Presentáu en FITUR el programa International Cheese Festival 2020

L’eventu gastronómicu internacional Asturies Paraísu Natural International Cheese Festival 2020, que va convertir a Uviéu en capital mundial del quesu, foi presentáu na Feria Internacional de Turismu de Madrid. El Concursu Internacional World Cheese Awards va celebrase dientro del marcu del Festival.

FITUR, la Feria Internacional de Turismu de Madrid, acoyó la presentación del Asturies-Paraísu Natural International Cheese Festival 2020, eventu que se va celebrar na capital del Principáu d’Asturies y que va cuntar col quesu como principal protagonista. L’eventu de presentó nel stand del Gobiernu de Principáu d’Asturies participante na Feria de Turismu (Fitur) en Madrid.

Begoña Lopez Fernandez, directora xeneral de Desenvolvimientu Rural ya Industries Agraries del Gobiernu de Principáu d’Asturies, Alfredo García Quintana, conceyal de Gobiernu d’Hostelería, Turismu y Congresos del conceyu d’Uviéu, Luisa Villegas CEO del Institutu del quesu y Directora del Festival y Santiago Menendez de L.luarca Presidente d’honor del festival  coincidieron en destacar qu’esti Festival ye una oportunidá única para convertir Asturies nun referente internacional del quesu.

“El festival va ser un escaparate de quesos producíos n’Asturies y el mundu, xuntu con esperiencies culturales internacionales de la más alta calidá. Coles mesmes, l’eventu gastronómicu va acoyer la 33ª edición de los World Cheese Awards 2020, certame qu’otorga’l premiu al meyor quesu del mundu y onde participen más de 3.000 quesos provenientes de los cinco continentes”, destacó Luisa Villegas, Directora del Institutu del Quesu y del Asturies-Paraísu Natural Internacional Cheese Festival 2020.

“El festival va disponer d’espacios pa entablar relaciones comerciales ente distintos productores y compradores; van tar presentes los quesos más importantes de los cinco continentes, cocineros reconocíos a nivel internacional, universidaes, centros tecnolóxicos y prensa gastronómica. Un festival abiertu a tou tipu de públicu; un regalu pa la ciudadanía que va cuntar con alredor de 15.000 asistentes, 280 xueces internacionales, más de 40 nacionalidaes participantes y más de 60 espositores”, añedió Villegas.

Asturies-Paraísu Natural International Cheese Festival Uviéu 2020 va dar empiezu’l 4 de payares cola celebración de la 33ª edición de los World Cheese Awards y l’habitual cena de gala. Coles mesmes, ese mesmu día realizará l’apertura del Cheese Market y Alimentos del Paraísu que podrán visitase hasta’l 7 de payares. Primeramente, el 3 de payares, va realizase l’eventu d’inauguración del festival 2020 y la recepción de xueces y prensa especializada.

Del 5 al 7 de payares abrirá la zona de los World Cheese Awards a la ciudadanía y podrán tastiase quesos de los 5 continentes. Dientro del programa del Festival celebrará’l Primer Congresu científicu gastronómicu que va tresferir les resultancies de los proyectos de les plataformes internacionales d’Investigación y Desenvolvimientu.

Amás el Festival va cuntar con cocineros referentes de la cocina estatal ya internacional; va crease un espaciu de fusión gastronómica y de comedia abiertu públicu xeneral denomináu Gastro Cheese Comedy. Espositores, degustaciones, esperiencies y cates van completar un programa onde los Alimentos del Paraísu van ser protagonistes.