Les peticiones d’escritores pa ellaborar obres subvencionaes duplicáronse nun añu

Los creadores lliterarios asturianos redoblen el so interés poles subvenciones. La Conseyería de Cultura, Comunicación Social y Turismu tramitó esti añu un total de 103 solicitúes d’escritores pa sacar alantre otros tantos proyectos lliterarios, frente a los 53 qu’optaron a una ayuda económica en 2003.

La duplicación nel númberu de peticiones cursaes énte Cultura prodúxose pesie a que la cantidá global de la convocatoria nun varió respecto al añu anterior -un total de 30.000 euros pa subvencionar tolos proyectos aprobaos-, y la cifra d’obres qu’algamaron ayuda económica pa la so fechura mantiénse nos mesmos términos absolutos: 20 esti añu, 22 en 2003.

Según publica’l Boletín Oficial del Principáu d’Asturies (BOPA) na so edición de güei, caún d’esos venti proyectos lliterarios tendrá una subvención de 1.500 euros, concesión que ruempe la desigualdá de les ayudes concedíes l’añu pasáu, qu’oscilaben ente los 1.000 y los 2.000 euros por obra.

La diferencia de bultu ente les cifres d’esta convocatoria y de la de 2003 dase, poro, na llista de proyectos desestimaos, que nun añu pasaron de ser sólo 31 a los 83 d’anguaño. Na nómina d’autores favorecíos esti añu por ayudes del Principáu a la creación lliteraria figuren escritores con amplia trayectoria nes lletres asturianes, ente ellos Miguel Rojo, Pablo Rodríguez Medina, Martín López Vega y Ricardo Menéndez Salmón.