Lluis Aique Iglesias algama’l Josefa Canellada de lliteratura infantil y xuvenil

L’escritor Lluis Aique Iglesias Fernández vieno acabante ganar la undécima edición del Premiu María Josefa Canellada de Lliteratura Infantil y Xuvenil en llingua asturiana, que concede la Conseyería d’Educación y Cultura, fallu que se diera a conocer esti martes.

El xuráu encargáu de valorar les obres presentaes axuntóse’l martes, nel Conceyu de Cabranes, so la presidencia del director xeneral de Planificación Llingüística y Normalización, Fernando Padilla, y tuvo formáu pola escritora Berta Piñán, ganadora de la edición pasada; la escritora y especialista en lliteratura infantil y xuvenil Maite González; la responsable de la Oficina de Normalización Llingüística de Xixón, María Xosé Rodríguez; l’asesora técnica del Serviciu de Planificación Llingüística y Normalización Juncal García; l’alcalde de Cabranes, Gerardo Fabián, y el fíu de la escritora María Josefa Canellada, Alonso Zamora.

Ente les obres presentaes, el xuráu decidió conceder el premiu a la titulada Invisible, qu’allegó col seudónimu Mon Llera Tardi, al reconocer nella “un tratamientu de temes d’actualidá con personaxes reales, con una bona estructura narrativa y un estilu lliterariu cargáu d’imaxes simbóliques”, según destaca l’acta. A esti galardón, dotáu con 3.000 euros, podíen allegar obres de lliteratura infantil o xuvenil (noveles, compilaciones de cuentos, obres de teatru o poemarios) inédites y que tuvieren xuna estensión mínima de 250 versos, nel casu de la poesía, y de 30 páxines a doble espaciu nel restu de xéneros.

Lluis Aique Iglesias Fernández ye nacíu en Sotrondio en 1967, llicenciáu en Filoloxía Inglesa pola Universidá d’Uviéu, y participó en diversos montaxes escénicos del Grupu de Teatru Universitariu de la Facultá de Filoloxía, ente ellos Lo que vio’l mayordomu, de Joe Orton, traducida por el mesmu Lluis Aique en 1995. Tien publicaos poemes y relatos en revistes como Lletres Asturianes y Lliteratura y forma parte de l’antoloxía de nuevos narradores (1996). Coles mesmes, ganó distintos premios lliterarios, ente ellos, el primer premiu del XIII Certame de Cuentos Curtios Valentín Palacios (2018); segundu premiu del XX Concursu de Cuentos Pola Oficialidá del conceyu de Bimenes (2017), y accésit asturianu, XIII y XIV edición del Concursu de Relatos Mineros Manuel Neváu Madrid (2016 y 2017)

Tamién tradució del inglés al asturianu La importancia de ser Severu (Ediciones Trabe, 2002), de Oscar Wilde, y Lo que vio’l mayordomu (Academia de la Llingua Asturiana, 1995), del dramaturgu Joe Orton.