La Xunta Moza volvió manifestase en El Milán

El Campus d’Humanidaes paró güei por segundu llunes consecutivu en demanda d’un títulu de grau pa la llingua asturiana, a iniciativa de la Xunta Moza, completándose la aición con una charra informativa y con una concentración delantre l’aulariu de Filoloxía onde participaron más d’un centenar d’estudiantes y docentes.

Esta acción vien a sumase a les entamaes pola organización pa reclamar un tratu dignu y igualitariu pa la llingua asturiana na universidá asturiana. Nun comunicáu que fizo públicu dfarréu de l’aición, la Xunta Moza “considera irrenunciable la materialización de los alcuerdos aprobaos pola Facultá de Filoloxía y pola Universidá d’Uviéu, que yá dende l’añu 1996 vienen reclamando la puesta en marcha d’un títulu de grau de filoloxía asturiana”.

Según la Xunta “nun esiste nenguna razón técnica qu’impida llograr esti oxetivu. En nengún foru universitariu ta en cuestión la esistencia de la llingua asturiana, esiste profesoráu abondo pa poner en marcha la titulación y esiste demanda d’estudiantes, mui perenriba de la qu’hai anguaño na mayoría de les titulaciones de la Facultá de Filoloxía. De la mesma manera, la llexislación en materia educativa n’Asturies esixe la ufierta de l’asignatura de llingua asturiana en tolos ciclos y graos. Ye la Universidá d’Uviéu la que tien que garantizar la formación del profesoráu necesario”.

La Universidá asturiana tien que se rexir por criterios técnicos y por esa razón nun ye “asumible nenguna fórmula que marxine a la llingua asturiana, imponiendo restricciones a les persones que voluntariamente quieran estudiala nel ámbitu universitariu”. Por eso, la Xunta Moza va siguir trabayando pa “implicar a tolos sectores de la comunidá universitaria na defensa del nuesu patrimoniu llingüísticu y de los derechos educativos más elementales”.