Los Trabayadores de les oficines de Normalización llingüística critiquen fondamente’l recorte de les hores de bachilleratu

L’Asociación de Trabayadores de la Normalización Llingüística vieno acabante denunciar con un comunicáu’l “recorte escomanáu y malintencionáu de les hores de llingua asturiana nel nivel de bachilleratu propuestu nel borrador del currículu mandáu a los centros educativos asturianos”. Pala Asociación qu’acueye a los trabayadores de les oficines de normalización espardíes pelos conceyos asturianos esti retayu ye inaceptable porque “fai pasar de cuatro a una hora d’asturianu en bachiller, etapa educativa yá condenada a númberos mínimos pola imposibilidá d’apaecer como materia evaluable na PAU y que yá contaba, pa más, con una ratio esixida pa impartila”.

A los trabayadores de les oficines abúlta-yos “bien llamativo – y agora, énte les noticies conocíes, bien ofensivo – el fechu de que va bien poco la Conseyería afalagaba los nuestros oyíos falando de la necesidá de crear la especialidá docente de llingua asturiana y pidía esplicaciones al Ministeriu por negánoslo, afirmando que si les competencies yeren de calter autonómicu, Asturies diba exercer la so competencia y diba regular la especialidá del profesoráu d’asturianu”.

Como los nuesos llectores recordarán achacabase la situación de la llingua asturiana na Educación reglada al mesmu Ministru, amosando lo que pala ATNL ye “un victimismu que nun ye propiu d’un cargu qu’ha asumir les sos propies responsabilidaes ensin volcar les propies miseries pa fuera y asina desfacese del pesu del fardel”. Na so opinión agora tenía la oportunidá de demostrar lo que daveres quería y podía facer pa col asturianu; ” y ta demostrándolo bien: nun hai otru enfotu per parte de la Conseyería d’Educación que desprestixar, arrasar y sentenciar de muerte una intervención educativa necesaria dafechu nel procesu de recuperación y sobrevivencia d’una llingua; arrastrando con ello al desamparu total a tou un colectivu d’enseñantes que, d’equí a bien poco, ta condergáu a desapaecer”.

El comunicáu que la ATNL espardiera esti vienres fai alcordanza de que “la educación – dende les estayes más pequeñes d’infantil y de 0 a 3 añinos hasta’l bachiller, pasando pel restu – ye un pegollu fundamental pa desarrollar y afitar los conocimientos llingüísticos y un ataque como esti, nun va facer más qu’argayar y esmoronar lo poco fecho hasta agora nel nuestru sistema educativu y d’enseñanza del asturianu”. Y fina diciendo que “nun ye tiempu de mázcares, ye momentu de destapase y de dicir a la sociedá asturiana qué quier el Gobiernu d’Asturies pa cola llingua asturiana. Y asina, pidimos que se retire esti borrador de currículu y se trabaye por desarrollar una educación pal asturianu digna y propia del valir de cualesquier llingua”.