Los estudiantes de Viesques van seguir ocupando’l Campus

Esti miércoles l’Asamblea d’Estudiantes del Campus de Viesques aconceyó cola Vicerrectora Paz Suárez Rendueles; col direutor de biblioteques de la Universidá, Ramón Rodríguez Álvarez; la xerente Marta González Prieto, y colxefe de serviciu de la biblioteca, Fausto González González. L’esmantelamientu de la biblioteca asitiada nel edificiu polivalente d’Inxeniería, nel Campus de Viesques, yera’l fechu que provocó la so ocupación polos estudiantes, que van caltener la so actitú ante la decisión de la Universidá de nun reabrir la biblioteca.

El coleutivu estudiantil desixó nesta xunta la reapertura de les instalaciones nes sos condiciones anteriores, debío a que l’alternativa supón qu’un campus con más de 4.000 estudiantes, y conformáu por cinco edificios alloñaos, quedare con namái una biblioteca.

Como la Universidá caltuvo la so decisión, l’Asamblea d’Estudiantes decidió caltener indefinidamente la ocupación de la biblioteca, hasta’l momentu nel que se cumplan les sos desixencies mínimes: la restauración de la biblioteca en llibros, personal y horarios, amás d’aparar cualquier otra midida de retayu de les ferramientes educatives a les espaldes de la propia comunidá.