L’actriz y directora Magüi Mira instrúi al profesoráu en téuniques escéniques

L’actriz y directora Magüi Mira va instruyir al profesoráu en técniques de creación escénica pa les sos clases con escolares. El primer alcuentru tuvo lugar esta fin de selmana y el segundu, el xueves 21 y sábadu 23, coincidiendo cola so presencia n’Avilés pa representar ‘Molly Bloom’, unu de los sos personaxes más esitosos. 

L’actriz y directora de teatru Magüi Mira caltuvo esta fin de selmana, en xornada intensiva de mañana y tarde, na Factoría Cultural, un alcuentru col profesoráu de los centros escolares d’Avilés p’ameyorar les sos competencies con ferramientes afayadices pa encarar el trabayu de creación escénica col alumnáu nes clases, de forma que éstes constituyan una actividá estimulante. Un segundu alcuentru va llevase a cabu’l xueves 21 d’abril en xornada de tarde y el sábadu 23 en xornada intensiva de mañana y tarde.

Magüi Mira ye una de les personalidaes más destacaes y prolífiques del panorama teatral español, el so trabayu como creadora llevó-y a llograr la Medaya d’Oru al Méritu nes Belles Artes, y el Premiu Abargane Inclán a la Meyor Creación Teatral en 2019, ente otres múltiples reconocencies a una trayectoria dedicada al teatru como actriz, directora, pedagoga, dramaturga y xestora cultural.

El so segundu alcuentru col profesoráu coincide cola representación nel Teatru Palacio Valdés, el 22 d’abril, de la obra ‘Molly Bloom’, dientro de la programación de escenAvilés y que se ta representando con ésitu por toa España. Yá en 1980 Magüi Mira encarnó per primer vegada a Molly Bloom, el míticu personaxe de la novela de James Joyce, unu de los grandes testos lliterarios del sieglu XX, y sigue namorando al públicu y a la crítica.

Con estos alcuentros cola reputada actriz y directora, el profesoráu d’Avilés va poder adquirir técniques p’aguiyar la comunicación ente escolinos y escolines, oxetivu que s’escuerre dende la Conceyalía de la Cultura, por que les clases rellacionaes cola lliteratura, el teatru, la escena vaigan más allá d’un entornáu de conteníos teóricos sobro l’alumnáu. Tratar de potenciar la comunicación físico y verbal. Pa incentivar la relación ente’l pensamientu y el mundu emocional. Pa potenciar el capital imaxinativu del grupu. Y asina consiguir una resultancia mas satisfactoriu nes sos práctiques teatrales colos alumnos y alumnes.

Nos alcuentros con Magüi Mira los y les participantes van trabayar na creación y contactu col testu. Van Aprender a investigar y atopar el soporte físicu que potencie’l pensamientu implícitu nel testu, según la busca d’una propuesta estética que potencie la ética del testu. Tamién van recibir instrucción sobro técniques d’improvisación coles mires de xenerar pequenos espacios de creación escénica.

La última xornada, la del 23 d’abril, va grabase en vídeu y va quedar a disposición del profesoráu participante y de xuru que-yos va ser d’utilidá nel desenvolvimientu de les sos clases. Tamién van disponer de testos de teatru clásicu y de teatru contemporaneu como material de trabayu.

La proyección pública de Magüi Mira nos postreros 40 años pola so trayectoria profesional, la so presencia nos foros públicos, y la so significativa llucha pola igualdá y la visibilidá de la Muyer na cultura española, convertiérala nuna referencia de la dignidá de la Muyer nel nuesu país y unu de les pilastres de la nuesa cultura viva.