Novedaes sobre la filoloxía asturiana nel nuevu espaciu européu d’educación superior

El procesu p’asitiar les enseñances d’asturianu nel espaciu européu sigue en marcha. El decanu en funciones José Antonio Martínez va someter la so propuesta a la Xunta de Facultá a finales d’esti mes d’ochobre. Con esta propuesta, y según anunció’l decanu nuna entrevista concedida estos díes a un periódicu asturianu, cola propuesta busca “el retornu del asturianu a los estudios reglaos”.

La llingua y literatura asturianes van ser, d’aprobase la propuesta del decanu, un grau de 48 créditos que va poder estudiase en paralelu col “maior”, y que tendrá ocho asignatures, cada una con seis creitos. Pa José Antonio Martínez “El proyectu supón que la Filoloxía Asturiana va vese reforciada de forma cualitativa. El minor supón ocho asignatures plenamente integraes nes titulaciones” frentre a les dos asignatures optatives nes que podíen matriculase los alumnos de filoloxía hasta agora. “El que quiera que compare” declaró’l decanu en funciones.

Cola propuesta del decanu, l’asturianu taría como posibilidá de minor xunto col inglés, francés, alemán, italianu, portugués, clásiques, románica, Traducción y otru minor en Comunicación.

Sicasí, la última pallabra p’aprobar esti proyectu ta en manes de los miembros de la Xunta de Facultá de Filoloxía, pa ello, el decanu trabaya esta selmana la última ronda de contactos cola comunidá educativa a la espera de buscar un consensu”.

El decanu espera “que s’apruebe la so propuesta” anque nun tien la seguridá “espreso un deséu”, diz.

Si nun se pue aprobar “Nun sedría irreversible porque la creación d’un minor ye cenciella, pero volvería a correr el sangre.