Piden que nun se prohiba tomar sidra na cai en Xixón

“El consumu de sidre en llugares públicos forma parte de la nuesa rialidá sociocultural y tien de ser respetada”, espliquen dende la revista La Sidra, que vien de solicitar al Conceyu de Xixón que se recueya espresamente comu esceición na ordenanza del “botellón”, el consumu de sidra en llugares públicos, “darréu qu’esti siempres foi tradicional na nuesa ciudá lo mesmo que nel conxuntu’l país y enxamás nun dio llugar a los problemes que se-y acoten al ‘botellón’, nun pudiendo considerase en dengún casu comu un problema de salú pública, sinón como espresión de la nuesa ancestral cultura sidrera que non solo tien de ser abellugada y respetada, sinón incentivada na midida lo posible”, argumenten.

Dende La Sidra dicen ser coscientes que como afirmó l’edil de seguranza ciudadana, l’actual borrador tomare como referencia les ordenances de ciduades como Barcelona y tamién un testu marcu de la Federación Española de Conceyos y Provincies (FEMP), y atalanta que por eso nun recueye la singularidá de la sidra, pero considera que “nun se trata de facer una vuelta más un meru calcu de disposiciones españoles n’Asturies, sinón d’afayales a la nuesa realidá sociocultual recoyendo concretamente la esceicionalidá del consumu de sidra en llugares públicos”.

Pa La Sidra resultaría llamentable que “como consecuencia de les dimposiciones pa controlar el vezu foriatu del botellón, en función de los problemes de sanidá público que se-y atribúin, acabe perxudicándose una de les nueses espresiones culturales más auténtiques, talo como intentaren n’anteriores corporaciones cuando quinxeren torgar echar sidra fuera de los establecimientos hosteleros”.