Los gochos asturceltes falen na nuesa llingua

Apocayá y de manera unánime, los socios de l’Asociación de Criadores del Gochu Asturcelta, ACGA, votaron a favor de contemplar la llingua asturiana dientro de los sos estatutos, asina se decidió na xunta añal ordinaria celebrada na casa de cultura de Grau.

Los socios aplaudieron esta propuesta llevada a cabu pol secretariu d’ACGA Moisés Noval y que’l so presidente, José Manuel Iglesias, valoró positivamente: “Los dos llingües, l’asturianu y el castellán, cohabiten con normalidá ente los socios, a cencielles esti pasu comprométenos per escrito a siguir faciéndolo. D’esta manera tamos dando’l doble de capacidá pa comunicanos. Si queremos amás que l’asturianu seya oficial, hai qu’empezar por casa” matiza José Manuel quien espera qu’sta iniciativa “sirva l’exemplu nes demás asociaciones.” Dende la directiva de ACGA yá empezaron a trabayar nesta materia al cuntar col respaldu de l’Academia de la Llingua Asturiana, dende onde se comprometieron a la normalización del asturianu nos documentos de l’asociación.

Tres la votación favorable d’esti puntu na asamblea, el presidente de ACGA, José Manuel Iglesias, resaltó’l gran llabor que lleven a cabu los ganaderos y destacó amás que “anguaño hai mas demanda qu’ufierta, tamos nel camín escontra la recuperación del gochu asturcelta.”