Salen a concursu los cursos de la Universidá Popular d’Uviéu

El Conceyu d’Uviéu alcordó esta selmana sacar a concursu los nuevos cursos de la Universidá Popular Uvieina, por un importe d’unos 54.000 euros.

Tratare de «materies que podríamos llamar troncales, como hestoria, arte, lliteratura, ciencia, nutrición, fotografía, vídeu, emociones …», esplicó la conceyala d’Educación, Mercedes González, na anuncia de la mentada llicitación.

El concursu, estremáu en cuatro llotes, por esixencia de la nueva Llei de Contratos, ta destináu a empreses del sector educativu. Sicasí, van caltenese les actividaes qu’entamen asociaciones, indicó la edil: «Por casu vamos tener talleres d’apicultura y de xeometría y arte cola Universidá d’Uviéu. Amás de la see habitual, l’edificiu del Pavu Real del Campu de San Francisco, tamién va siguir habiendo cursos na Escuela Municipal de Música, na cai de la Rosal.

Mientres el cursu yá termináu, la Universidá Popular Uvieina rexistró una cifra récord de matrícules, con 1.550 persones inscrites nos 63 cursos añales y los otros 27 de calter trimestral. En total, dende la recuperación d’esta iniciativa educativa hestórica en 2016, pasaron poles sos aules más de 5.000 alumnos. De cara al próximu añu, la Conceyalía d’Educación, acordies con fontes municipales, va avanzar los distintos cursos n’agostu y matricular van formalizase en septiembre.