Portada Conceyos “L’abrazu” estrénase esti sábadu nel Teatru Palacio Valdés

“L’abrazu” estrénase esti sábadu nel Teatru Palacio Valdés

by redacción asturnews

Esti sábadu, 14 d’agostu, a les 21 hores, y dientro de escenAvilés, estrténase “L’abrazu”, el realcuentru inesperáu de dos vieyos amigos na seronda de la vida, nel Teatru Palacio Valdés. Una comedia dramática de Christina Herrström na que s’entemecen realidá y fantasía, empobinada y versionada por Magüi Mira y protagonizada por María Galiana, Juan Meseguer y Jean Cruz.

Dos vieyos amigos realcontraranse na seronda de les sos vides en “L’abrazu”, la segunda propuesta de escenAvilés del mes d’agostu nel Teatru Palacio Valdés. Empobinada por Magüi Mira, la pandemia torgó’l so estrenu n’Avilés. Finalmente podrá esfrutase esti sábadu 14, a les 21.00 hores.

A mita de camín ente la realidá y la fantasía, la escritora sueca Christina Herrström traza xuna comedia dramática, na que los protagonistes, papeles interpretaos polos yá veteranos María Galiana y Juan Meseguer, y l’emerxente Jean Cruz, vense arrastraos por una imparable corriente d’humor.

Magüi Mira torna una vegada más a Avilés, como directora de la función producida por Pentación, amás d’adaptadora del testu. Como ella mesma pregúntase, esi mozu qu’apaez de forma sorpresiva nel realcuentru de los amantes, “¿ye real o un suañu imposible? ¿Ye un regalu del destín o la creación d’un problema que les sos vides son incapaces d’asumir? ¿Son los suaños, finalmente, la única realidá posible?”

Christina Herrström, toa una institución en Suecia, y que la so obra más popular, la so novela “Mil vegaes más fuerte”, convertiérase en película en 2010 dirixida por Peter Schildt y cola mesma como guiionista, pon a prueba, en palabres de Mira, “con humor y bones dosis d’acidez, la nuesa ferruñosa capacidá d’amar”.

Les entraes pa la función pueden adquirise nes canales habituales, la taquilla de la Casa de Cultura y la web https://entraes.liberbank.es/palaciovaldes, a precios d’ente 12 y 22 euros, en función del allugamientu nel teatru.

Más información

Tamién te podria gustar