Santos González propón convertir el serviciu de publicaciones en serviciu de normalización

El candidatu a Rector de la Universidá d’Uvieu anunció na presentación del so programa electoral, esta mañana nel Edificiu Hestóricu n’Uvieu, la intención de convertir el serviciu de publicaciones nuna ferramienta que promueva la cultura asturiana na Universidá. Estes intenciones queden afitaes por escritu, nel programa de Santos gonzález. “Va procedese a la so implantación nel desarrollu de la vida universitaria y, xunto cola Academia de la Llingua y la Facultá de Filoloxía, van ponese en marcha cuantes actividaes contribuyan a la normalización llingüíistica como precedente y impulsu al so desarrollu nel Nuevu Estatutu del Principáu d’Asturies”.

La intención del candidatu ye qu’esti serviciu de normalizaciones cudie de que la llingua asturiana, y los sos falantes, nun sufra nenguna clas de tratu discriminatoriu na Universidá. Esto va valer tanto pa cuestiones rellacionaes cola propia espresión como pa tolo que cinca a la información universitaria y los trámites burocráticos. González fai l’apueste nel programa porque l’asturianu sía oxetu d’estudiu y d’eseñanza na Universidá. Otramanera, tamien anunció que’l portal web de la Universida va contar con una versión en llingua asturiana.