Comunicación

El periodista Pachi Poncela, que dirixere’l programa Hoy por hoy en Cadena SER Xixón diecisiete años, vuelve a los medios de comunicación pa convertise en co-presentador del programa de TPA La Gran Noche de Terapia xunto a Lía Beltrán, que yá taba al cargu del programa la temporada pasada.

La nueva temporada de “La Gran Noche de Terapia” va entamar el vienres 11 de setiembre a les 22 hores en TPA con delles novedaes, según indica la productora.

Los invintaos del primer programa van ser Mario, ganador de la última edición d’Operación Triunfo y l’actor asturianu Arturo Fernández. Amás, el concursu de talentos “Yes mundial” va ampliar la so presencia, con un programa onde va siguise la trayectoria de cada participante, va llamase “Terapia mundial” y va emitise los llunes n’horariu de máxima audiencia.

Un equipu de televisión de la República Checa percuerre Asturies estos díes y hasta’l 27 d’agostu atropando información pa ellaborar dos documentales que va emitir la televisión pública del so país y un reportaxe que va espublizar una revista de viaxes de periodicidá mensual.

Estos periodistes tienen interés especial en conocer la naturaleza de la nuesa Comunidá Autónoma, asina como la so gran variedá de quesos y tolo venceyao col asturcón.

La primer parte de la so estancia centróse, fundamentalmente, nel rodiada de la Comarca de la Sidra, participando na Fiesta del Asturcón, que se celebró’l sábadu na Mayada d’Espineres.

Nestos díes van visitar el Muséu de la Sidra, xubir a Peñamayor, conocer cómo cultiven los pumares en Villaviciosa, percorrer Llastres. El segundu tramu del so viaxe pasa pel Oriente. Gran parte del tiempu van dedicalu a conocer queseríes que producen les variedaes de Gamonéu (del valle y del puertu), los Beyos y Cabrales. Van grabar la baxada del Seya en piragua, les playes de Llanes y los paisaxes singulares de los Picos d’Europa.

El Senáu aprobó yá, con 130 votos a favor, dos en contra y 118 abstenciones la nueva llei pola que TVE nun va emitir más publicidá na so programación. La midida va entrar en funcionamientu a partir de setiembre. La financiación nueva va venir nun 3% sobre los ingresos de les televisiones privaes estatales n’abiertu; del 1,5% de los operadores de pagu y el 0,9% de los operadores de telecomunicaciones.

Amás va poder recibir aportaciones voluntaries, los productos y rentes del so patrimoniu y otres cuestiones que queden afitaes na Llei.

La llei tamién prevé que TVE nun pueda dedicar más que’l 10% del so presupuestu añal a mercar drechos d’eventos deportivos d’nterés, anue s’escluyen los Xuegos Olímpicos.

Amás, TVE ha emitir polo menos un 60% de conteníos fechos n’Europa, como llargometraxes, curtios y documentales y nun va poder emitir nel conxuntu de les sos canales más del 70% de películes d’estrenu de les grandes productores internacionales.

Editorial Everest y la Mancomunidá d’Ozcos-Eo vienen acabantes de publicar esta selmana la guía ‘Visita los Ozcos-Eo’, que fai un percorríu pola comarca, aparándose nes fragües, los inxenios hidráulicos y la naturaleza que fain de la zona un paraxe únicu onde’lturismu sostenibl vien desendolcándose dende hai tiempu al traviés del desenvolvimientu de les sos pernomaes cases rurales.

La guía desplica l’espíritu d’esta comarca, la so forxa natural, la so capacidá d’ufiertar mar y montaña, les ventayes del so aislamientu d’años, les sos rutes al traviés del agua, de la piedre, de la viesca, del fueu y de recibir el nomamientu de Reserva de la Biosfera pola Unesco nel 2007.

Mientres la presencia de la nuesa llingua na TPA lleva más de dos años ensin medrar y ensin cuntar con programación de calter informativu, en Lleón, y tres d’un alcuerdu de la Conceyalía de Cultura Lleonesa de la capital del territoriu cola televisión autonómica (TVCyL), esta última va cuntar con un informativu n’asturlleonés, el “Xornal Informativu en Llingua Llïonesa”.

El programa, con una duración de diez minutos, va emitise los sábados a les 20.15 hores y los llunes a les 10.30 hores al traviés de la canal 8 de TVCyL.

La televisión encárgase de la parte técnica y periodística y la Conceyalía de les tornes al lleonés. El conceyal d’Educación, Nueves Tecnoloxíes y Cultura Lleonesa del Ayuntamientu de Lleón, Abel Pardo, señaló qu’esti alcuerdu ye “ampliamente satisfactoriu pa les dos partes, al llograr un programa con una altísima calidá técnica y llingüística que vien a satisfacer una demanda de la sociedá que reivindicaba que la llingua lleonesa tuviere presente nos medios de comunicación”.

El programa va estendese hasta finales d’añu, aumentando la cuota de lleonés, “si l’audiencia respuende”.

El Beltaine, nuevu intercélticu avilesín, va celebrar dientro de les sos actividaes el I Congresu Beltaine, que va centrase nel periodismu y la cultura tradicional na sociedá de la información. Nel mesmu van participar periodistes de tol estáu y d’Asturies, intercambiando esperiencies alredor del periodismu cultural. La inscripción ye de baldre y pue facese na web de Beltaine.

El sábadu a les 9:30 Pilar Varela, alcaldesa d’Avilés; Román Antonio Álvarez, Conceyal de Cultura d’Avilés y Próspero Morán, director d’ASTURNEWS, ya Isidro Sánchez, directores dambos dos del Congresu, van inaugurar la cita, cola conferencia “La cultura tradicional na sociedá de la información” per parte de Morán.

Darío Pescador, periodista especializáu n’información dixital va comentar “La información Musical nos medios dixitales” a les 12, y a les 13:30 va ser Ignacio Gómez. Subirector de Conteníos d’Entretenimientu d’iRTVE. RTVE-Medios Interactivos, quien dea llectura a la conferencia “Información y cultura nos medios dixitales públicos”.

A les16,30 “Diferencies culturales y xeneracionales frente a les nueves tecnoloxíes: padres, fíos y el teléfonu móvil” por Carmen Galera, de la Universidá Rei Juan Carlos.

A les 18 hores Pedro de Alzaga., d’Abc.es, va falar d’Información cultural y tecnoloxía. Roberto Mezquita, va falar a les 19:30 de los diez años de la revista Interfolk, que coordina.

El domingu la xornada va entamar con “El mapa informativu español de la Sociedá de la Información”, por Roberto de Miguel, de la Universidá Rei Juan carlos de Madrid. A les 10,30 Leire Iturregi, de la Universidá del País Vascu va comentar aspectos sobre “Información Llocal y Cultura tradicional: La esperiencia d’Euzkadi”.

A les doce y media la mañana’l congresu va centrase nel casu asturianu con “Información Llocal y Cultura Tradicional: La esperiencia asturiana”, coles ponencies d’Aurelio Argel, críticu musical; Enrique Carballeira, periodista; Próspero Morán, director d’Asturnews.com ya Inaciu Galán, presentador d’Al Aldu, na TPA y llocutor na Cadena Ser.

Ignacio Martin-Granados, xefe de Prensa del Ayuntamientu de Segovia y Profesor de la Universidá de Valladolid va abrir la tarde a les 16:30 con “El papel de los eventos culturales na comunicación institucional”. Darréu, Laura Galguera. Vicepresidenta de l’Asociación Iberoamericana de la Comunciación (ASICOM), profesora de la Universidá d’Uviéu y académica visitante de la Universidá de Columbia (Nueva York), va pesllar el congresu con “Comunicación y Cultura: el casudel Cirque du Soleil”.

El congresu ye de baldre pa los interesaos n’inscribise, que puen apuntase na web del mesmu.

Programa completu del Beltaine 2009

El próximu miércoles día 9 de xunetu, a partir de les 18:30 hores, van grabase monólogos pal espaciu “La risión” del programa “Al aldu” de la TPA, na Casa la Cultura de Llaviana. Los monologuistes que van a participar son: Tante Blanco, Marilú Casas, Silvino Torre, Carlos Alba “Cellero”, Vanesa Peña “Nona” y José Manuel Reguero “El Maestru”. La entrada ye llibre hasta completar l’aforu.

L’apagón analóxicu de la televisión asturiana fadráse esta mediuanueche y afeutará a parte del centru d’Asturies y a unos 40.000 vecinos d’Uviéu, Les Regueres, Morcín y Llanera, al apagase’l repetidor del Narancu como pasu previu al apagaón xeneral en 2010.

La conseyera d’Alministraciones Públiques del Principáu d’Asturies Ana Rosa Migoya manifestó esti llunes que’l Principáu enfréntase “col trabayu fechu” al pasu de la televisión analóxica a la Televisión Dixital Terrestre (TDT), en declaraciones a los periodistes nel barriu y desplicó tamién que’l Principáu aportó trés millones d’euros en sovenciones pa l’adautación de les antenes colectives.

El PAS anunció la so protesta pol “abegosu tratamientu que la Televisión del Principado de Asturias (T.P.A.) fai, non sólo de la información xeneral sobre Asturies (al serviciu del rexime afitáu-P.S.O.E.), y l’escaecimientu a la cultura ya la llingua, fae qu’el despreciu poles señes d’identidá llegue a tracamundiar los llugares d’Asturies por poblaciones foriates; ye’l casu dun reportaxe que se fai d’A VEIGA (imaxenes de la villa, la población de PIANTÓN, la Ría del Eo dende la parte asturiana) y la Televisión del Principado de Asturias (T.P.A): rotula esti reportaxe como una panorámica de la población gallega de RIBADEO”.

La Executiva Nacional del Partíu Asturianista (PAS) “amuela’l so más fondu rechazu a estos comportamientos de despreciu que dende esi “ENTE” faene darréu a tolo que seya asoleyar la cultura, xeografia y tolo que cinca cola identidá d’Asturies”.

Poro, la Executiva Nacional del Partíu Asturianista (PAS) dexise la dimisión inmediata del Director Xeneral, el Sr. Perez Ornia

Los escolinos del Colexu Auseva d’Uviéu son los protagonistes de la emisión d’esti sábadu del espaciu “Nós” qu’emite la TPA en llingua asturiana, pasaes les 12 hores del mediudía. Profesores y escolinos percorren el colexu y amuesen el so llabor na páxina web del centru educativu.

Nós, espaciu dirixíu y presentáu pol periodista y profesor universitariu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.