María Rius Camps algama’l Premiu Nacional d’Ilustración 2018

La ilustradora y dibuxante catalana María Rius Camps foi galardonada, esti miércoles 26 de setiembre, col Premiu Nacional d’Ilustración correspondiente a 2018, otorgáu pol Ministeriu de Cultura y Deporte y dotáu en 20.000 euros.

Según informó’l ministeriu, que concede esti premiu coles mires de reconocer y estremar el conxuntu del llabor realizáu por un ilustrador español nel ámbitu del llibru y de les lletres españoles, el xuráu motivó la elección de Rius “pola so extensísima trayectoria, pola atemporalidad de la so obra, pol calter sele de la so ilustración, siempres en diálogu col testu y, finalmente, pola so implicación col colectivu de ilustradores”.

Fundadora y presidenta de l’Asociación Profesional de Ilustradores de Catalunya (APIC) y cofundadora del Conseyu Catalán del Llibru para Neños, Rius collaboró con diverses revistes infantiles, cabeceres de periódicos y editoriales, destacando como defensora del espardimientu del llibru infantil, realizando cursos, seminarios y conferencies por tola xeografía y diseñando xuegos educativos y cartelos.

Coles mesmes, cuenta na so bibliografía con más de 370 títulos, dalgunos de los cualos fueron publicaos n’una ventena de países, ente ellos, Estaos Xuníos, Alemaña, Xapón ya Israel, y les sos ilustraciones percorrieron diverses esposiciones colectives ya individuales por tol mundu.