Portada Conceyos Iniciativa reclama que se repare la placa d’homenaxe a Fierro Botas

Iniciativa reclama que se repare la placa d’homenaxe a Fierro Botas

by redacción asturnews
Placa d'homenaxe a Fierro Botas

Iniciativa pol Asturianu y el Colectivu Manuel Fernández de Castro reclamen la reparación de la placa d’homenaxe a Federico Fierro Botas asitiada nos xardinos homónimos n’El Natahoyo en Xixón.

Angüaño’l distintivu, instaláu nel añu 2010, alcuéntrase frañáu y mui puercu y precisa una renovación completa. Les organizaciones consideren que la imaxen d’esti homenaxe del conceyu al profesor, escritor y relixosu resulta llamentable y por ello, reclamen la so restitución. Amás, dambes asociaciones soliciten el cambéu de la placa col nome espaciu pa que tea tamién n’asturianu, pasando a apaecer como ‘Xardinos de Federico Fierro Botas’.

Federico González-Fierro Botas foi un relixiosu comprometíu cola llingua asturiana que morrió nel añu 2002 na localidá rusa de Vladivostok por mor d’un accidente de tráficu. Uvieín de nacimientu, Fierro pasó la mayor parte de la so vida en Xixón, na comunidá xesuita venceyada a la Fundación Revillaxixéu, nel barriu d’El Natahoyo. Fierro foi impulsor y presidente del Colectivu Manuel Fernández de Castro que trabayó na traducción de testos llitúrxicos.

Tamién te podria gustar