Comunicación

Habrá Android en llingua asturiana en 2014 según vieno acabante dar anuncia Sofastur na so web, tres les primeres pruebes, y dempués d’un añu lluchando pol proyeutu, Softastur acaba recibir el OK, y dase asina’l primer pasu pa poder tener cualquier teléfonu d’Android n’asturianu, cásique tres años depués de qu’Asturnews presentara la primer aplicación n’Android pa lleer noticies n’asturianu.

La noticia apaecía ayeri na web de noticies de l’asociación Softastur que llevaba más d’un añu tres del proyeutu y ye la responsable de cásique tolos avances que se dieren nesti ámbitu al que nun-y ufre nin la más mínima atención l’alministración del Principáu.

Asturnews llanzó la primer aplicación en llingua asturiana que se desenrrollaba n’Asturies y que se podía descargar nun teléfonu móvil con sistema operativu Android, que yera amás la primer aplicación en llingua asturiana que se facía pa móviles de última xeneración, tamién conocíos como smartphones.

L’aplicación qu’entamo a poder descargase dende l’Android Market n’abril del 2014 foi seguida por delles otres que se deselvolvieron dende l’ambitu del software llibre por SoftAstur y dellos collaboradores de l’asociación. Softastur lleva más de diez años trabayando de baldre pol espoxigue de la informática llibre en llingua asturiana.

Web de noticies de Softastur

El programa de la TPA “Territoriu Sidreru”, presentáu por Inaciu Galán, lleva a los espectadores esti domingu a les 15 hores, a un llagar familiar de la parroquia xixonesa de Deva, el Llagar Piñera. La gastronomía y la sidra mécense nel eventu ¡Ostras, qué sidra!, del que’l programa amuesa tolos detalles. Con Iván de la Plata fálase del so llibru últimu, un averamientu al mundu la sidra, enllenu de semeyes y con testos tamién n’inglés, de cara al turismu que visita Asturies.

El programa pasa en Llangréu una xornada colos entendíos en sidra que visiten el llocal y cola la familia que rexenta’l chigre Río II de Sama, rematando esta edición del programa conociendo en “¿Sabíes qué?” la lliteratura más sidrera y con Fernán Gonzali Llechosa, daqué más de vocabulariu de la nuesa bébora.

Esti vienres 27 d’avientu, TPA emite pela primer vez na historia una película doblada al asturianu. Trátase d’El rostru impenetrable, protagonizada y dirixida por Marlon Brando. Dende la Xunta pola Defensa de la Llingua Asturiana (XDLA), organización que lleva años reivindicando una televisión pública comprometida cola llingua y cultura del país, queremos mostrar el nuestru satisfacción pola iniciativa al tratasa d’un fechu históricu pa la normalización llingüística. La XDLA confía en qu’esti trabayu nun quede nun casu aisláu y sía’l puntu d’arrinque pal nacimientu d’una industria del doblaxe n’Asturies, coles consecuencies positives qu’esto tendría pal empléu nel sector audivisual.

Y ye qu’amás de como pegollu de la normalización al mostrar que l’idioma ye válidu en tou tipu de situaciones, el doblaxe supón l’aniciu d’una industria que da trabayu a traductores, actores y empreses de doblaxe. Asina, l’aparición de TVG en Galicia xeneró una industria que mantién a 300 persones y a seis empreses de doblaxe. Otra manera, l’asociación quier volver a recordar la importancia de facer un apueste pola emisión de dibuxos animaos n’asturianu. Hai que destacar que TPA ye la única televisión europea d’una comunidá billingüe que nun emite programación pa los más neños na llingua propia. Amás, esta programación podría xugar un papel importante como material lúdico pa les clases d’asturianu.

La XDLA recuerda que nel Informe sobre la necesidá d’una programación infantil n’asturianu, la organización señaló la importancia de poner en marcha una escuela de doblaxe encargada de formar a los profesionales que trabayen nes primeres series y películes que los asturianos puedan ver nel so idioma. Too ello, en collaboración cola Dirección Xeneral de Política Llingüística del Gobiernu d’Asturies y el sector priváu, tendría que ser el primer pasu que permitiere’l nacimientu d’un Serviciu Asturianu de Doblaxe, encargáu de coordinar la selección de ficción ayena, la xestión de derechos y el doblaxe de les producciones, amás de la promoción de la ufierta y de validar el rexistru llingüísticu pa la so emisión posterior en TPA.

Llaboral va acoyer esti vienres, 27 d’Avientu, la I Xornada de Autoedición d’Asturies, que pretende ser un puntu de partida pa establecer una rede de distintos ceadores que se dediquen a la edición de publicaciones dende la premisa del DIY [acrónimo n’inglés de Failo tu mesmu]. La iniciativa ye, amás, una forma de rellacionar l’Arquivu d’Artistes Asturianos con esti tipu de trabayu que se mueve ente la ilustración, la edición de testu y la información subversiva y van amosase los fanzines tantu dixitales como impresos qu’esisten nos fondos de la Mediateca_Archivu de Llaboral.

Ente les cuatro y les ocho de la tarde, l’espaciu Chill-Out del Centru d’Arte va acoger les distintes intervenciones, presentaciones y un mercadín de fanzines. Amás un conciertu, a los seis de la tarde, al cargu de Proyeutor Flüjendorf, con soníos en vivu que se faen visibles al xenerar vibraciones nun fluyíu.

Estos soníos creense a partir de diversos preseos: didgeridoo, kalimba, guitarra, percusión, korg kaoos, korg microkorg, xiblatu nasal, flauta, fujara, kou xiang, bansuri…

http://proyector-flujendorf.tumblr.com/ http://www.youtube.com/user/proyectorflujendorf https://soundcloud.com/proyeutor-flujendorf http://proyectorflujendorf.bandcamp.com

A lo llargo de too el día va proxectar en loop el curtiu d’animación. Cómo faer un fanzine, qu’Elena Duque fixo en 2010 pal festival Autoplacer (del CA2M), de la mano de Xerséis pa los Monos.

Cada vegada suena más a tópicu pero ye la realidá que va sufrir esto sábado un estruje peresperáu: los dinosaurios como enxamás antes viéranse en televisión: Planeta Dinosauriu ye una de les más ambicioses producciones de la BBC qu’agora se va esfrutar n’abiertu n’España de la mano de Energy que va ufiertar la serie esta próxima fin de semana.

La gran novedá qu’apurre Planeta Dinosuario pa los amantes d’estos animales extintos ye’l fechu de suponer una fiel actualización a les últimes investigaciones científiques. Planeta Dinosauriu amuesa imaxes que recreen la vida d’estos xigantes qu’apoderaron la Tierra mientres millones d’años. Esta producción utilizó les postreres técniques por ordenador pa construyir un mundu yá perdíu.

Pa esti estrenu especial Energy apueste por un bloque llamáu Energysaurus que va incluyir esti sábadu la emisión de la quinta temporada d’Invasión Xurásica (sábadu y domingu a les 19:00 hores), la miniserie “Mundu Perdíu” (domingu, 22:00 hores) y la tv movie “Planeta Feroz” (domingu, 00:00 horas).

El capítulu cuartu de Territoriu Sidreru visita esta selmana Nava y la cai Gascona d’Uviéu. TPA emite’l programa esti domingu a les 15 hores, y a les 16 hores n’A8.

El programa de la “Territoriu Sidreru”, presentáu por Inaciu Galán, llévanos nesta ocasión hasta Nava, onde conocemos el Llagar Viuda de Angelón, que coles sos instalaciones tradicionales y la moderna fábrica de Pomar, faen sidra p’Asturies y pa otros llugares del mundu, y un chigre, La Figar, que tien por dueñu a un verdaderu espertu na preba de sidra, Gumersindo Martínez, y una cocina coles cebolles rellenes como protagonista. Na cai Gascona, el bulevar de la sidra d’Uviéu, el programa avérsase a la celebración d’un amagüestu con sidra del duernu y castañes.

Una parada en Noreña con Toño Martínez da a conocer los antiguos llagares d’esti conceyu, el más pequeñu d’Asturies, que llegó a cuntar con más d’una decena. En “¿Sabíes qué?” conocemos los efeutos positivos de la sidra na salú, que tán reconocíos dende va sieglos por médicos del mundu enteru. El programa remata con Fernán Gonzali Llechosa y el so repás a “La pallabra sidrera”.

Los programes anteriores pueden vese en TPA a la carta:
Programes anteriores de Territoriu Sidreru en TPA a la carta

Dende la Corriente Sindical d’Izquierdes (CSI) vienen acabantes de manifiestar, “ante la sanción impuesta pola empresa RTVE n’Asturies al periodista Xuan Cándano, por unos fechos asocedíos va más de venti años, qu’en nengún casu son constitutivos de sanción”. La CSI “solidarízase col trabayador y quier denunciar públicamente la persecución a la que se ve sometíu por exercer llibremente’l derechu a la información”. Nesi sen, el sindicatu desplica que “los fechos vienen motivaos pola publicación na revista Atlántica XXII, de la que’l trabayador ye direutor, d’un reportaxe sobre la situación que traviesa UXT-Asturies na actualidá, con datos comprometíos y fidedignos sobre los sos problemes llaborales y financieros, lo que xeneró una actuación represiva pola Sección Sindical d’UXT na empresa RTVE denunciando a un compañeru, Xuan Cándano, ante’l xefe de personal por un supuestu ya imaxinariu incumplimientu del réxime d’incompatibilidaes”.

Poro, denuncia “la complicidá de la empresa RTVE cola UXT, sancionando unos fechos que nun aguanten nin el más mínimu rigor xurídicu. Ellos sabrán qué favores deben al sindicatu mentáu pa someter a ún de los sos trabayadores a un acosu propiu d’una auténtica mafia sindical, que prioriza la “omertá” sobre la tresparencia. Y denunciamos como daqué absolutamente vergonzoso l’actitú d’un pretendíu sindicatu de clas, qu’aplica la reforma llaboral, que namás ataquen cola boca pequeña, a los sos propios trabayadores, practicando nes sos empreses una política propia del más escoyíu y corruptu empresariáu español”.

Per primer vegada en 8 años, el Comité d’Empresa de RTPA pudo comparecer ante la Xunta Xeneral del Principáu pa esponer la so visión sobre’l presente y el futuru del proyectu audiovisual públicu asturianu, aprovechando pa denunciar el tapecimientu sistemáticu pelos medios de comunicación privaos asturianos de cuanto asocede na TPA: “esiste un ferriu control informativu na prensa escrita asturiana, como en los informativos de la radiotelevisión asturiana”. El presidente del Comité tamién denunció la mala xestión y la provisionalidá de la dirección que lleva dos años ensin afitase nel Parlamentu.

El presidente del Copmité d’Empresa sasturiana dexó claro que “la sociedá asturiana desconoz por causa d’esi control informativu tantu los problemes que carecen el trabayadores de la RTPA o la nefasta xestión que sufrimos en silenciu, lo qu’amenorga la calidá del serviciu públicu qu’emprestamos”. La denuncia del Presidente del Comité d’Empresa foi afilvanando informaciones que considera despintaes a la sociedá como’l fechu de que “la dirección de la RTPA perdiera más de 100 xuicios en relación cola estructura llaboral” y que se despidió a 200 trabayadores de les empreses auxiliares. En cuanto al presupuestu de la RTPA’l Presidente asegura la imposibilidá de faer una valoración ensin antes realizar un analís de la xestión: “paez ser que’l presupuestu va caltenese nuna política continuista que nun ataya los problemes y retayos d’anguaño..: en 2013 sufrimos un retayu salarial del 10% el pasáu añu y llevamos un 20% de retayu acumuláu dende 2009”.

El presidente del Comité denunció que la estructura de la empresa nun s’alteria salvu p’afayase a los xuicios que se pierden de trabayadores d’empreses auxiliares vencíos irregularmente.

El presidente del Comité pidió un cambéu d’actitú na dirección y reclamó que persista una dirección en funciones que lleva dos años y que se nome un Director como manda la llei na Xunta Xeneral. Lo que consideró amuesa’l pocu interés de los partíos por tener una TPA como merez Asturies.

Esti próximu viernes 27 d’avientu, a les 22,30 hores, emitiráse’l doblaxe n’asturianu, realizáu por Gonzali Producciones, de la pelicula “El rostru impenetrable (One-Eyed Jacks, 1.961)” na que ye la primer programación d’una película doblada al asturianu, na que l’Academia de la Llingua Asturiana fizo l’asesoramientu llingüísticu. La película ye un exemplu de lo cenciello que sedría una programación en llingua asturiana enxertada nel modelu de programación de la TPA d’anguaño.

Esta primera emisión en TPA d’un llargumetraxe dobláu a la llingua asturiana ye frutu de la collaboración ente Gonzali Producciones y la canal televisiva autonómica. Dirixíu y producíu por Illán Gonzali, cuenta con un repartu de más de venti actores de doblaxe, ente ellos Carlos Novoa (Marlon Brando), José Antonio Lobato (Karl Malden), Ana Blanco Rozada, Ana Díaz Morán, Andrés Presumido, Carlos Alba, Alberto Rodríguez, Silvino Torre, Lluis Antón González, Olga Cuervo, Eladio Sánchez, Verónica Gutiérrez, Marisa López Diz, Ángel Héctor Sánchez, Norberto Sánchez, Carlos González, Begoña Faro, Mario Artidiello, Samuel Gradín, Hugo García, Carlos Rodríguez, Jéssica de la Paz, Xulián García y Fernando de Luxán.<&p>

“El rostru impenetrable” tien una duración de 145 minutos y ta interpretáu por Marlon Brando, Karl Malden, Pina Pellicer, Katy Jurado, Ben Johnson, Slim Pickens,Larry Duran, Sam Gilman, Timothy Carey, Miriam Colon, Elisha Cook Jr., Rodolfo Acosta y Hank Worden. Foi la única película dirixida por Marlon Brando. En 1961 tuvo nominada al Oscar na categoría de Meyor Fotografía (collor) y llogró la Concha d’Oro a la meyor película nel Festival de San Sebastián.

La película narra la hestoria de Rio, que tres d’atracar un bancu fronterizu, vese traicionáu por Dave, el so meyor amigu y compañeru de correríes. Apresáu polos rurales mexicanos pasa cinco años nel presidiu de Sonora d’onde escapa pensando en vengase. Al poco alcuentra a Dave, qu’agora ye un home respetable y sheriff de Monterrei.

Esti domingu a les 15 hores en TPA y a les 16 n’A8 emitirase’l tercer capítulu de Territoriu Sidreru, el nuevu apueste de la TPA dientro la programación en llingua asturiana qu’entamara so primer temporada el primer domingu d’esti mes d’Avientu. Nesti capítulu de Territoriu Sidreru y de la mano d’Inaciu Galán, el programa de la TPA llega al Llagar J. Tomás, en Villaviciosa. N’Avilés entrevisten a unu de los coleccionistes d’etiquetes con más etiquetes atropaes.

El programa visita l’ambiente folixeru del chigre La Ballera, en Villaviciosa, onde la música de la gaita acompaña a los veceros ente culín y culín.

Amás, avérase a la celebración de la Primer Sidre l’Añu, que cada añu axunta a llagareros y entendíos en sidra pa prebar la primer sidre de la temporada, celebrando amás una bayurosa ufierta d’actividaes culturaes. En “¿Sabíes qué?” falen nesta ocasión de los tipos de llagares y como en cada programa, Fernán Gonzali Llechosa deprende al telespectador pallabres sidreres na so microsección “La pallabra sidrera”.