Presentóse la primer tesis de la hestoria na que se ficieron tolos trámites n’asturianu

Va venti años el profesor Ramón d’Andrés presentaba la que sedría primer tesis n’asturianu de la hestoria y dende entós otres fueron llegando con más o menos problemes. La última de les polémiques foi la del hestoriador Faustino Zapico, que llegó a los tribunales dempués de qu’en 2005, nel tiempu del rector Vázquez, nun-y dexaren facer los trámites burocráticos na so llingua. Agora, y dempués de l’aprobación del nuevu reglamentu pa la presentación de tesis, onde per primer vegada apaez la posibilidá de presentar tesis n’asturianu de forma esplícita, acaba de presentase la primera d’elles na que, según esplica’l propiu autor, Xuan Santori “non ye que tea solo ta n’asturianu la tesis en sí, sinón que ye la primera que se fai en tolos pasos: dende la matrícula a la defensa, dafechu nesta llingua”.

Y ye que les tesis defendíes primero, tuvieron de matriculase en castellán y facer resúmenes nesta o n’otres llingües. Santori entamó col so procesu en 2008, cuando presentó los documentos necesarios n’asturianu y recibió una actitú “oxetivamente altiva y displicente” per parte de los funcionarios universitarios. Anguaño col Reglamentu pa la presentación de documentos n’asturianu y el yá citáu de les tesis, aprobaos pol equipu del Rector Vicente Gotor, les tesis n’asturianu y los sos pasos previos burocráticos nun tendríen d’atopar dificultá nenguna.

Asturnews va ufrir mañana una entrevista a fondu col autor d’esta primer tesis beneficiada pola nueva normativa universitaria.

El CUPA alcuerda un nuevu Reglamentu col Rector: Podrán presentase tesis n’asturianu https://asturnews.com/index2008.php?idn=11366