Personalidaes vinculaes a la cultura echen a andar un “observatoriu” pa impulsar la política llingüística

Vixilar ya impulsar la política llingüística nun momentu nel que l’idioma asturianu xuégase muncho. Con esi propósitu esencial va presentase’l sábadu n’Uviéu l’Observatoriu de Política Llingüística, una plataforma promovida por un grupu de doce personalidaes vinculaes a la cultura y la política pero dafechu ayena al Gobiernu autonómicu. El caderalgu Francisco Llera Ramo y la escritora Berta Piñán sedrán les ‘cabeces visibles’ del collectivu.

La presentación formal llegará en 48 hores, pero los impulsores del observatoriu trabayen con intensidá dende hai selmanes na constitución d’una plataforma que quieren plural, constructiva, abierta a la participación y afitada nel pragmatismu: “Ye meyor facer coses que nun facer nada”, resume ún de los promotores del collectivu, l’escritor Xuan Bello.

Con una lóxica integradora, el nuevu observatoriu axunta a ciudadanos d’estremaes sensibilidaes ideolóxiques y polítiques y aspira a medrar col mayor consensu posible. El momentu, argumenten los impulsores de la plataforma, ye decisivu dende’l puntu de vista sociollingüísticu porque a puntu d’aportar al ecuador de la llexislatura autonómica “nun hai demasiaes razones” pal optimismu esbordáu.

Na práctica, el nuevu collectivu funcionará como una entidá ciudadana crítica cola política llingüística del Executivu autonómicu, qu’emitirá los conseyos que se-y abulten oportunos y tratará de presionar a los responsables políticos autonómicos pa que trabayen cola másima eficacia pola normalización social de la llingua asturiana, en puertes de la decisiva reforma del Estatutu d’Autonomía.

La creación del observatoriu produzse nun momentu d’especial efervescencia y de desalcuentros dientro l’abanicu asturianista: A la rellación distante que mantienen los responsables de l’Academia de la Llingua y la Oficina de Política Llingüística’l Principáu hai que-y sumar la coesistencia d’a lo menos cuatro collectivos en defensa del idioma, la veterana Xunta pola Defensa de la Llingua, el Conceyu Abiertu pola Oficialidá, l’asociación ‘Oficialidá’ y l’Ensame pa la Oficialidá de la Llingua d’Asturies, estos tres últimos creaos en 2004.