L’Academia llanza el primer corrector ortográficu pa ordenador

La normalización llingüística da un pasu al frente. El primer corrector informáticu de testos n’asturiano, bautizáu “Iguador” polos sos pás, sal a la venta en formatu de cd al preciu de 6 euros y col doble envís declaráu de facilita-yos el llabor a quienes usen la llingua asturiana nes sos comunicaciones escrites y d’allanar, de pasu, el camín hacia la normalización del idioma.

Pa ello, L’Academia de la Llingua Asturiana y la empresa Araz -promotora y executora del corrector, respectivamente- xunieron esfuerzos concretaos en grandes cifres: Más de 50.000 entraes, que se correspuenden coles del diccionariu normativu de L’Academia, 6.000 verbos conxugaos y 300 normes ortográfiques pa xenerar una base de datos na qu’apigacen cuatro millones de pallabres.

No práctico, el primer iguador informáticu de llingua asturiana correxirá les faltes ortográfiques y léxiques más comunes na escritura, amás d’iguar les pertitentes errates. L’usuariu podrá personalizar el corrector ensertando pallabres determinaes según les sos necesidaes singulares.

Na parte técnica, el preséu informáticu que sal a la venta funciona baxo plataforma PC col procesador de testos más común, el Word de Microsoft, y ye compatible colos sistemes operativos Windows 98, XP y 2.000 y coles versiones de Word 97, 2.000 y XP.