Tecnoloxía La web del Principáu ye la más valorada polos usuariaos con discapacidá by asturnet 26 d'avientu, 2005 El portal institucional del gobiernu asturianu ye’l que meyor valoración recibe nuna encuesta fecha ente usuarios con discapacidaes pola Fundación ONCE sobre portales autonómicos. La web del Principáu tien el presto del 58 por cientu de los internautes encuestaos. Los datos pertenecen al tercer informe del Observatoriu d’Infoaccesibilidá de Discapnet, de la Fundación ONCE, nel que se pregunta a los usuarios polos recursos mínimos d’accesibilidá pa discapacitaos. Asturies con un 58% d’aprobaos supera a les demás comunidaes, la más cercana la de Murcia con un 50% de sofitu y otres como Valencia y Cataluña, namás algamen el 26% y el 33,8 % respectivamente. 26 d'avientu, 2005 0 FacebookTwitterPinterestEmail
Comunicación El Centru Asturianu concede los sos Urogallos del 2005 by asturnet 26 d'avientu, 2005 El Centru Asturianu de Madrid fizo públicos los nomes de los personaxes y colectivos que reciben esti añu los sos Urogallos de Bronce. Ente los distinguíos resalten l’académicu Xosé Bolado nel apartáu de llingua asturiana y el cuentacuentos Milio’l del Nido como personaxe más popular. El teólogu José María Díez Alegría y el gastrónomu José Antonio Fidalgo reciben Urogallos especiales poles sos respectives trayectories humanes. Los otros galardonaos son: n’artesanía, el constructor y restaurador d’horros Abel Llosa; en baile tradicional el grupu Escarpinos; Salvador Vázquez Sánchez, en tonada; Oscar Fernández, na categoría de gaiteru solista; el restaurante Casa Emburria de Tineo en gastronomía; en defensa de la natura, el Parque de Redes y el Muséu de la Madera; por último, en fiestes populares, los Güevos Pintos de La Pola Siero. El Centru Asturianu de la capital del estáu concede tamién los Urogallos especiales que nesti añu 2005 correspuenden al músicu Pedro Pangua; al conductor del programa “Bravo asturianísimo”, Gonzalo Mieres; a los restauradores Josefa Suárez y Máximo Díaz de La Parra d’Avilés; y al monologuista José Manuel Reguero “El Maestru”. Los premios con Urogallos especiales y mención honorífica son el teólogu y xesuíta José María Díez Alegría, el gastrónomu José Antonio Fidalgo, l’inxenieru Avelino Suárez y la Hermandá La Probe de Morcín. 26 d'avientu, 2005 0 FacebookTwitterPinterestEmail
Comunicación Industria reconoz que la TVG llega hasta San Xuan de Nieva by asturnet 26 d'avientu, 2005 La Xefatura Provincial de la Inspección de Telecomunicaciones n’Uviéu del ministeriu d’Industria reconoz nun escritu unviáu a Andecha Astur que les emisiones de la televisión autonómica de Galicia lleguen hasta San Xuan de Nieva. El organismu oficial respuende a la denuncia fecha pola formación política asturiana remitiendo ésta a Madrid pa qu’investigue la posible irregularidá de les emisiones de la TVG. L’escritu de la delegación de Telecomunicaciones reconoz qu’esistieron va años repetidores de l’Autonómica gallega nes prosimidaes de Xixón y Avilés por mor de la celebración de dellos alcuentros deportivos y a cuenta d’un conveniu con TVE. Al empar Industria afirma qu’anguaño nun hai nengún repetidor instaláu en territoriu asturianu polo que remite a Andecha a presentar la denuncia na sé central del ministeriu en Madrid. Nes midiciones feches pola Inspección por solicitú d’Andecha Astur l’organismu oficial reconoz que les emisiones de la TVG lleguen hasta San Xuan de Nieva y que l’orixe d’estes emisiones ye’l repetidor instaláu pol ente de comunicación de la comunidá vecina en Ribadeo, na llende con Asturies. La delegación del ministeriu n’Asturies insta a qu’Andecha pida a la sé central d’Industria en Madrid pa que s’averigüe si esti algame de les emisiones supón dalguna irregularidá acordies cola lexislación vixente. 26 d'avientu, 2005 0 FacebookTwitterPinterestEmail
Tecnoloxía L’asamblea francesa regulariza l’intercambiu d’archivos P2P by asturnet 23 d'avientu, 2005 El parlamentu francés vien d’aprebar un proyectu de llei sobre intercambiu dixital d’información que regulariza la circulación per Internet de ficheros P2P (“peer to peer”). La midida lexislativa supón de fechu una llegalización del intercambiu d’estos ficheros y la nueva situación creada alerta a la industria del discu de Francia y a sinfinidá de profesionales de la música pa los que la midida significa poco menos que llegalizar una forma de “piratería”. Una gran escandalera percuerre Francia dende l’aprebación esti xueves 22 del proyectu de llei col añadíu de les enmiendes que posibiliten l’intercambiu llegal d’archivos P2P, sobremanera pol fechu de que saliere alantre pol absentismu de bona parte de los representantes de la cámara de la República. Trenta votos contra ventiocho y tamién contra los deseos del propiu gobiernu francés ficieron posible que s’aprebare esta serie de midides lexislatives que sienten un precedente desconocíu hasta agora sobre la llibre circulación d’información pela rede. 23 d'avientu, 2005 0 FacebookTwitterPinterestEmail
Comunicación El PP anuncia la so intención de sentar nel Conseyu d’Aministración de la tele autonómica by asturnet 23 d'avientu, 2005 El diputáu del Partido Popular (PP) Fernando Goñi anunció esti xueves 22 la intención del so grupu de sentar nel Conseyu d’Administración del Ente Públicu de Comunicación del Principáu a los seis representantes qu’hasta agora renunciaran a participar. El cambiu d’idea vien motiváu, según declaró’l parlamentariu del PP, pol enfotu de los populares en “fiscalizar dende dientro” a la televisión autonómica. Los seis representantes del PP nel Conseyu d’Aministración de RTPA van empezar a asistir a les reuniones col oxetivu d’acceder a información sobre l’Ente que, según afirmó Goñi, hasta agora nun disponíen al través de la Xunta Xeneral. Dende la creación del Conseyu d’Aministración de la radiotelevisión del Principáu los representantes del Partido Popular refugaron participar dende los seis puestos que-yos asignara la Xunta Xeneral. De magar los populares denunciaran repetidamente nel parlamentu asturianu falta d’información de los responsables del Ente. Tener accesu directu a esta información ye’l principal motivu esgrimíu por Fernando Goñi pa desplicar el cambiu de decisión del PP. 23 d'avientu, 2005 0 FacebookTwitterPinterestEmail
Comunicación El Conceyu de Llangréu organiza un seminariu sobre información y comunicación by asturnet 22 d'avientu, 2005 Llangréu va acoyer esti viernes 23 un seminariu sobre información local y comunicación organizáu pol Ayuntamientu y nel que van participar destacaos especialistes universitarios xunta diversos profesionales de los medios. El director d’Asturnews, Próspero Morán; Bernardo Díaz-Nosty, presidente del Conseyu Asesor de RTPA o el responsable de la web Informativos Telecinco, Ignacio Escobar, son dellos de los ponentes. El papel que xuega la información local nel actual panorama mediáticu ye l’asuntu sobre’l que va debatise nesti seminariu alrodiu de la trescendencia ya importancia d’esti tipu de información especializada nes tendencies informatives d’anguañu. Amás de los ya citaos especialistes van participar nel alcuentru: Emilio Martinez Peña, profesor de la Universidá Autónoma de Barcelona; María José Cantalapiedra, de la Universidá del País Vascu; Leire Iturregi, periodista de la Cadena SER; Íñigo Kortabitarte, director de Dixital Vasca; Enrique Bueres, responsable de programación cinematográfica de Sogecable y los redactores de TVE José Manuel Patterson y Mario Bango. El seminariu escomienza a les 10 de la mañana d’esti viernes 23 y va siguir hasta les 15.00 hores en xornada matinal y de 17.00 a 19.00 hores na Casa de Cultura de La Felguera. La inscripción y la entrada al seminariu son llibres. 22 d'avientu, 2005 0 FacebookTwitterPinterestEmail
Tecnoloxía El dominiu .cat ta ya colgáu na Rede como referencia de sitios web de la comunidá llingüística catalana by asturnet 21 d'avientu, 2005 El dominiu .cat funciona dende va unes hores na rede como dominiu propiu y esclusivu empobináu a sitios web de la comunidá llingüística y cultural catalana. La estensión reconocióla’l pasáu 16 de setiembre l’ICANN y nuna primer fase va tar reservada a web institucionales d’entidaes públiques dedicaes a la promoción de la llingua y la cultura n’idioma catalanes. El procesu d’espardimientu del dominiu va durar unos tres meses dende agora pa evitar colapsos y saturación del ciberespaciu propiu. Después de la primer fase empobinada al rexistru d’instituciones, una segunda fase va permitir que s’inscriban na estensión .cat a entidaes de toa mena (empreses, asociaciones…) con presencia del idioma catalán na rede y la última fase va tar abierta al rexistru de les más de 68.000 persones y colectivos qu’amosaron el so deséu d’inscribise nel nuevu dominiu. La iniciativa de llevar la solicitú d’un dominiu propiu pa la comunidá cultural y llingüística catalana partió de l’asociación Domini punt.cat, agora la primer titular d’una web cola estensión aceptada pol ICANN, organismu internacional encargáu de los rexistros de dominios n’internet. domini.cat 21 d'avientu, 2005 0 FacebookTwitterPinterestEmail
Comunicación La televisión autonómica escomienza les sos emisiones en prebes by asturnet 21 d'avientu, 2005 La primer emisión de la Radiotelevisión del Principáu d’Asturies (RTPA) entamó esti martes 20 dende’l Parque Tecnolóxicu Científicu de Xixón con un programa en directu nel que’l másimu responsable del Ente José Ramón Pérez Ornia espunxo les llinies maestres del proyectu audiovisual del gobiernu de Vicente Álvarez Areces. Una versión eléctrica del ‘Asturies patria querida’ animó les primeres imáxenes de l’Autonómica. L’aparición del logo de la nueva empresa de comunicación y la versión del himnu d’Asturies fecha por músicos del país, ente ellos Jorge ‘Ilegal’ Martínez, Ígor Pascual, Los Berrones o Stoormy Mondays, abrió la primer emisión de la RTPA. Darréu les cámares de la nueva canal retrasmitieron l’actu de presentación coles intervenciones del presidente del Conseyu d’Administración del Ente, José Ramón Pérez Ornia, el presidente del Principáu, Vicente Álvarez Areces y la conseyera de Cultura, Ana Rosa Migoya. La emisión d’un documental elaboráu por TVE y tituláu “Crónica de un siglo” y diversos conteníos sobre gastronomía y otres amueses de cultura popular centraron les primeres dos hores de programación de l’autonómica. Dende esti martes van siguir les emisiones en prebes toles nueches de nueve a once hasta la puesta en marcha de la programación formal prevista pa la primavera del añu qu’entra. 21 d'avientu, 2005 0 FacebookTwitterPinterestEmail
Comunicación Radio Sele entama una campaña pa denunciar la ocupación illegal de la so frecuencia by asturnet 21 d'avientu, 2005 Los responsables de Radio Sele entamaron una campaña d’información mediática pa denunciar la situación na que s’alcuentra la emisora un añu después de recuperar la so llicencia comercial. La radio que dirixe Xuanxo Mariño afirma qu’otra emisora ocupa illegalmente la so frecuencia y clamia contra la pasividá cola que les autoridaes autonómiques siguen ensin solventar les dos denuncies presentaes pa recuperar el so dial. Responsables de Radio Sele y de la Xunta pola Defensa de la Llingua aconceyaron esti martes 20 cola diputada del grupu parlamentariu d’Izquierda Xunida-Bloque por Asturies Paloma Uría pa tresllada-y el so esmolecimientu sobre la peculiar situación d’allegalidá na que tien d’actuar la emisora al pesar de cuntar con una llicencia concedida pol gobiernu del Principáu y reconocía va poco más d’un añu por sentencia del Tribunal Superior de Xusticia d’Asturies. El puntu 97,9FM asignáu oficialmente pa Radio Sele ta ocupáu d’abenayá por Radio Punto, una emisora irregular a la qu’hasta la fecha nenguna autoridá-y tien torgao les sos actividaes como ‘okupa’ d’una frecuencia concedida a otra emisora. Radio Sele fue la primer emisora en llingua asturiana a la que se-y concedió una llicencia comercial. Recibió la concesión de manes del últimu gobiernu presidíu por Sergio Marqués y tres la llegada a la presidencia del executivu autonómicu del primer gobiernu d’Areces, Radio Sele vio retirada la so llicencia. Va poco más d’un añu el Tribunal Superior de Xusticia d’Asturies devolvió-y a Radio Sele la llicencia. Anguaño la decana de les radios n’asturianu tien d’emitir nuna situación d’irregularidá dende’l 106,5FM y dende la so páxina web. Radio Sele OnLine 21 d'avientu, 2005 0 FacebookTwitterPinterestEmail
Comunicación El Ministeriu d’Industria investiga si la TVG ‘coloniza’ territoriu asturianu by asturnet 19 d'avientu, 2005 El Ministeriu d’Industria español investiga si son ciertes les acusaciones feches por Andecha Astur a la radiotelevisión pública de Galicia (TVG) por tresgredir presuntamente les llendes territoriales d’emisión marcaes pola llexislaciòn vixente pal casu de les televisiones autonómiques y de facelo col fin de ‘colonizar’ culturalmente una parte d’Asturies. Industria va midir la potencia de los repetidores de la TVG asitiaos más cerca de les llendes territoriales de la comunidá gallega, según informa’l Diariu El Comercio na so edición d’esti domingu 18. Les razones d’esta mididición tán, según l’informativu xixonés, na denuncia entamada por Andecha Astur a principios de payares contra la televisión autonómica gallega por aventar les sos emisiones más alló de los llendes marcaos pola llei, dalgo qu’a xuiciu de la organización nacionalista podía llegar a ser illegal. 19 d'avientu, 2005 0 FacebookTwitterPinterestEmail