Cine

Diez películes son les que van competir esti añu n’Enfants Terribles, la sección que’l Festival Internacional de Xixón dedica a proyectar los estrenos del meyor cine dirixíu al públicu infantil y adolescente. Esta mañana presentóse’l ciclu en Xixón y adelantróse’l programa d’actividaes paraleles.

Dientro de la programación destaca “Kirikú y las Bestias Salvajes”, película francesa d’ animación que’l so protagonista llogró entusiasmar a espectadores mozos de tol mundu coles sos aventures; “The Devil’s Miner”, premiada en festivales tan prestixosos como los de Rotterdam y Edimburgo; “Camping à la Ferme”, del director de “Nacional 7”, que tien como guionista al ministru francés pa la Promoción de la Igualdá d’Oportunidaes, Azouz Begag, y “The Education of Shelby Knox”, galardonada nel Festival de Sundance, ente otros filmes.

Les temátiques que s’abarquen nesta 43 edición, toes cola so recomendación específica pa grupos d’edá, continúen na llínea d’años anteriores: dende la omnipresente cultura de la cai (rap, hip hop) pasando por problemes de desarraigu familiar, conflictos raciales, reinserción social, ecoloxía, formes alternatives de vida, trabayu y esfuerzu por persiguir sueños y vocaciones, enfrentamientos xeneracionales, repartu equitativu de la riqueza, etc.

El premiu en metálico pa la película ganadora d’ esta sección ye de 10.000 euros, siendo los propios alumnos qu’acudan a les proyecciones los qu’escueyan colos sos votos el film ganador.

Por segundu añu consecutivu van celebrase dos actividaes relacionaes cola sección Enfants Terribles: Talleres Didácticos y Alcuentros colos Directores. Nel casu de los “Talleres de… cine” (en colaboración con Espaciu de Creación y Didáctica), trátase d’una esperiencia lúdica, didáctica y creativa que se va entamar después del visionáu de les películas. Pela so parte, los Alcuentros colos Directores van facese na Biblioteca Pública Xovellanos, y consisten nun contactu directu ente los alumnos asistentes a la proyección y el director de la película.

El Festival de Cine de Xixón incorpora esti añu a la so sección competitiva un xuráu formáu por críticos independientes y que va premiar a la meyor película presentada a concursu. Espertos de la Federeción Internacinal de Prensa Cinematográfica (FIPRESCI) van ser los encargaos de componer esti xuráu.

La prestixosa Federación, que destaca pol so altu grau de desixencia a la hora de valorar aspectos como la independencia y la calidá de contenío de los festivales, tien como oxetivu “salvaguardar la llibertá y la ética de los críticos y periodistes especializaos en cine, asina como promover el desarrollu de la cultura cinematográfica”. El intercambio de idees y de la propia esperiencia ente profesionales de tolos países tamién ye prioritario pa la FIPRESCI, qu’actúa como una fundación pal diálogu permanente, allonxada de les distinciones polítiques ya ideolóxiques.

Fontes del Festival de Xixón señalen que dase la circunstancia de que películes como “Dog Days” y “Vento di Terra”, que fueron galardonaes nel certame playu col Premiu Principáu d’Asturies al Meyor Llargometraxe, recibieron después el Premiu FIPRESCI a la Meyor Película Revelación de la temporada nel Festival de Cannes.

Festivales como los de San Sebastián, Valladolid y Sitges ya contaben con este reconocimiento por parte de la FIPRESCI, un organismu fundáu en 1930 por un grupu de críticos europeos, que llantaron como principiu básicu el respetu a la identidá de caún de los miembros.

El xuráu de la FIPRESCI súmase a los ya esistentes hasta agora, el xuráu del Festival y el xuráu mozu.

El Festival Internacional de Cine de Xixón organiza un ciclu dedicáu a repasar la filmografía de John Huston a lo llargo d’ochobre y payares. Seis de les sos meyores películes van proyectase nesta amuesa, qu’inclúi títulos como “La xungla d’asfaltu” y “El ferre maltesu”.

Dende’l prósimu 1 de ochobre y hasta el 19 de payares, el Centru Municipal “Xixón Sur” y el Teatro Xovellanos van acoyer les proyecciónes d’esti ciclu dedicáu al cineasta irlandés-americanu. “Fat City” (1972) ye’l primer filme programáu; van siguilu “Paséu pel amor y la muerte”(1969), “Moby Dick” (1956), “El ferre maltesu”(1941), “El tesoru de Sierra Madre”(1947) y “La xungla d’asfaltu”(1950).

La edición númberu 43 del Festival Internacional de Cine de Xixón va celebrase del 24 de payares al 2 d’avientu con una programación tan intensa y diversa como la d’ediciones anteriores. Una retrospectiva del nuevu cine italianu y homenaxes a realizadores como la francesa Claire Denis, l’americanu Todd Solondz o la finlandesa Pirjo Honkasalo formen parte del menú d’esti añu.

La fidelidá a les sos señes como atopada de referencia del cine independiente ye’l leit motive de la cuarenta y tres edición del Festival de Xixón. Una sección oficial empobinada a la proyección de llargometraxes y cortos, coles otres avezaes estayes como Enfants Terribles (pa neños y mozos), o la nomada Desorde y Conciertu (documentales musicales), amás de Llendes (películes esperimentales na llende ente la ficción y la realidá) y del non menos clásicu Día d’Asturies, dedicáu a amosar cortometraxes de realizadores nuevos del nuestru país, son les propuestes de la edición en marcha.

El mexicanu Guillermo del Toro va producir el llargometrase “El orfanato”, una hestoria escrita pol cineasta y guionista asturianu Sergio Sánchez. José Antonio Bayona va dirixir esti triller de terror psicolóxicu que va empezar rodase prósimamente nel conceyu de Valdés.

Sergio Sánchez, autor de cortometraxes como ‘Temporada baja’ o ‘7337’,ye’l guionista de la producción hispano-mexicana “El Orfanato” agospiada pol cineasta Guillermo del Toro. Ye’l primer saltu al cine comercial d’un realizador que forma parte, xunto a autores como Ramón Lluis Bande, Jorge Rivero o el tándem Juan Luis Ruíz y Lucía Herrera, del movimientu nomáu Nuevu Cine Asturianu. El so últimu trabayu cinematográficu fue l’adaptación del poema “La muerte” de Roberto González-Quevedo dientro’l programa “Cinco poemes” estrenáu na Selmana les Lletres.

La séptima edición del ciclu de cine Peor Imposible va proyectar en Xixón una quincena de filmes de los consideraos unánimemente pésimos del xéneru fantásticu y de terror. Decoraos de cartón piedra, mostruos que provoquen hilaridá y efectos especiales dignos d’una tienda d’artículos de broma son dellos de los rasgos comunes a les producciones programaes.

El ciclu escomienza’l prósimu 29 d’agostu y va durar hasta’l 3 de setiembre. Dellos de los filmes que van proyectase pertenecen por méritos propios a la categoría de les peores películes nunca filmaes, ente ellos auténticos clásicos de la serie B como “El humanoide», «Ursus y el terror de los kirghisi» o «La invasión de los zombis atómicos».

Producciones de baxu presupuestu de diversos países como Xapón, México o Arxentina igüen el programa d’esta nueva edición na que se va facer remembranza de dos figures esenciales del cine “freakie”: Michel Reeves y Alejandro Jodorovsky. Un cursu sobre trucos ópticos como efectos especiales completa’l programa de la sétima edición de Peor Imposible.

Les proyecciones al aire llibre del Cerru de Catalina en Xixón vuelven un veranu más con tres títulos aptos pa tolos públicos. incluíos los más desixentes. Millions de Danny Boyle, La casa de les dagues voladores de Zhang Yimou y America Team de Trey Parker son les películes que van poder vese dende esti xueves 18 al sábadu 20.

La primera de les películes: Millions, ye una coprodución británico-estaounidense protagonizada pol actor infantil Lewis McGibbon y que cuenta la hestoria d’un rapacín al que-y cai del cielu una maleta enllena de billetes de dólares. El viernes 19 lléga-y el turnu a la producciòn chino-hongkonguesa La Casa de les Sagues Voladores, una película d’acción y emociones fuertes ambientada nel tiempu de la decadencia de la dinstastía Tang.

L’últimu de los títulos proyectaos nel Cerru de Santa Catalina va ser America Team (World Police), una ácida crítica del nuevu orde mundial empobináu polos Estaos Uníos escrita polos creadores de South Park y protagonizada íntegramente por marionetes.

Los cineastes Xuan Lluiz Ruíz y Llucía Herrera prosiguen la selmana qu’entra el rodaxe del documental “L’Escaezu”, una llamada a la memoria de los Neños de Rusia entamada alrodiu del conciertu que’l grupu Mus-yos dedicó nel Centru Español de Moscú. La grabación emplea una técnoloxía dixital d’alta definición, pionera n’Asturies, en colaboración cola productora DpComunicación.

Tres el rodaxe va unos meses en Moscú recoyendo’l conciertu de Mus énte los Neños de la guerra y testimonios de protagonistestes directos residentes na capital rusa, Ruíz y Herrera van reanudar la prósima selmana el procesu de grabación del so documental con “neños” que viven anguañu n’Asturies.

En palabres de los propios directores de la película, “L’Escaezu” ye “un intentu de eliminar la amnesia, de recobrar los fragmentos de la nuestra historia, realidaes pasaes y presentes, les de los neños de la guerra asturianos, que han fixase na memoria del presente y del futuru”. Xuan Lluis Ruíz y Llucía Herrera consideren que ye necesario el “que la historia trescienda, eliminar l’escaezu, siguir lluchando contra esa amnesia aneya y desfasada”.

El documental, que cuenta con una ayuda económica de l’Axencia Asturiana d’Emigración, la Conseyería de Cultura y Comunicaciòn Social, y del Conceyu de Xixón, ta rodándose ente Rusia y Asturies, con testimonios de los propios protagonistes de la diáspora infantil y cola música del grupu Mus como piedra angular del entamu y el desarrollu de la película. “L’Escaezu” cuenta tamién col sofitu de l’Asociación de Repatriaos de l’Antigua URSS “Pablo Miaja”.

Na so parte técnica, Ruíz y Herrera van emplear un formatu de grabación inéditu n’Asturies, el video dixital d’Alta Definición nun trabayu de colaboración cola única productora qu’emplea esta tecnoloxía na nuestra comunidá: DpComunicación de Julio García Cedrón. Esta tecnoloxía ufierta unos resultaos d’alta resolución asemeyaos al formatu convencional cinematográficu.

Los directores Xuan Lluis Ruíz y Llucía Herrera son autores d’otros trabayos documentales en llingua asturiana como “Lluvina” y “Medrana”, esti últimu un llargometraxe estrenáu na última edición del Festival de Cine de Xixón.

El ciclu de cine de Serie B “Peor imposible” que se celebra en Xixón del 29 d’agostu al 2 de setiembre va impartir un taller d’introducción a los trucos ópticos nel cine dirixíu pol especialista Valentín Lorca. La Fundación Municipal de Cultura ye la organizadora del ciclu y el cursu.

El taller va ocupase d’una parte de los efectos especiales nel cine, como son los trucos ópticos tradicionales. Éstos son cada vez menos utilizados debío al puxu de los ordenadores y de la imaxen dixital, pero siguen siendo una forma de crear ilusiones énte una pantalla cinematográfica.

El conteníu del taller, impartíu por Valentín Lorca, abarca tanto los aspectos básicos de la fotografía y la so relación colos decoraos como les tresparencies, les maquetes parciales o los efectos con espeyos. Pa desarrollar estos conteníos va analizase y realizase un exemplu prácticu de cada técnica empleada.

El plazu d’inscripción pal cursu ya ta abiertu y el preciu de la matrícula ye de 17 euros. El teléfonu de contactu pa solicitar más informción ye 669 018 692 (Jesús Parrado).

Esti llunes 25 escomienza en Xixón un Cursu de Práctica Cinematográfica dedicáu a analizar los estremaos procesos creativos de la realización de filmes. Organizáu pola Obra Social y Cultural de Caxastur y coordináu pol director del Festival de Cine de Xixón, José Luis Cienfuegos, el cursu va cuntar cola participación de realizadores como José Luis Guerín, Juanma Bajo Ulloa, Chus Gutiérrez o Nacho Vigalondo.

Dende esti llunes y hasta’l prósimu viernes 29 va desenvolvese el taller de Práctica Cinematográfica estructuráu en conferencies, proyecciones comentaes y un taller diariu d’escritura de guion, asina como un apartáu especial reserváu pal xéneru curtiumetraxe. Amás de Guerín, Bajo Ulloa, Gutiérrez y Vigalondo, tamién van impartir conferencies los realizadores Álvaro Pastor y Esteban Crespo, xunta otros profesionales del procesu cinematográficu como’l coordinador de producción Eduardo Chapero, el director de fotografía Ricardo García y la montadora Julia Juáriz. El guionista Antonio Tashorras va ser l’encargáu de dar el taller dedicáu a la escritura de testos fílmicos.

Les sesiones del cursu que cuenten cola participación de realizadores van proyectar tamién dalgunos de los sos últimos trabayos. Finalmente, el viernes 29 va dedicar la xornada a analizar la realidá del curtiumetraxe nel estáu y va entamase una proyección de películes nesti formatu de directores nuevos. José Luis Cienfuegos y Roberto Cueto son los encargaos de dirixir y coordinar esta nueva edición de los cursos de práctica cinematográfica entamaos pola Obra SOcial y Cultural de Caxastur.