Mieres entama los talleres de mocedá ‘la mocedá muévese’ del 21 al 23 de payares

Mieres entama los talleres de mocedá ‘la mocedá muévese’ que se van desenvolver del 21 al 23 de payares nel salón d’actos de la Casa de Cultura, onde va falase de cuestiones como la orientación académico-profesional; la protección y defensa llaboral del trabayador; el municipalismu y la participación ciudadana.

Mieres va ser, del 21 al 23 de payares, cita inexcusable pa la mocedá. La organización d’IX nel conceyu entamó pa esos díes unes xornaes sol lema “La mocedá muévese. Talleres de Mocedá”, que se van desenvolver los próximos miércoles, xueves y vienres, nel salón d’actos de la Casa de Cultura (calle Manuel Llaneza, 8, Mieres).

Nestos trés díes, en tolos casos, a partir de les 19:00 hores, va falase de cuestiones como la orientación académico-profesional; la protección y defensa llaboral del trabayador; el municipalismu y la participación ciudadana; una IX pal tresformamientu social: estratexes polítiques; feminismos y nueves masculinidades; y l’acción política nos conflictos sociales.

Pa tocar toes estes víes d’analises y reflexón, ta prevista la participación de representantes de Comisiones Obreres (CC OO); del responsable d’Estratexa Política d’IX Federal, Ángel de la Cruz; la concejala avilesina Llarina González; el responsable de trabayu de Nueves IX, Víctor Reloba; la secretaria xeneral de PCE Asturies, Agustina Guglielmeti; el secretariu d’Acción Política d’IX Asturies, Juan Ponte; y de la vocera d’IU Madrid, Sol Sánchez.