Cine

Asturnews ufre una galería de semeyes de los actos del Festival de Cine Asturianu, celebráu esta selmana en Madrid. Los curtiumetraxes Días perdidos, de Senén Fernández y Puntu, d’Eva Gallego resultaron ser les obres premiaes nes categoríes de Meyor Curtiumetraxe en castiellán y n’asturianu respectivamente.

La entrega de premios tuvo llugar el llunes 9 de mayu nel Atenéu de Madrid, llugar onde nació’l Festival de Cine Asturianu un 27 d’abril del 2005 pa celebrar el Centenariu del cine asturianu. Como meyor película premióse a L’horror de la dama del llagu, del avilesín Diego Váquez. Como meyores actores recibieron los premios Jesús Pardo, por Días perdidos y Almudena gallego por Anorexia. La productora Hi-Video recibió’l Premiu al Meyor Documental pol trabayu tituláu “Concejo de Tineo naturaleza a la carta” qu’entregó Gil Parrondo.

El guionista y cineasta asturianu Florentino Soria (Xixón, 1917) entregó los premios al meyor curtiumetraxe en castiellanu y a la meyor película mentantu Gil Parrondo entregó los premios al meyor documental y curtiu n’asturianu. Los premios a los actores entrególos la directora y guionista Rocío García. Los xuraos nesta edición fueron los realizadores Teresa Marcos, Iñkli Ibisate y Ángeles Muñiz, premiaos y participantes n’anteriores ediciones del Festival. El Festival nesta edición rindió un homenaxe a los guionistes asturianos en concreto al gran Carlos Blanco (Xixón, 1917), onde se faló de les dificultaes y situación de los guionistes na industria del cine, repasando la trayectoria vital y cinematográfica de dos grandes guionistes asturianos como’l xixonés Florentino Soria, que cuntó y repasó tola so trayectoria nel mundu del cine yá qu’amás de guionista y profesor de la escuela oficial de Cine foi presidente de la Filmoteca Española y de Raimundo García, director amás de dos películes, que llueu d’emponderar mui positivamente’l llibru de Xaviel Vilareyo presentáu faló de la relación a vegaes difícil de los guionistes y los directores según la so propia esperiencia.

El Festival presentó en Madrid el llibru “Historia del cine asturianu” de Xaviel Vilareyo que tuvo mui bona acoyida. A la Gala d’Entrega de Premios asistieron los nominaos y otres personalidaes del mundu del cine y la televisión como los yá citaos Florentino Soria, Gil Parrondo, Raimundo García, María Casal, Lola López, Javier Longas, Rocío García, Miguel Losada y Alfonso Suárez.

Galería de semeyes del Festival

Intersecciones CaxAstur 2011 entmó la so andadura’l martes 10 de mayu y va prollongase hasta’l miércoles 15 de xunu, incluyendo trece conciertos, siete llargometraxes y dos meses redondes.

Programa completu d’actividaes

El Festival de Cine Asturianu entregará los premios de la so sétima edición nuna Gala que tendrá llugar nel Atenéu de Madrid el próximu llunes 9 de mayu onde se rendirá un homenaxe al guionista Carlos Blanco como Premiu d’Honor d’esta 7a edición del Festival.

Los trabayos finalistes nominaos a los premios na categoría de curtiumetraxes nesta edición són los siguientes: Vidas, de Nacho Fernández y Pablo Bermejo; Idealizando, de Moisés Tuñón; Duets el precio de la fama, de Tito Montero; Puntu, d’Eva Gallego; Cruces, de Moisés Tuñón; Tacones, de Benjamín Villaverde; Anorexia, de Kiko y Javier Prada; El detective imaginario, de Juan José Bors y Días Perdidos, de Senén Fernández.

Na categoría de meyor actor los finalistes nominaos son: David Ballesteros por Idealizando, David Rionda por Duets el precio de la fama; Javier Longas por Días perdidos y Jesús Pardo por Días perdidos.

Les nominaes al Premiu a la Meyor Actriz són: Lara Fernández-Noriega por Cruces; Almudena Gallego por Anorexia y Susana Carnero por El detective imaginario.

Carlos Blanco, Premiu d’Honor del 7u Festival de Cine Asturianu

El guionista asturianu Carlos Blanco recibirá’l Premiu d’Honor del Cine Asturianu que concede’l Festival de Cine Asturianu na so sétima edición. L’homenaxe a Carlos Blanco tendrá llugar el próximu 9 de mayu del 2011 nel Atenéu de Madrid, onde s’entregarán los Premios d’esta edición del Festival.Carlos Blanco Hernández ye unu de los guionistes asturianos más importantes. Nació en Xixón el 13 de marzu de 1917. Marchó pa Madrid en 1934 nun pudiendo terminar nengún estudiu por causa de la Guerra Civil yá que lu mobilizaron en 1936 pal exércitu republicanu y por ello sufrió depués xuiciu sumarísimu poles tropes franquistes debío a la so condición de teniente d’artillería y por ello tuvo presu depués de la guerra. Escribió pa les revistes Primer plano y Cámara. El so primer contactu cola escritura pal cine foi a mediaos de 1940 cuando ganó una mención honorífica de los premios del sindicatu vertival d’espectáculos pol guión tituláu Don Beltrán de la Cueva que nunca llegó a rodase. El so primer guion pal cine foi Cuando llegue la noche, película de 1946 sobre la obra teatral homónima de Joaquín Calvo Sotelo. Otru guion suyu foi el premiáu de La princesa de los Ursinos (1947), al que siguió en 1948 el guión de Les agües baxen negres, de temática asturiana y basáu na novela L’aldea perdida de Palacio Valdés. En 1955 ruédase en Xixón otru de los sos guiones: Los pexes coloraos, dirixida por José Antonio Nieves Conde. Esti mesmu añu Carlos Blanco recibe un contratu de la 20th Century Fox pa escribir un guion, Zaino, que tampoco llegó a rodase. Pa la R.K.O escribió Un gánster nel colexu y Melva, versión llibre d’un cuentu de Máximu Gorki, razón pola que vivió nos Estaos Xuníos un añu.

La sétima edición del Festival de Cine Asturianu fadráse en Madrid onde s’entregarán un añu más los Premios del Festival nes sos diferentes categoríes. L’eventu tendrá llugar el 9 de mayu nel Atenéu de Madrid, allugáu na cai del Prado 21, escenariu onde ñació la primer edición del Festival de Cine Asturianu nel añu 2005 col apoyu de la Sección de Cine d’esta vieya institución. Nos actos, d’asistencia llibre y de baldre, amás de la entrega de Premios del xuráu d’esta edición tendrá lugar la proyección de los curtios ganadores y homenaxes a destacaes personalidaes del cine asturianu.

Tamién va presentase, per primer vegada en Madrid, el llibru “Historia del Cine Asturianu”, de Xaviel Vilareyo, un documentáu repás a tola hestoria del sétimu arte asturianu dende la mesma llegada del cine a Asturies hasta l’actualidá.

Los xuraos d’esta edición del Festival són los realizadores Teresa Marcos, Iñaki Ibisate y Ángeles Muñiz, participantes y premiaos n’anteriores ediciones del Festival. El Festival promociona trabayos documentales y de ficción de realizadores asturianos o bien rodaos n’Asturies o en llingua asturiana col fin de dar a conocer el cine asturianu más actual asina como reconocer a les figures más destacaes de la hestoria del cine asturianu. Gil Parrondo, Mary Paz Pondal, Xuan Gona, Gonzalo Suárez, Lilián de Celis y Juan José Otegui yá pasaron pel Festival de Cine Asturianu recibiendo’l so Premiu d’Honor del Cine Asturianu n’anteriores ediciones.

Del 13 al 16 d’abril, el Vieyu Institutu Xovellanos de Xixón, acueye la celebración de DocuXixón, una amuesa, ensin calter competitivu, entamada pola Fundación Municipal de Cultura, Educación y Universidá Popular, al traviés del so Centru d’Imaxe.

Les obres escoyíes pertenecen al campu del documental, entendíu nun sentíu ampliu, dando cabida a les distintes variantes que se cultiven dientro d’esti xéneru audiovisual. Les proyecciones, en formatu DVD, van tener llugar nel Salón d’Actos del CCAI, con una capacidá pa 120 espectadores y con accesu llibre y gratuitu, hasta completar l’aforu, dende les cinco la tarde, sacante’l sábadu, qu’entamen a les siete.

Programa completu de DOCUXIXÓN

Esti llunes 11 d’abril, a les 11,30 hores, el Cine Felgueroso de Sama acoyó la presentación oficial del documental “Xuacu Amieva, onde l`agua ñaz”. Nelli faise un percorríu pela trayectoria musical y vital d’esti gran gaiteru y multiinstrumentista, referente de la música asturiana dende los años 80

El documental, nel que collabora l’Ayuntamientu de Llangréu, descúbrenos canciones y paisaxes al traviés de personaxes como Carlos Núñez, José Manuel Tejedor, Fred Morrison, Ll.umerinos de Ll.umés, Alberto Fdez Velasco o Lisardo Lombardía. Esti trabayu grabóse nos conceyos de Casu, Cabrales, Llanes, Xixón y Llangréu y desenvolvieron la so realización Tumismocine y alumnos y alumnes del CISLAN.

El Premiu Lux, creáu en 2007, simboliza’l compromisu del Parllamentu Européu col esfuerciu creativu de la industria cinematográfica europea. Al traviés de les sos ediciones añales, el Premiu pon un acentu naquelles películes que disparen al corazón del alderique públicu, al traviés de trabayos qu’esquicen y cuestionen valores compartíos tresestatales y el nivel de materialización del proyectu de construcción europea.

Los discursos narrativos de les películes escoyíes roblen moliciones como inmigración, xusticia, solidaridá, llibertaes públiques y derechos fundamentales, dexando acolumbrar en cada obra rabaseres fugaces de la vida de los europeos, los sos convencimientos y duldes alrodiu de cuestiones d’identidá.

El director del Festival Internacional de Cine de Xixón, José Luis Cienfuegos foi escoyíu pol Parllamentu Européu pa formar parte de la Comisión Selectiva esti añu. Na comisión va tar xunto a personalidaes del sector cinematográficu tales como Marion Doring, directora de l’Academia del Cine Européu, Aviva Silver, directora del Programa Media, Roberto Olla, director executivu de Eurimages o Catherine Buresi, directora executiva del European Filme Market del Festival de Berlín.

Güei, xueves 3 de marzu, a les 19 hores, L’Arribada y Gonzali Producciones entamen un segundu pase en Xixón d’El tercer home, que ye’l tercer llargumetraxe dobláu al asturianu. Sedrá nel salón d’actos del Centru Municipal Integráu de L’Arena, allugáu na cai Canga Argüelles de la villa de Xovellanos. Con esti actu y según la organización del mesmu “dase respuesta a les munches solicitúes de persones que nun pudieren tar na primera proyección el pasáu 5 de febreru”.

El Conceyu d’Avilés convoca una nueva edición d’esti certame, al pueden presentase obtres hasta’l 18 de marzu. El festival va desendolcase del 4 al 7 de mayu, con seis premio ente 2.100 y 750 euros.

Los unvios tienen de facese a la Oficina d’Información Xuvenil d’Avilés, asitiada na cai Fernando Morán 26, baxu, 33400. Les bases pueden consultase na web del Conceyu, terminando’l plazu pa la recepción de películes el 18 de marzu.

Bases completes del certame

La Televisión del Principáu d’Asturies (TPA) dio anuncia de la emisión, esti llunes 21 de febreru, a les 00:00 hores, del tercer programa “Minicine”, colos curtiumetraxes La mirada circular (2010), de Jim-Box, Iván Sáinz-Pardo y Dirk Soldner; Puntu (2009), d’Eva Gallego Valdés –na so versión orixinal n’asturianu–; y Tacones (2009), de Benjamín Villaverde.

“Puntu” cunta la hestoria d’un vecín, Arsenio, que nun sal nunca de casa. La cinta, d’once minutos de duración, rodóse en Xixón y Villaviciosa y afonda nes razones del enzarru d’Arsenio, que dulda acerca de los motivos reales polos que nun sal de casa.

El curtiu algamó’l reconocimientu del públicu y el premiu Día d’Asturies del 47 Festival Internacional de Cine de Xixón.