Cine

La Conceyalía de Cultura del Ayuntamientu Mieres presentó ayeri xunta’l realizador Jorge Rivero, organizador del certame, les bases de presentación del VI Festival Nacional de Cortos CORTOMIERES, que va tener llugar ente los díes 31 de xineru y 4 de febreru de 2006.

Depues de dos años ensin convocase, l’Ayuntamientu de Mieres vuelve entamar el Festival Nacional de Cortos CORTOMIERES, organizáu pol realizador Jorge Rivero, premiáu va poco nel prestixosu Festival Madrid Imagen por “Nenyure”, qu’espera volver batir los records de participación d’ediciones anteriores consiguiendo trayer a concursu unes 400 cintes, ente cortos, vidios y vidioclips.

Les proyecciones de los cortos van poder vese nel salón Cajastur de Mieres ente los díes 31 de xineru y 4 de febreru de 2006. Los premios van ente los 4000 euros al meyor cortu en sección oficial, hasta los 1000 euros pa los meyores vidios. El premiu especial del públicu ye de 1800 euros.

El prósimu vienres 18 de payares, a partir de les 7,30 la tarde, l’Ayuntamientu de Llanes va ufiertar nel Salón Parroquial de H.ontoria la proyección pública de los documentales más significativos de la cinematografía llanisca. Empieza d’esta manera una nueva fase del programa d’exhibición y divulgación de les históriques filmaciones puestu en marcha pola Conceyalía de Cultura al travies de la Casa Municipal de Cultura de Llanes.

Hasta agora, y dende’l pasáu mes de febreru, echáronse les películes nes cases conceyu de Po, Andrín, Cue, Valmori, Parres y San Roque. Mentes que nes prósimes selmanes va facese otro tanto nes de Barru y Pendueles.

Les películes escoyíes pa cada sesión son:

– “La llegada del tren” (1905, 5 minutos de duración), un documental rodáu pocu tiempu depues de la llegada del ferrocarril a Llanes.
– “Llanes 1917” (19 minutos), película restaurada en 1997. Rodóse en Llanes en setiembre de 1917, nes fiestes de la Virxe de la Guía pola productora francesa “Pathe Frères”.
– “Match accidentado” (1928, 2 minutos), cortu publicitariu producíu pol industrial llaniscu Ceferino Ballesteros. Ye una de les primeres producciones d’animación que se conocen n’Asturies.
– “Romería asturiana” (1942, 15 minutos), cinta na que se recueyen escenes de la fiesta de San Roque en Llanes.

Las proyección en H.ontoria va ser presentada y comentada por Jose Antonio Anca, locutor de la emisora “Antena Norte”.

El ciclu Llendes del Festival de Cine de Xixón va acoyer la estrena del nuevu llargometraxe de Ramón Lluis Bande: “El Paisano: retratu colectivu”, un dibuxu del hestóricu dirixente comunista asturianu Horacio Fernández Inguanzo fechu colos trazos de la so alcordanza en catorce testimonios directos d’otres tantes persones que lu conocieron.

El realizador xixonés desplica el doble retu que plantea la película que va estrenase nel Festival de Xixón: “per un llau tratábase de siguir afondando na memoria colectiva d’Asturies al través de l’alcordanza dexada en delles persones por una figura esencial de la llucha comunista nel nuestru país y per otru nel propiu llinguaxe documental como una nueva vuelta de tuerca d’una deconstrución”. Asitiada como parte de la serie hestórica entamada con “Estratexa”, sobre la guerrilla asturiana y en “De Lafuente”, sobre la revolucionaria Aida De Lafuente, la película sobre Horacio El Paisano quier “dir dibuxando’l rostru colectivu de la memoria d’un país”, en palabres del so autor y failo al través del testimoniu directu de catorce persones que falen de los sos recuerdos personales del lluchador comunista asturianu: “quise dexar namás los testimonios ensin tentar xerarquizar los que puedan ser más importantes de los meramente anecdóticos y qu’al través d’eses alcordances se dibuxare la figura d’Horacio”.

El realizador xixonés trabaya anguaño nun nuevu proyectu sobre la memoria colectiva asturiana, un documental sobre la cantadora de tonada Diamantina Rodríguez, nel que van participar intérpretes contemporánees como Anabel Santiago y la propia Diamantina.

Talo sucediera nos sos anteriores filmes sobre la memoria hestórica d’Asturies tamién nesti casu hai una canción que complementa’l documental. El tema que Víctor Manuel dedicó a Horacio apaez na parte final de la película cola única imaxe del dirixente comunista saludando al cantante nun actu públicu. El cantante mierense cedió de baldre’l cantar pal llargometraxe y participó na producción del tema: “tien raigaños na música popular del país como’l tema de Manta Ray n’Estratexa y el romance d’Aide en De La Fuente, nesti casu una canción con autor pero que forma tamién ya parte de la memoria colectiva”.

El realizador xixonés trabaya anguaño nun nuevu proyectu sobre la memoria colectiva asturiana, un documental sobre la cantadora de tonada Diamantina Rodríguez, nel que van participar intérpretes contemporánees como Anabel Santiago y la propia Diamantina.

La estrena de “El Paisanu: retratu colectivu” va facese dientro’l ciclu Llendes del Festival de Cine de Xixón el domingu 27 de payares a les 17.00 hores.

El documental “Cambia de vida: el viaje del Xixón Sound” de los realizadores Elena Medina y José Antonio Fernández va estrenase nel Festival de Cine de Xixón dientro del ciclu Desorden y Conciertu. El movimientu punk y el líder de los Clash Joe Strummer, el folklor del narcotráficu mexicanu, los New York Dolls y la brasileira Maria Betanha van protagonizar el restu de la filmografia proyectada nel ciclu musical del certame.

La película de Medina y Fernández sobre lo que dio de sí la escena independiente playa a finales de la década de los noventa va ser ensin dulda acoyida con abondo interés na que foi Meca musical del estáu y nel documental repásase’l papelu desenvueltu nesti diversu movimientu por grupos como Manta Ray, Doctor Explosion o Australian Blonde.

En Desorden y Conciertu va haber ocasión de ver otros ocho filmes como “Lets Rock Again”, dirixíu por Dick Rude, que tien como protagonista a Joe Strummer, fundador y solista de los Clash. El largometraxe recueye la so última xira por Estaos Uníos y Xapón al frente de Los Mescaleros, banda cola que terminó la so carrera. “Al otro lado”, un documental de Natalia Almada, afonda nel narco-corrido, un estilu de música que mueve millones na industria discográfica de los Estaos Uníos, en dura competencia col rap.

Los “New York Dolls” tamién tienen el so sitiu nesti ciclu. Embaxo la dirección de Greg Whiteley, y tres décades después del so apoxéu, reúnense los componentes que tovía viven. No que respecta a “Punk: Attitude”, repasa de la mano de Don Letts, veteranu de la escena punk y reggae del Reinu Uníu (y que va pinchar nuna de les fiestes del Festival), la historia del movimientu musical más furiosu de la historia y les sos consecuencies como revulsivu social. Intervienen ente otros Six Pistols, Ramones, Sonic Youth, Dead Kennedys, The Stooges, Suicide y The Damned.

El Teatru Toreno de Cangas proyecta’l prósimu xueves 2 de payares una amuesa de nuevu cine asturianu en colaboración cola Asociación de Realizadores y Guionistes d’Asturies. Na proyección van poder vese cortometraxes de dalgunos de los más representativos autores mozos del cine d’anguañu na nuestra comunidá.

La sesión va poner na pantalla les obres “7337” de Sergio Sänchez, “Lencería de ocasión” de Teresa Marcos, “Nun val la pena conquistar la tierra” de José Braña, “Malu” de Ramón Lluis Bande, “Lo que necesites selo yo” d’Angeles Muñiz, “La neña de los mios güeyos” de Carlos Navarro, “Imaxe accidental” de José Antonio Maniega y “Xicu’l toperu” de Gonzalo Tapia. La proyección escomienza a les 20.30 nel Teatru Toreno.

La cineasta Isabel Coixet, l’actor Sergi Sánchez y la escritora Lucía Etxebarría son dellos de los participantes nel cursu Universo Media del Festival de Cine de Xixón qu’esti añu va tar dedicáu a analizar el sufrimientu nel arte. Nel ciclu cinematográficu d’esti apartáu del festival van proyectase títulos como “Ghosts”(2005) de Christian Petzgold o el clásicu “La pasión de Xuana d’Arcu”(1928) de Carl T. Dreyer.

Los responsables del Festival Internacional de Cine de Xixón presentaron ayer el conteníu del cursu Universo Media, entamáu en colaboración cola Universidá d’Uviéu y que coordina Vicente Domínguez. Embaxo’l títulu “Los nervios culturales del dolor” creadores y estudiosos van xuntase a analizar les relaciones ente’l sufrimientu y l’arte.

El cursu va cuntar cola presencia y les intervenciones d’Isabel Coixet, Sergi Sánchez, Lucía Etxebarría, Víctor Gómez Pin, Tomás Marco, Sergi Sánchez, Roberto Cueto, Jesús Palacios y José Luis Rebordinos. En cuantes a los títulos que van proyectase nesti ciclu del Festival de Xixón, embaxo l’epígrafe de “Los nervios culturales del dolor” van poder vese los filmes ‘Trouble Every Day'(2001) de Claire Denis; ‘The Saddest Music in the World’ (2003) de Guy Maddin; ‘Amanecer'(1927) de Friedrich W. Murnau; ‘Ring of Fire: The Emile Griffith Story'(2005) de Berger and Klores; ‘La pasión de Xuana d’Arcu'(1928) de Carl T. Dreyer; ‘Petit Cherie’ (2000) d’ Anne Villacèque; ‘Keane’ (2004) de Lodge H. Kerrigan; ‘Ghosts'(2005)de Christian Petzgold; ‘The Black Glove’ (1997)y ‘Ecstasy in Berlin 1926′(2004)de María Beatty.

La Obra Social y Cultural de Caxastur entama dende esti martes 25 el ciclu de cine “No todo es un sueño” dedicáu a proyectar producciones independientes d’ámbitu internacional. Los centros culturales d’Uviéu y Xixón acueyen esta tarde la programación de “Lila dice”(2004) y “Querida Wendy”(2005).

La primera de les cintes “Lila dice” de Ziad Diueiri va proyectase a les 20.00 hores nel centru cultural de Caxastur na cai San Francisco d’Uviéu y a la mesma hora na sala del Monte de Piedá de Xixón va proyectase “Querida Wendy”; un film del danés Thomas Vintenberg con guion de Lars von Trier.

El restu de los títulos que componen el ciclu “No todo es un sueño” son “Aupa Etxebeste”(2005) d’Asier Alturna y Telmo Esnal; “Spellbound” (2002) de Jeff Bitz; “Kitchen Stories”(2003)de Bent Hamer; “La pesadilla de Darwin”(2004) de Hubert Sauper; “Paradise now”(2005) de Hany Abu-Hasad;y “Buenos días noche” (2003) de Marco Bellochio.

Ciclu “No todo es un sueño”

Profesionales del sector tecnolóxicu y audiovisual ven necesaria la creación d’una Film Commission n’Asturies asemeyada a la qu’esiste n’otres comunidaes y que había tener como fin l’atraer rodaxes y producciones cinematográfiques a la nuestra comunidá. Una mesa redonda analizó ayer n’Uviéu les posibilidaes de la puesta en marcha d’un organismu con esos oxetivos.

José Braña, presidente de l’Asociación de Realizadores y Guionistes d’Asturiee; Javier Galán, representante de l’Asociación de Productores asturianos y Joaquín Morán, xerente de la empresa ASTURNET, coincidieron nel coloquiu celebráu nel Club Prensa de La Nueva España na necesidá de puxar por un Film Commission na nuestra comunidá. Les actividaes d’esti organismu taríen enfotaes na captación de productores cinematográfiques pa que vinieren a rodar los sos trabayos a Asturies, facilitándo-yos toa clase de servicios y contactos con profesionales necesarios pa los sos llabores.

Organismos asemeyaos esisten n’otres comunidaes con abondo ésitu nel puxu de les actividaes derivaes de la industria audiovisual y que valen pa favorecer el medre d’otros sectores económicos. Los profesionales aconceyaos pa falar de la posible creación d’una Film Commission n’Asturies coincidieron en que la nuestra comunidá diba beneficiase abondo de la iniciativa. Los sectores audiovisual, de nueves tecnoloxíes, de servicios y turísticu seríen los principales beneficiaos d’una iniciativa que, según apuntaron los falantes na mesa redonda, había ser privada pero con sofitu de l’administración o con participación mista.

Esti miercoles, día 5, a les siete y media la tarde, presentose nel Fórum de la Fnac el DVD ‘Arda’l Curtiumetraxe. Colección de curtios asturianos. Volume 1 n’asturianu’, editáu pola Asociación de Realizadores y Directores d’Asturies (ARDA). A lo llargo del actu de presentación proyectaronse dalgunos de los curtios qu’apaecen nel DVD, pa depues facer un coloquiu sobre los mesmos.

El conteníu d’esti llanzamientu ye “Lo que necesitas selo yo”, d’Ángeles Muñiz Cachón; “La neña de los mios güeyos”, de Carlos Navarro; “Xicu’l toperu”, de Gonzalo Tapia; “Imaxe accidental”, de Jose Antonio R. Maniega; “Nun val la pena conquistar la tierra”, de Jose Braña; “Malu”, de Ramón Lluís Bande; “7337”, de Sergio G. Sánchez, y “Llencería d’ocasión”, de Teresa Marcos.

L’Aula les Metáfores «Fernando Beltrán» de Grao entama mañana a les seis de la tarde, cola proyección na Casa Cultura de la película ‘Troya’, un ciclu de cine quincenal coordináu por Vicente Domínguez que lleva por títulu ‘Nel entamu fue versu: variaciones cinematográfiques sobre la Ilíada y la Odisea’.

El día 19 fadráse lo propio con ‘O’Brother’ de Joel Coen, que cunta la historia d’un delincuente, Everett Ulises McGill (George Clooney) que, xunto a otros dos perdedores, embárcase na aventura de la so vida en busca de la llibertá y cola promesa de compartir un tesoru enterráu. Martin Scorsese será’l director de la obra que se pasará’l 2 de payares. ‘Jo, que noche’, desendólcase nuna nueche d’ún de los piores barrios de Nueva York.

El día 16 de payares van echar la película ‘París, Texas’, de Win Wenders, basada na busca d’un home que perdió a la muyer y al fíu, y que lu lleva hasta la frontera mexicana. Y, finalmente, el ciclu sobre Homero terminará’l 14 d’avientu con ‘El retorno’, d’ Andrei Zqyagnitsev, un drama humanu rodáu nos bosques del norte de Rusia.