Reciella presenta ¡Espoxiga! pa esparder el VI Día de la Reciella

Reciella presenta’l vídiu de ¡Espoxiga!, el tema promocional del VI Día de la Reciella interpretáu por Pop Piquiñín (Petit Pop n’asturianu) y que va cantase’l domingu 7 d’ochobre en Xixón nesi Día de la Reciella.

El Día de la Reciella ye un eventu festivu de tipu familiar organizáu pola asociación Reciella (families pol asturianu), nel que durante un día completu, dende pela mañana hasta pela nueche, sucédense actividaes, talleres, conciertos y exhibiciones deportives que tienen como nexu l’usu del asturianu como llingua vehicular.

Esti eventu gratuitu y abiertu qu’axunta a miles de personses lleva celebrándose dende l’añu 2012 en Xixón, nel Muséu del Pueblu d’Asturies el primer domingu del mes d’ochobre y dende hai 3 años la so promoción inclúi la publicación nos meses previos un cantar específicu realizáu por una banda o artista asturianu. Nel añu 2016 el cantar del Día de la Reciella foi ¡Entaína! de Skama la Rede y en 2017 “N’asturianu, sumes” de David Varela. En 2018, el cantar ye ¡Espoxiga! un títulu que coincide col lema del VI Día de la Reciella y que ta compuestu por Pop Piquiñín (la versión n’asturianu del exitosu grupu infantil asturianu, Petit Pop).

El vídiu, que ya ta disponible na rede, ye ta basáu nuna idea, y realizáu y dirixíu por Pablo A. Quiroga Prendes, cola edición de color, efectos y dellos visuales de Juan Tizón y la so grabación fíxose nel Xardín Botánicu Atlánticu de Xixón, participando nella Mar Álvarez de Pop Piquiñín (Petit Pop) y familes de l’asociación Reciella.

La lletra, escrita como nes ediciones anteriores por David Guardado, tresmite un mensaxe positivu que fala de la necesidá que tienen les llingües, como les persones o los animales de ser cuidaes y queríes pa tener vitalidá, y nel casu de los idiomes, la importancia de falales en familia p’asegurar la so pervivencia nes siguientes xeneraciones.

Dende Reciella faise una llamada a families neños y neñes pa que vayan practicando’l cantar pa poder cantalu toes y toos xuntos el domingu 7 d’ochobre en Xixón nel VI Día de la Reciella.