Comunicación

Radio QK, la emisora uvieína que ta emitiendo los programes de Radio Sele dende’l pieslle d’esta última per parte del Gobiernu d’España, denunció al traviés d’un comunicáu los ataques recibíos pola Xefatura Provincial d’Inspección de Telecomunicaciones, qu’emitió una amenzada de multa sobre la comunidá de vecinos onde s’asitia la emisora.

Con hasta 500.000 euros podríen sancionar a esta comunidá si la Xefatura sigue los pasos anunciaos, lo que pal “Club Cultural de Oviedo”, asociación que lleva la emisora, ye una “desafortunada situación”.

Radio QK recuerda que nun son “una radio illegal”, pues nun frayen nenguna llei “yá que, según reza la llei 32/2003, de 3 de payares, pa la Xefatura Xeneral de Telecomunicaciones, namás va constituyir infracción emitir ensin llicencia cuando se produzan daños graves a les redes o a la prestación de los servicios”, espliquen.

Y ye que la emisora uvieína nun interfier na señal de nenguna emisora con llicencia de radio comercial, “nin tuvimos nengún inconveniente pa mover la nuesa frecuencia cuando esto tuvo posibilidá d’asoceder, por casu en 1995, cuando la sumida Radiu Vetusta empezó les sos emisiones nel 106.9 y nós movimos del 107.0 al 107.3”, recuerden.

Amás la emisora nun desenvuelve “nenguna actividá comercial”, polo qu’esixen el fin de la persecución entamada contra ellos pol Gobiernu d’España.

Dientro de les XXX Xornaes Internacionales d’Estudiu de l’Academia de la Llingua Asturiana, los periodistes Próspero Morán ya Inaciu Galán propunxeron a los medios asturianos la firma d’un “Pautu pola recuperación y el fomentu de la toponimia tradicional asturiana”. Un alcuerdu, qu’esplicaron, “bien podría impulsar el Gobiernu d’Asturies o l’Academia de la Llingua Asturiana, col sofitu d’organizaciones civiles, y que supondría la utilización de la toponimia asturiana oficializada o en procesu d’oficialización de forma efeutiva nos medios escritos y audiovisuales asturianos”. La propuesta foi acoyida con interés por Ana Cano, presidenta de la institución organizadora del congresu.

Nesti pautu propuestu nes XIDE “los medios firmantes comprometeríense a utilizar la forma asturiana de los topónimos de forma oral y escrita, incluyendo los casos nos que la oficialización se ficiera cola forma castellanizada o falsificada incluyida nel decretu correspondiente”, de manera que se faiga un usu efeutivu de los mesmos.

Amás, los autores de la comunicación “La toponimia asturiana nos medios de comunicación: situación y perspeutives” falaron de la necesidá de que’l Gobiernu d’Asturies “s’empobine a los medios estatales, pa da-yos a conocer la situación actual de la toponimia asturiana, agora oficial, y afalalos al usu correutu de la mesma, que debería tar usándose”.

Y ye que Morán y Galán barrunten que “según espresa la norma interna de los llibros d’estilu de dalgunos medios de calter estatal la toponimia asturiana habría tar usándose yá nes sos formes tradicionale”. Pa estos dos periodistes “ye probable que’l desconocimientu seya en munchos casos, sobremanera fuera d’Asturies, lo que lleve al usu de topónimos yá derogaos frente a los autócnos yá oficializaos”.

Recordaron amás que ye bien díficil “facer normales los topónimos asturianos, fuera d’un procesu que nun incluya la normalización del idioma nel que s’espresen esos topónimos”.

Radio Sele anunció que ta buscando yá un nuevu llugar onde asitiar l’antena de la emisora, pa tornar a emitir lo primero que seya posible, dempués del avisu de Telecomunicaciones, perteneciente al Gobiernu d’España, que los olbigaba a retirar l’antena de la comunidá na que taben asitiaos hasta agora.

El sindicatu asturianu del enseñu SUATEA fizo una declaración na que, coincidiendo cola polémica entamada na radiotelevisión pública asturiana pol retayu de fondos, aprovechó pa pidir “una RTPA de calidá, bien xestionada y al serviciu de les necesidaes de la sociedá y non d’intereses partidistes”. SUATEA entiende que la RTPA ha tener un “importante valor educativo y cultural” y ha xugar un papel importante “nel fomentu y normalización de la llingua y cultura asturianes”.

Pa SUATEA, la sociedá del futuru “nun s’entiende ensin medios de comunicación” y ye por eso que ve necesaria la esistencia d’una RTPA “con una programación infantil y xuvenil de calidá que mos permita aprovechar l’importante potencial pedagóxicu que tienen los medios de comunicación”.

La organización sindical pide a la RTPA la firma de convenios de collaboración “cola Conseyería y/o los centros educativos de cara a la produción de programes con utilidá nos centros educativos” y recuerda’l valor social y económicu y llaboral que supón la radio y televisión públiques d’Asturies.

Esixen “l’’anulación del recorte, apuntando al parllamentu como única vía de solución del conflictu y d’establecimientu d’una verdadera RTPA al serviciu de la sociedá y fuera de prautiques “chanchulleres” y clientelares que mos recuerden a époques anteriores”. Y por ello faen un llamáu a participar nes movilizaciones que tán llevando a cabu los trabayadores de la RTPA y les empreses venceyaes, na defensa del pagu de les sos nómines, de los sos puestos de trabayu y de la continuidá de la radiotelevisión pública y un sector audiovisual más potente.

Na tarde d’esti martes, 25 d’ochobre, la emisora n’asturianu Radio Sele, viose obligada a desmontar la so antena y dexar d’emitir dempués d’una orde de José Antonio Díez Menéndez, director provincial de la Xefatura de Comunicaciones, que pertenez Ministeriu d’Industria, Turismu y Comerciu del Gobiernu d’España. Con esta decisión el gobiernu central pieslla la única radio qu’usa l’asturianu nel 100% de les sos emisiones.

Xuanxo Mariño, responsable de la canal radiofónica esplicó que de siguir cola antena instalada podríen enfrentase a una multa de mediu millón d’euros. La emisión va siguir pel momentu al traviés d’internet.

Radio Sele recibiere nel tiempu del gobiernu de Sergio Marqués una llicencia pa cuntar con una emisora comercial. Cola llegada al gobiernu de los socialistes esta foi arrebatada a favor de la emisora Punto Radio, que precisamente estos díes echaba’l pieslle a la sos emisiones propies p’Asturies. Anque los tribunales dieron la razón a Radio Sele sobre la concesión de la emisora, la sentencia nunca nun se cumplió per parte del Gobiernu d’Asturies.

ESNE Asturies entama un cursu de Certificáu Especialización en Community Manager (AERCO) con 23 hores de formación y un preciu d’800 euros, faciendo de llunes a vienres de 16 a 21 hores n’Uviéu.

El cursu inclúi, ente otros temes, una introducción al Social Media, monetización de comunidá o cuestiones alredor de les ferramientes esistentes nesti trabayu o sobre les implicaciones llegales del mesmu.

Ente los profesores tán Juan Ignacio Martínez, Guillermo de Haro o Jordi Lidón, siendo director Rubén Llames, consultor de Comunicación 2.0 en Comunicación Profesional, director académicu de CESMAsturies dende la so creación, profesor del módulu de Redes Sociales nel Master de Comunicación y Nueves Tecnoloxíes de la Universidá d’Uviéu .

Información completa del cursu

Los retayos anunciaos pol Gobiernu d’Asturies sobre’l presupuestu de la radiotelevisión pública asturiana tán atopando la respuesta de los trabayadores de la canal y tamién de dellos colectivos que recuperen la hestórica reclamación d’una radio y televisión pública 100% n’asturianu. L’Asociación N’Ast manifestó que “si bien el nacionalismu asturianu siempres reivindicó y esixó la creación d’un ente públicu de radiotelevisión asturiana, la RTPA entamada y xestionada pol réxime arecista del PSOE yera tolo contrario de lo que precisaba la sociedá asturiana”. Amás, otres iniciatives particulares tán atopando’l sofitu de los internautes, como la páxina “Pol futuru del sector audiovisual n’asturianu”, en Facebook.

N’Ast defende “una reestructuración radical de la RTPA tanto na so programación como na so xestión”, yá que consideren imprescindible una RTPA que recueya la cultura asturiana “como un valor social de proyeición universal y non como una reliquia folclórica, qu’asuma la llingua asturiana como una ferramienta de comunicación tresversal a toles temátiques, qu’esprese la pluralidá social esistente nel País, y que se caracterice pola austeridá y la profesionalidá”.

Pa ello N’ast reclama “una RTPA que funcione dientro d’estos esquemes a diferencia de l’actual si que tendría una xustificación social como un ente al serviciu de la ciudadanía, pues realmente Asturies precisa una RTPA qu’esprese la so realidá acullá del modelu arecista de radiotelevisión”.

El Partíu Asturianista foi la primer fuercia política que dende los años noventa vieno reclamando una televisión autonómica qu’emitiera n’asturianu, cola negativa de los partíos mayoritarios n’Asturies. Nun foi hasta la llegada a la presidencia d’Asturies de Vicente Álvarez Areces cuando se punxo en marcha la creación d’esti ente, que cuntó col refugu del PP nun entamu, pero darréu col total alcuerdu de les dos fuercies. Dende entós la presencia del asturianu na mesma foi mínimu, con programes venceyaos a les tradiciones y la cultura nun porcentaxe mínimu de la programación, y nunca en doblaxe de películes, informativos o otros conteníos consideraos prioritarios pa la normalización d’una llingua minorizada.

Campaña en Facebook por una RTPA n’asturianu

Jesús Iglesias, voceru parlamentariu d’IX Verdes na Xunta Xeneral, critica’l cinismu de Francisco Álvarez Cascos al intentar confundir a la sociedá treslladando la responsabilidá d’una decisión unillateral del so gobiernu, el retayu de 156 millones del presupuestu aprobáu na Xunta, 11,6 millones d’ellos a la TPA, al parlamentu asturianu, cuando él ye l’únicu culpable. La Llei de Presupuestos y la Llei que regula l’Ente son dos cuestiones absolutamente distintos, alvierte’l voceru d’IX Verdes.

El Gobiernu crea un problema qu’empón al zarru del Ente de comunicación y a les empreses que trabayen pa él y eso nun tien nada que ver cola Llei que regula l’Ente de comunicación, sinón cola de presupuestos que ye la qu’incumple Álvarez Cascos, detalla Iglesias. “El presidente pretende escudase na Cámara pidiendo qu’ésta revise’l marcu normativu qu’aprobó l’ente de comunicación, pero son dos cuestiones distintes”, esplica’l Coordinador d’IX d’Asturies.

Sobre’l modelu d’ente de televisión cabo falar del so funcionamientu, de cómo tien de cumplir esi oxetivu de sirvir a los intereses xenerales de la comunidá, abriendo una pluralidá informativa y del respaldu al desenvolvimientu de la cultura asturiana, en cualquier momentu, apunta Iglesias. Sicasí, eso nun tien nada que ver col retayu per parte de Cascos y el so incumplimientu del presupuestu. “Tamos ante un problema inmediatu, el del paru de cientos de trabayadores, que precisa una respuesta inmediata y lo otru, la posibilidá d’abrir una reforma d’esa llei tendría un marcu temporal que se dilataría nel tiempu, más allá de febreru del próximu añu”, puntualiza . Sía que non, IX-Verdes nun va aceptar un cambéu de la Llei del Ente de Comunicación p’aprobar la so privatización o la participación privada nel mesmu.

Jesús Iglesias repite que tamos ante una situación de flagrante incumplimientu d’una llei aprobada pol Parlamentu, como ye la Llei de presupuestos, pola decisión unillateral per parte del Gobiernu d’Álvarez Cascos. Esi retayu de más del 30% del presupuestu previstu pal funcionamientu del ente de comunicación pon en riesgo centenares de puestos de trabayu, tantu del ente como d’empreses productores, y contradiz tolos compromisos de respaldu a la creación d’emplegu y la llucha contra’l paru que’l Presidente asumió nel so discursu de investidura, sostien Iglesias. “Dende’l parlamentu lo que tenemos que dicir a Cascos ye que nun tome midíes drástiques d’estes característiques que nun cunten con respaldu de la mayoría de la Cámara y busque una solución al problema presupuestariu, que según él esiste, pero que nun ponga en riesgu estos puestos de trabayu agora amenaciaos”,alvierte’l Coordinador d’IX.

Güei a les 20:00 hores nel salón d’actos del IES Cangas del Narcea, dientro de les xeres complementaries de la Universidá Asturiana de Branu (UABRA) va celebrase una mesa redonda embaxo’l títulu “Llingua Asturiana y TV” con Antonio Virgili, Próspero Morán y Carlos Suari. L’actu enmárcase dientro de los cursos que celebra l’Academia de la Llingua Asturiana hasta’l próximu 12 d’agostu.

Ye una actividá abierta na que Próspero Morán (periodista y director d’Asturnews), Carlos Suari (presentador del programa ¡Acuto! de la RPA y A galmiaes na TPA) y Antonio Virgili (Direutor de Rellaciones Corporatives de la RTPA) falarán acerca de la presencia del asturianu na televisión.

La emisora llibre Radio Kras, asitiada nel 105 del dial FM, emite dende esti martes 31 de mayu un programa “El corrector”, nel que teniendo la llingua asturiana como vehicular va sentise tolos martes dende les 22 a les 23 hores, música negro: Calypso, Funk, Jazz, Mento, Reggae, Rocksteady, Ska, Soul…, “amás de derivaos, mezcliendes, revivals, covers y perversiones varies”, anuncien dende la dirección del programa.