Radagast anuncia na presentación de ‘Trovadoresca’ el ganador del II Premiu Radagast

Cuatro Gotes, en Xixón, foi l’escenariu esti domingu de la presentación de la obra ganadora del Primer Premiu Radagast de novela de 2020, “Trovadoresca” de Blanca Fernández Quintana, y de l’anuncia del ganador de la segunda edición, “La vieya” de Aique Fernandi.

Como desplicó primero l’editor de Radagast, Nicolás Bardio, y depués la propia autora, Blanca Fernández Quintana, la novela ganadora del Primer Premiu Radagast, “Trovadoresca”, ye una novela de fantasía urbana protagonizada por una pantasma que vien a poner humor nes propuestes narratives en llingua asturiana más moces, cola fantasía como referente.

Nel actu diose anuncia a la decisión del xuráu del segundu Premiu Radagast de novela de 2021 y entregose el premiu al ganador, Aique Fernandi, con “La vieya” que tien a la mitoloxía céltica como escenariu.

El premiu Radagast ye l’únicu premiu de novela n’asturianu d’iniciativa privada nestos momentos que, con un premiu en metálicu de 300 euros, fai apueste pola independencia de les subenciones públiques como exemplu de que la producción lliteraria en llingua asturiana tien l’encontu del públicu llector.