La meyor noticia de 2019 pa los llectores ye que Barbón emplegue l’asturianu

Iniciativa pol Asturianu fixo públicu esti día’l resultáu de la votación popular pa buscar la meyor noticia pal asturianu en 2018 y el resultáu amuesa la idiosincrasia d’una autonomía na que l’emplegu del asturianu pol presidente del país, Adrián Barbón, ye la qu’algama la reconocencia mayoritaria de los llectores.

Esta ye la sexta edición que s’entama esti procesu pa elixir la meyor noticia del añu mediante una consulta popular que nesta ocasión volvió a medrar en participantes. D’esta manera, los y les internautes escoyeron la noticia de que “El Presidente d’Asturies usa l’asturianu en dellos actos institucionales y nel mensaxe de fin d’añu”. Adrián Barbón utilizó la llingua asturiana na toma de posesión como presidente del Gobiernu d’Asturies, asina como n’otros discursos oficiales.

Con una diferencia d’unos pocos votos quedó posicionada, en segundu llugar, la noticia de que “Los diputaos y diputaes na Xunta Xeneral podríen sumar pa la oficialidá”. Dempués de les elecciones de mayu los partíos que lleven la oficialidá del asturianu nel programa electoral son mayoría nel plenu de la Xunta Xeneral. En tercer llugar, los y les internautes elixeron la noticia de “Apruébase’l decretu pa les pruebes d’asturianu nel Marcu Común Européu de Referencia pa les Llingües”.

Dempués de la presentación d’estos resultaos, Iván Llera, presidente d’Iniciativa pol Asturianu dixo que “dende Iniciativa pol Asturianu celebramos y tamién agradecemos la participación de los y les internautes nesta encuesta. Si la meyor noticia del 2018 foi qu’el Rector de la Universidá echó una conferencia n’asturianu por primer vegada na hestoria, la d’esti añu ye l’usu del asturianu pol máximu representante del Gobiernu d’Asturies. Cada añu que pasa hai mayores y meyores noticies pa la llingua asturiana lo qu’en sí mesmo yá ye una bona noticia”.