Los futuros profesores de llingua avérense a Ubuntu

Esti miércoles 28 d’abril, el coleutivu Softastur ufrió una charra sobre Ubuntu na Facultá de les Ciencies de la Educación de la Universidá d’Uviéu a los futuros mayestros de llingua asturiana. Nella, los componentes de Softastur, desplicaron los conceutos básicos d’esta mena de Software, la ética qu’arrodia a los trabayos de la Comunidá llibre, y la importancia del so usu na Educación.

“Un finxu básicu na educación, ye l’accesu a la información” y l’espíritu de “compartir” que’l software llibre promueve, afitaron los profesores especiales d’esi día nel enseñu a los estudiantes del Títulu Propiu d’Espertu en Llingua Asturiana de la Universidá d’Uviéu. A los asistentes desplicóse-yos el funcionamientu d’Ubuntu a nivel d’usuariu, y tamién empobináu a la enseñanza primaria.

Softastur fizo una amuesa de la versión Educativa d’Ubuntu con exemplos práuticos pa escolinos, al empar qu’anunció’l llanzamientu esi mesmu (día 29) de la nueva versión versión d’Ubuntu, que l’asociación considera totalmente traducida en llingua asturiana. Tamién avanzó Softastur, que la suite ofimática OpenOffice va venir incluyía por defeutu y en llingua asturiana nesta versión d’Ubuntu.

Nel actu, los asistentes pudieron comprobar el funcionamientu y conocer l’estáu del correutor ortográficu nel que trabaya Softastur dende fai un añu, y que “tará disponible en 3 o 4 meses”. Esta ye una ferramienta normalizadora más, qu’asitia a la llingua asturiana na estaya de les nueves teunoloxíes, “igual que’l restu de les llingües”.

Pa tolos interesaos, Softastur fizo anuncia qu’esti fin de selmana (vienres 30 y sábadu 1) va cellebrase una install party en Ribeseya a la que pueden asistir toos aquellos que quieran instalar esti sistema operativu. Más información en: http://blogs.altuxa.com/softastur/taller-dinstalacion-en-ribeseya.html
Información sobre la Install Party en Ribeseya