Radiadora Avilés, la radio online de Mocedá, empecipia temporada y nueva andadura

Radiadora, la radio online del Serviciu de Mocedá d’Avilés, empecipia esti vienres temporada y nueva andadura, qu’arrinca con una entrevista a la conceyala de la área, Raquel Ruiz, a les 17 hores. Emite tolos vienres de 16 a 20 hores en directu al traviés del Facebook.

Radiadora  ye un proyectu de radio llibre onde les y los mozos d’Avilés atoparon un espaciu para espresar les sos idees, moliciones, aficiones, etc. Un espaciu onde poder dexar volar la creatividá en forma de palabres y música. Esti proyectu acueye a cualesquier mozu que deseye poner en marcha un programa y atopar  una plataforma onde afigurar aquello que precisa espresar.

Radiadora emite tolos vienres dende les 16 hasta les 20 en directu al traviés del Facebook de Radiadora Avilés. La nueva temporada arrinca mañana tres una bona puesta a puntu, actualización y creatividá y cola ilusión de siempre. La programación inclúi los siguientes espacios: Empezate, Barreres y Futuru, Pokopense, CineNet, Afternoon  Reflexion, Moviéndonos per Europa, Antenes informatives y ¿Qué pasa pela ciudá?..

Los oxetivos d’esti espaciu radiofónicos son: Ufiertar a los mozos d’Avilés un espaciu onde puedan manifestar les sos moliciones al traviés de podcasts preparaos para’l so espardimientu al traviés d’Internet y redes sociales, que pueden escuchase en Mixclaud en Radiadora.

Al mesmu tiempu, motivalos y averalos a les plataformes d’espardimientu actuales d’una manera ético y responsable, según establecen nexos alredor de temes de común interés. Y mesmamente tamién l’espardimientu de les actividaes realizaes dientro del marcu del Serviciu de Mocedá del Conceyu d’Avilés. Finalmente, crear sinerxes ente organizaciones sociales que comparten la esperiencia nel ámbitu de la mocedá y la educación favoreciendo una crecedera mutua.

Los y les moces d’Avilés interesaos en tener el so propiu espaciu d’espresión pueden ponese en contactu con Radiadora en facebook.