Más de 2000 persones sofiten yá la continuidá del asturianu nes escueles

Yá son más de 2.000 persones les que sofiten la petición entamada na plataforma Change pa que l’asturianu nun se vea desaniciada del sistema educativu pola mor de la LOMCE, la conocida como “Llei Wert”, que pesie al alcuerdu de la Conseyera d’Eduación col Ministru, llevaría a l’asignatura d’asturianu a una situación pero de la yá precaria que vive anguaño. La campaña entamada pol profesoráu de l’asignatura de Llingua asturiana, aconceyáu’l martes 15 de xineru nel IES Aramo, cunta col sofitu d’organizaciones como SUATEA, Xunta pola Defensa de la Llingua Asturiana o Iniciativa pol Asturianu.

Na mesma recuérdase que “la falta d’estatus d’oficialidá de la Llingua supón una torga pa la so presencia y el so desenrrollu normalizáu na sociedá”. Pídese a les autoridaes competentes que paren lo que camienten ye un “retrocesu del principal padremuñu cultural d’Asturies” y la fin de “30 años d’implantación curricular, onde la población asturiano exerció’l derechu a estudiar la so llingua, atópase cola imposibilidá de siguir faciéndolo, emprobeciendo’l conocimientu d’elementos fundamentales de la so cultura”, lo que recuerden ye tamién “un incumplimientu de la Carta Europea de les Llingües Minorizaes, roblada pol Reinu d’España, y entraría en contradicción col propiu Estatutu d’autonomía asturianu”.

Fálase tamién nel manifiestu de les repercusiones a nivel llaboral, “nestos momentos alrededor de 230 profesores que tán poniendo clase d’Asturianu y Gallego-asturianu na rede pública quedaríen ensin trabayu”. El documentu piésllase con una afirmación clara, na que dexen claro que la oficialidá del idioma ye más necesaria que nunca.

Firma pol futuru del asturianu nel enseñu