Pipo Priendes actúa nel Auditoriu Teodoro Cuesta

La programación cultural d’esta selmana tien el sábadu una de les cites destacaes del trimestre en Mieres nel ámbitu musical col conciertu de Pipo Priendes. Va ser esti sábadu 11, a les 20 hores, nel Auditoriu Teodoro Cuesta, onde’l reconocíu artista asturianu va poner n’escena un espectáculu sentío y sensible, con un repertoriu de cantares propios, chiscaes con temes de siempre (“intemporales”, como suel llamalos), que va dexar al públicu esfrutar de la cercanía de la música y de la pasión y l’alma que Priendes tresmite nos sos directos.

El conciertu d’esti sábadu en Mieres, con entrada llibre hasta completar aforu, ye, por tanto, una oportunidá para ser parte d’un conciertu ensin estridencies, cargáu de sensibilidá y del bon faer d’un artista con una impecable trayectoria que destaca pol so arte sele y templáu.

El conciertu de Pipo Priendes nun ye la única cita cultural d’una selmana na que nun falten tampoco les presentaciones de llibros, les charres y conferencies o los cuentacuentos. Asina, por casu, güei mesmu, martes 7 de febreru, a les 17.30 hores, la Biblioteca de Mieres acueye’l cuentacuentos n’asturianu “La Islla Invisible”, por Hixénicu Papel, actividá para la que ye necesaria la inscripción previa na biblioteca. Mañana, miércoles 8 de febreru, el Atenéu de Turón acueye a les 19 hores una charra informativa de consumu sobro lluz, gas y abusos bancarios y a les 20 hores, nesti casu nel Salón d’Actos de la Casa de Cultura, va presentase’l llibru “Asturies 60. Oríxenes y desenvolvimientu del rock n’roll n’Asturies (1956-1969), de Javi Pedraces.

El xueves a les 17.30 hores, llega la vez de Les Tardes con Lleo, na Biblioteca de Mieres, con “En busca del besu”, de David Melling, y a les 19 hores, el Salón d’Actos va acoyer la charra “¿Ta la ciencia al serviciu de la salú o la enfermedá al serviciu de la industria?”, con Carlos Ponte Mittelbrunn como ponente y entamáu pola Plataforma Salú Pública y Amigos de Mieres. El vienres, el llibru “En busca d’aventures atopéte a ti”, d’Alba Palacios Granda, va ser presentáu nel Salón d’Actos a les 19 hores, ente que’l sábadu y el domingu Mieres Centru Cultural (MCC) acueye’l Campeonatu Asturianu d’Axedrez, nuna cita de referencia que se ta desenvolviendo nes últimes fines de selmana en Mieres. Ensin escaecer, poques gracies, el conciertu del sábadu de Pipo Prindes.

Un pocu de too nesta selmana cultural en Mieres. Tola información sobro cada cita puede consultase nel estremáu axenda d’esta mesma páxina web.