d’un llote de llibros.

Cola intención de facer presente la llingua asturiana dende los primeros años de vida de los neños y neñes y concienciar a los padres de la importancia del so llabor pa la conservación del nuestru patrimoniu llingüísticu, Man.co.si, al traviés del so Serviciu de Normalización Llingüística, editó esti añu “El llibru pa lo más piquiñino de la casa”, un guapu cuadernu ilustráu nel que se pueden dir rexistrando les evoluciones de los neños y neñes nos sos primeros años, dende’l so nacimientu hasta’l primer añu d’escuela. La presentación del llibru va facese esti xueves, 19 d’abril, a les 12:00 hores, na Sede de Man.Co.Si en Paraes (Nava)

“El llibru pa lo más piquiñino de la casa” ye una revisión actualizada del “Llibru del naciatu”, editáu en 2008 pol Serviciu de Normalización Llingüística de Man.co.si, xunto con otros conceyos de los qu’integren la Rede de Normalización Llingüística nos conceyos. Nesta nueva versión participen tamién los conceyos de Samartín del Rei Aurelio, Llangréu, Mieres y Cangas del Narcea, y la Mancomunidá del Cabu Peñes.

El llibru repartiráse ente los padres que vayan a empadronar a los sos fíos y fíes nos conceyos qu’integren la mancomunidá, pudiéndo solicitase tamién un exemplar, hasta fin d’esistencies, nel Serviciu de Normalización Llingüística de la Comarca de la Sidra, na sede de Man.co.si en Paraes (Nava).

Xunto col llibru, repartiráse una carpeta que inclúi un baberu con dibuxos y vocabulariu referente a los primeros años d’infancia, un pallabreru, un mididor y una pegatina pal coche col lema “Cuidadín, que voi dientro”, inspiráu nel clásicu “Bebe a bordo”.

Amás d’esta actuación, el Serviciu de Normalización Llingüística de Man.co.si tien previsto pa los prósimos meses un nuevu repartu de materiales de les campañes del ámbitu de la hostelería, talleres de llectura n’asturianu en Nava y Villaviosa y el tradicional repartu de les lletres de pan, el día de les lletres asturianes, que se celebrará esti añu’l vienres 4 de mayu. Como antesala a esti día, celebraráse’l miércoles 2 de mayu un recital músicáu de poesía n’asturianu nel teatru riera de Villaviciosa, con dalgunes de les voces más interesantes del panorama de la nueva poesía fecha n’asturianu.

La Oficina Cultural y Llingüística de la Fundación Parque Hestóricu del Navia presentó’l so espaciu web, que puede visitase na dirección www.parquehistorico.org/ocl Esti espaciu web creáu gracies a una sobención de la Conseyería de Cultura pa la normalización social del gallego-asturianu dirixida a entidaes ensin ánimu d’arriquecimientu, quier ufiertar un nuevu serviciu a les persones interesaes n’aspeutos rellacionáivos col gallego-asturianu y outros aspeutos culturales de la so contorna d’influencia.

Na web pueden atopase separtaos estremaos nos que s’ufierta diversa información sobre la Oficina Cultural y Llingüística de la Fundación Parque Hestóricu del Navia y los distintos servicios qu’empresta a les alministraciones públiques, entidaes, asociaciones y particulares. Asina, podemos ver separtaos nos que se presenta’l serviciu, les funciones qu’este tien y la so llocalización física; tamién tenemos accesu a un separtáu de noticies de la Oficina y a un buscador d’asociaciones por conceyos del Parque Hestóricu del Navia; de la mesma, amuésense les distintes publicaciones editaes dende’l serviciu, una bibliografía en/o sobre’l gallego-asturianu, dellos documentos llegales, decretos toponímicos de los Conceyos de la comarca, exemplos concretos de normalización social del gallego-asturianu na redolada y enllaces web a distintos documentos, grupos y entidaes relaciondas cola llingua propia del estremu más occidental d’Asturies.

Esti espaciu web tamién dispon d’un formulariu de contactu pa dirixise a la Oficina Cultural y Llingüística del Parque Históricu del Navia y una canal RSS de noticies al que poder inscribise.

Páxina de la Oficina

Mientres en Xixón, Pilar Fernández Pardo pidía a Foru más midíes de normalización llingüística, el voceru del Partíu Popular de Castrillón, Jesús Pablo González-Nuevo Quiñones, criticó l’alcuerdu algamáu ente’l Política Llingüística y los alcaldes de Castrillón ya Illas, p’abrir a lo llargo del mes de xunu un serviciu de normalización conxuntu.

González-Nuevo Quiñones albidra qu’esta midida “nun ye prioritaria en tiempos de crisis” y pidió al alcalde del so conceyu que “se centre en da-y solución al paru y los servicios”, prefiriendo que la partida que va destinar el Gobiernu d’Asturies a esta midida s’empobine a la puesta en marcha d’un telecentru en Salinas.

Los alcaldes de los conceyos d’Illas y Castrillón, Ángela Vallina y Alberto Tirador, llegaron ayeri a un alcuerdu col Gobiernu d’Asturies, al traviés del director xeneral de Política Llingüística, Alfredo Álvarez, pa que l’alministración autonómica financie un serviciu de normalización llingüística conxuntu pa los ciudadanos de dambos conceyos.

Un persona tará al cargu d’esti serviu encargándose de los llabores de traducción, creación de campañes y asesoramientu a les dos alministraciones a les que va tar vecenyáu.

El Serviciu de Normalización Llingüística de Samartín del Rei Aurelio presenta güei a les 7 la tarde na Casona del Bravial de Blimea una nueva campaña medioambiental. Nel actu cuntarán cola presencia d’Elisabet Soto Álvarez, vocera de la Plataforma Ambiental d’Avilés y Comarca que va falar de cuestiones rellacionaes col reciclaxe. Toles persones qu’asistan van recibir de regalu los materiales que formen la campaña: bolses reutilizables, llibretines y folletos.

La organización N’ast manifestó’l so descontentu énte la esapaición de la política de promoción editorial del Ayuntamientu de Xixón y recuerden que’l sofitu económicu del gobiernu mu¬nicipal a la edición cultural “pasó d’implicar más dos millones d’euros ente los años 2010 y 2011 a nun acutar nin un euru nel presupuestu municipal d’anguaño, precisamente nunos momentos especialmente difíciles pal sector editorial asturianu”.

N’ast espresa que “nun ye lo mesmo reducir un presupuestu por mor de la crisis económica, qu’anulalu dafechu” y piden que “polo menos se caltenga’l sofitu pa la edición en llingua asturiana”.

Dende N’Ast entienden que “les circunstancies nun permiten caltener los anteriores niveles d’inversión”, pero califiquen esta decisión “non solamente un dañu al espardimientu de la cultura sinón tamién a la mesma economía asturiana”.

Por ello, N’Ast solicita que “como mínimo” se caltenga’l sofitu pa la edición en llingua asturiana, “dao la conocida situación d’amenorgamientu que carez la nuesa llingua nacional por mor de la falta de respetu a los drechos democráticos de los asturianos en materia llingüística”, rematen.

Izquierda Xunida pidiere la comparecencia de Carlos Rubiera, conceyal d’Enseñu y Cultura del Conceyu de Xixón, pa esplicar los planes del gobiernu de Foru no que cinca a la política llingüística nesti conceyu. Esti alderiqué sirvió pa que conceyales de los cuatro grupos políticos (Foru, PSOE, PP ya IX) usaran l’asturianu. Pilar Fernández Pardo fizo llectura d’un testu nel qu’espresaba’l so deséu de que nun se dieren pasos atrás nel camín andáu en Xixón na normalización del idioma, mientres que Rubiera esplicó que va camudar el nome de la, hasta agora Oficina de la Llingua de Xixón, por oficina de Normalización Llingüística, sacando amás la plaza de responsable a concursu.

La popular Pardo pidió al equipu de Moriyón qu’“avance” na normalización y que “tamién les empreses municipales usen l’asturianu”, reclamando tamién que “seya vehículu d’espresión válidu en toles circunstancies”, esixendo tamién cursos d’aniciu y perfeccionamientu y una mayor presencia del asturianu na páxina web.

El conceyal de Foru, Carlo Rubiera, felicitóla pol so discursu, destancando la so “voluntá y dicción”, y dándo-y especial valor, yá que recordó, “l’asturianu nun ye la so llingua materna”.

Rubiera faló de la necesidá de “buscar equilibrios ente les distintes sensibilidaes” y aplaudió dalgunes de les iniciatives entamaes nesta cuestión nel tiempu del gobiernu de PSOE ya IX.

Ente les midíes anunciaes, la “introducción de criterios nel usu del asturianu nes bases de sovenciones del Teatru Xovellanos, y una llinia de publicaciones cola Academia de la Llingua Asturiana, sobre autores xixoneses”.

Los conceyales d’Izquierda Xunida, Jorge Espina, y del PSOE, Ramón Tuero, que tamién usó l’asturianu, recriminaron la falta d’actuaciones nesta cuestión.

Ramón Rodríguez Corao ye l’autor de “Vocabulariu de Ruenes”, un testu asoleyáyu pola Academia de la Llingua Asturiana dientro de la coleición Preseos. El númberu 14 d’esta estaya de publicaciones recueye un vocabulariu de la parroquia de Ruenes, asitiada nel conceyu del Valle Altu de Peñamellera, na fastera más oriental d’Asturies. Recuéyense nel llistáu la mayoría de los términos, frases, dichos y refranes que tovía se caltienen presentes na parroquia, anque dalgunos d’ellos tean yá daqué aminorgaos nel usu por cuenta de la perda de les tradiciones onde yeren habituales. El so autor, natural del llugar, punxo un enfotu particular na recoyida de léxicu de la vida cotidiana, de la vexetación y de la fauna.

Dende Iniciativa pol Asturianu denuncien lo qu’albidren “un nuevu pasu p’atrás nel usu del asturianu” per parte del conceyu d’Uviéu. Esta vegada, trátase de la programación de fuelgu xuvenil “La nueche ye tuya” que facía un usu billingüe del asturianu y del castellán, mesmu na denomación que nes feches de toles actividaes. Esplique que yá l’añu anterior, “amenorgóse la presencia del idioma asturianu, emplegándolu namás na denomación” y denuncien qu’esti añu “desapaez dafechu, amosando en tola cartelería y publicidá únicamente: “La noche es tuya”.

Dende Iniciativa pol Asturianu camienten que “la normalización social del idioma, per parte de los socesivos equipos del Gobiernu llocal, yera yá bien probe y deficiente”, denunciando que “nos últimos años tamos asistiendo a un desaniciu del asturianu en tolos sitios onde ganara un espaciu”, poniendo como exemplu “la desapaición del asturianu de la so web va poco más de dos años”.

L’asturianu ta siendo pa esta organización “la víctima d’una casa conceyu que representa a la segunda mayor población d’Asturies y que fai poco o nada por respetar la Llei d’Usu y por da-y puxu al idioma dende les instituciones”. Recuerden qu’Uviéu nun cuenta nin con un Serviciu de Normalización, nin ta trabayando na recuperación de la toponimia, nin tien plan nengún de normalización social del idioma.

Poro, dende Iniciativa pol Asturianu, vamos esixen a los responsables de lo que consideren “una llaceria” qu’adquieran el compromisu de dar pasos nuevos nel usu d’un idioma que, recuerden, “ye patrimoniu de toos”.