Ragadast ufre de baldre un llibru de rellatos “Fecho na cuarentena”

Ediciones Radagast asoleya’l llibru dixital y de baldre “Fecho na cuarentena”, un llibru de rellatos n’asturianu, castellán y gallego-asturianu pa facer más llevadera la cuarentena.

Ediciones Radagast, la nueva editorial asturiana de fantasía, rol y ciencia ficción qu’organizare’l crowdfunding de Depués d’Ochobre, el primer xuegu de rol n’asturianu, ta acabante d’asoleyar un llibru dixital de baldre pa que la cuarentena seya más llevadera.

El llibru, que tien por títulu “Fecho na Cuarentena”, cuenta con 28 rellatos (17 n’asturianu, 10 en castellán y ún en gallegu-asturianu) de temátiques que van dende’l terror románticu hasta la ciencia ficción pasando pelos crímenes, el rellatu infantil o’l misteriu. Munchos rellatos asoléyense en “Fecho na Cuarentena” per primer vez y otros taben yá premiaos n’otros certámenes o antoloxíes. Tamién, la esbilla d’escritores cuenta con nueves voces de les narratives asturiaan y castellana amás d’autores premiaos y con obra asoleyada como Laura Marcos, José Ángel Gayol, Inaciu Galán, Arancha Prado, Víctor Suárez, Nicolás Bardio, Paula Pulgar, Miguel Monteavaro, Alba Carballo, María Luz Pontón o Blanca Fernández.

El llibru, qu’en pallabres de los editores nun tien más oxetivu del de “facer que la cuarentena seya más llevadera” y “nun dexar de llau la cultura asturiana” pue descargase de baldre na páxina de la editorial Ediciones Radagast lo que dure la cuarentena.